Read Khiamniungan Naga Achimtsün 2 Bible Online

Achimtsün 2 - Khiamniungan Naga bible

Achimtsün 2

¹Ngü jü chija koihe naiuso amongling ta ngiotsün nung ti in ta ngeau thatlu. Nung lüko ngü üou ta epsan.

²Anyainektsün nung a-aiu chhi, naiuso amonglingattsün nou ti alesan tsünoi.

³Mongthat mongsai eplouau chinektsün nai ngü theng shiukü naiuso koihekü jüpem lo- monglingkü taiuau ngü thatlu nouso nung goumchi nai aakih letletkü noitsün tao nungti chhitsünlu amongling ta ngü yangkü noiküla.

⁴Ngü chhi asong piakü chhin. Ngü jü thaiutha tsam nouso lahsan naiuso sainaoshep eiu nouso shan.

⁵Ngü taopun ai nouso ailo naiuso nungso chikü ko shep pai in pungkü thomkü

⁶ta nungso tü khiam wilut au ngü temkhao nouso thaiu.

⁷Ngü sua piakü tuhlou, naiuso jü tsam- khaiuko lüko sua hoi piakü chetkü noiküla. Yirusalem nai jü khako kihkü shitsünso chiai phopkü ngü thainian piakü nyimküla.

⁸Ngü shingtsün goumchi nouso ainou nokpao nouso paidan ainou tang- kason naiuso chaiou lakkeng nou lokamsan. Melohoi naiuso menyiuhoi nousoüh jih hangkü ngü tainoi, pohai tsaküh menyiu piakü aiutsünli ngü menyiuhoi jontaiuküla.

⁹Yirusalem nai jü khako kihkü shitsünso apem khengai ngü asong noiküla, naiuso ngü da mongthat mongsai asaita noiküla.

¹⁰Ngü tilüsong aiukü noiküla nung, ngü ep. Ngü monglingkü noiau apem chhin. Jü chhi apemko ngü mongtsam thasangkü noiküla, naiuso jü thaiutha alesan nou nung noiküla.

¹¹Nungaih ngü chhitaiutsün apem naiuso nungso chhitsün taoko ngü titithatso kowelat nungso tü yangshi nai nung apem ahsheih tü kum- keitsün atheau ti tsüha ta sheisan.

¹²Tiautenai nokpao tsaküh nung khako kihkü khutsün nokpaohoiüh ti chhikü shin nunglu chhiau shioji. Nungtiphe angela noitsün, ayang- lu tsünoikün tsüdekünai mainga ta ngiotsün nung ti in ta yangluau tsalou.

¹³Oh, nung ngü ngeji, “Anyakhem ko nai awon titi chentso, nung khekkü mongthat mongsai noitsün nung mainga tü chentso.

¹⁴Mongthat mongsai naptsünsoüh ngüso tiai khuji nung ngeji, lüko mainga nousoüh to nung tsünge.” Loüh nungtin aküo nou sam apem khako taiukü noin ta ngü ngen.

¹⁵Ngü jü mongai yanghe, “Mainga nouso tü thawaotsünli ngü tü lüko thawao-e nou ta ngü phopkü ngetsün tsangkü ti alesan ep?” Nungaih ngü thashin, “Titso tsüde,”

¹⁶Mongthat mongsai naptsün khaiunia lüko naiuso mainga hai lüko sauüh tsüyangsan shiji. Ashiau nou taoko to sam chikü be-ane. Ange amon taiutsün naiuso mainga nouso chikü eanaolu noin.

¹⁷Nungtiphe aakih nou jü thaiutha ti alesan tsünoishi tiautenai angja tü simkü aakih nou da alesan tsünoi. Nung apem üou; ahsheih ta kumkeitsün khekkü noin.

¹⁸Ngü chhisiyatsün jü thaiutha ti alesan tsünoi, tiautenai ngü nung ngü liloutsün hau letaiukiuwane ta ngekü noiküla,

¹⁹naiuso apa mong- that naptsün tha-e süne mainga tha-e sauüh nge-ankü tsünoi. Külüko ngü nung goumchi ko jü mongthat mongsai tsangkü nung chhisiya taiutsün alum apaüh teng kamephe-

²⁰Nungtiphe ngü kowekü chhi-elat- tsün thaiutha ngü mongetkü yanghe.

²¹Ni amongyang mongsai naiuso ange amon tsangkü tso tsak thaiutha kowelatkü lüko nung tsükowehakün khaiunia tsak hau letaiukiuwanji. Nung üou, naiuso ayam tsütha!

²²Ni chhitaiu küta aakih thathunkü yangelatji, naiuso nung thaiutha alesan ti noin?

²³Ni aakihtsün lektso ni chhi- elattsün nou ayangelat si mongkia tü simkü titso tsükanjikan. Asoh lüko among aalokü noiau tsüshio, nung chikü üou.

²⁴Khaiunia tsaküh apaüh chhi- santsün nou heshiukü naiuso mong- lingatkü noitsün chiai amao ti tsünoi. Nung lüko Goa ainou shiji ta ngü sheisanhe.

²⁵Nungti tsüdekü- naito, ni titi thekü heshiukü chija mongling lokü noiau shio-e?

²⁶Goa nou apa monglingitsünso hau mongthat mongsai, ange, naiuso amongling nou kiuji, lüko apaüh angei khaiunia nouso hau chhisaniji, naiuso ngüsoüh chhisantsün kamsanküta apa monglingitsünso hau kiuwanji. Nung chikü üou. Nung lüko ahsheih ta kumkeitsün khekkü noin.