Read Khiamniungan Naga Achimtsün 6 Bible Online

Achimtsün 6 - Khiamniungan Naga bible

Achimtsün 6

¹Nung goumchi nai ngiotsüo tsüdekü mikhem thatü thsüokü chhikü ngü ep.

²Goa nou ajantso hau memei, asuhat, naiuso jengtsaiu apaüh aiutsün alum kiu, lüko apa hau nung tsüthe-iji. Nungliko khaiu- niamao ajantso hao the-aniji. Nung üou, naiuso ayam tsütha.

³Khaiunia tsak thso tsom ngoikü hakü aakih laiukü kih au shiom, lüko apa tilektso kih lünou apaüh amongling haoson tsüephakü, naiuso ee taoko akhanan au athang tsühakünai nungaito ngü ngioji: nung methso amea chettsün bao chentso.

⁴Nung methso chettsün ti alesan tsünoi, nung anyakhem nai mowankü, be-ankü khuwanji.

⁵Apaüh anyi awon tilaitso tsüep, tsüdekünai aakih nou ti in nung tsüngelu nungti lüko apaüh to aalo nou epiu.

⁶Pon heng nime ngoikü kih lüko, aakih nai jamtso tsümonglingkü nou khaiunia nouko naito, nung methso nou chentso, tiautenai ngüne nemtso athang tsak ailu khuji.

⁷Khaiunia tsaküh apaüh heaulu chhi apem chhiji, lüko apa tü saiuwaniu ta tsünoi.

⁸Mainga tsak chiai iilatsün khaiunia tsak aküo titi meitso? aakih nou ti khekkü kih-e ta ngetaiutsün tsosilu tsak thaiutha ti alesan noin?

⁹Nung üou, naiuso ahsheih ta kumkeitsün khekkü noin. Loüh loüh ta asaita aiukü noitsün ko naito, ni ti taim nungko mongtsamkü noian chen.

¹⁰Lo tilüsong thawaoji nung biamkü aita akhemsiu noianküla. Khaiunia tsaküh apa tü kongtsokü noitsün ko ngio shio-e au tsüsome ta sam apemüh nge-en.

¹¹Ngio tilektso shio-eji, nungtithatso ngio apoi nou thiohaji, naiuso nungüh athaiutha ti alesan tsükiuji.

¹²Khaiunia tsaküh apa aakih soh tsak yanlükhuntsün khekkü letletkü noitsün ko apa thaiutha ti mei-in ta titi nge-e? Khaiunia tsaküh apa eanphiai goumchi nai tilüsong thawao-e nung titi thekü nge-ane?