Read Khiamniungan Naga Achimtsün 7 Bible Online

Achimtsün 7 - Khiamniungan Naga bible

Achimtsün 7

¹Angan nyamtsün khaiutsom apia mai nouko hauto, nian memei nou bao chentso, naiuso ni chettsün ajekhaiu ko naito ni eantsün ajekhaiu meitso.

²Sümai tsak noitsün tsamai khutsün ko naito meashaptsün tsamai khu bao chen, tiautenai ee nou sam chikü tü taiukü noin ta aa noitsünsoüh asaita ngüso chija yangsanau noin.

³Anyai nouko naito amongsaiu nou meitso, amongsaiu nou akhasi- nio nyakhemi au shiom, lüko nungüh ni angelatsün losongkiuji.

⁴Khaiunia sauüh amongling thaiuthalu yangji nungto mainga noin. Ange khaiunia nou to eantsün thaiutha yangji.

⁵Mainga haiüh nianlomsantsün tü angtsün ko naito iilatsün khaiunia nou ni tü thuttsün tü ang bao chen.

⁶Mainga hai nyaitsünto, in nai tsao nou jah nai pektsün khekkü nungüh üou.

⁷Tilai mongsai pungtsün khaiunia tsaküh ajantso kausaiatji, apaüh mainga hai saisile khekkü chhiji. Ni nekhem paopei lou naito, ni asaisile amei nou lotheanji.

⁸Ti in lünou ayaloutsün ko to athonantsün bao chen. Abülom nouko to ajeiloutsün meitso.

⁹Amongmat sungtsün lükiplou, tititenai meko tsaotsün to aiu chhi noin.

¹⁰“Lo nouko naito akeng vetao nou tiau meitso?” ta laitso lasangh; Nungto iilatsün ngiosang tsüde.

¹¹Aakihtsünso apem tü mongsai pungkü noi au noin, nungto tengkam kamtsün thalu.

¹²Naiuso nungüh ni hau chai nou aalou kiutsün thalu aalou kiu-e. Mongthat mongsai nou ni kipsankü taiuji- nung ange nou alesan kiutsün noin.

¹³Goa nou chhitaiutsün tü lüyanglu. Goa nou tisübao kiangkü sheithowaniu, nung sauüh lolu au shio-e?

¹⁴Tilai athaiutha aküo meikü khuji, nungaih lümongling, naiuso tilai angja shiji, nungaih nung lüyangshi: Goa nou amongling si angja nemtso hongji, nungthanko ti thawaoshi-e nung ni ngioau tsüshio-e.

¹⁵Jü üou aakih nai, ngü alum epkü shi-in. Khaiunia amei tsak aakih laiukü tsükihji, lüko tsümeikün khaiunia tsak aakih laiukü kihji.

¹⁶Nungtiphe thatü meikü theau mongyang haopungkü theauüh lakowe ni tiauta chijakü lothelou-e?

¹⁷Loüh phopkü akausaiüh lathe tsüdekünai phopkü maingatingüh lathe- ni atao mosaokü tiauta elouwane?

¹⁸Nung aphopshi nime nou lühaiuwanlou. Ni Goa asuhat naito, ni alum yamko ashiotsün noi-e.

¹⁹Nokpao cheüh noknio tsak thaiutha chhikiuau shiotsün ko naito mongthat mongsai nou khaiunia tsak hau chhikiutsün songtso.

²⁰Goumchi nouko jamtso tsüphiowankü asaita thakü chhitsün khaiunia tsaktso tsünoi.

²¹Khaiunia nou chitetsün apem ta to la-angekei- atsamkiüh lüko ni lotsao lochitsün ngio ni lula-e,

²²naiuso ni amaohai piaküjam lochi lotsaotsün lüko ni angeshio.

²³Ngü jü mongthat mongsai tsangkü alum tü thelula. Ngü ahaopungkü theau thatü kowela, lüko ngü nung tsüthashio.

²⁴Aakih nai nung ti in ta sauüh titi thekü thasane? Nung sam thaiutha angela au thatü ao naiuso thatü chek.

²⁵Lüko ngü ange nou epau thatü kowe, ngü mongthat mongsai naiuso jü asangtsün tü thashitsün eplouau kowe, naiuso mongthat mongsai naiuso akausai si mainga chhisiya nou ti nung ngelouau kowekü shin.

²⁶Ngü eantsün tü tekkü khosakkü tso tsak epsan- naiuso nung menyiu tsak noin. Apaüh ni hau atsüojin hantsün nou ni jin tsak ko montsünli tsüdekünai nyao tsak ko soklou- wantsün khekkü thalou-e, naiuso ni tü piploutsün nung sonkhiang tsaküh keloutsün khekkü noi-e. Khaiunia tsak sauüh Goa monglingiji, apa thakhuau shio-e, lüko apaüh angei khaiunia nouto thalouwane.

²⁷Ah, ngü nung athalatsün thaiutha yamkü khunai intsojam intsojam ta epsaniu ta achimtsün nou ngioji.

²⁸Nungtü simkü amao athalatsün noiankü naito, ta ngü yamkü noiküla, lüko titso tsüepsan. Ngü asuhat kiuau lümeikü heng tsak ongko pohai tsak epsan, lüko menyiu haito tsaktso tsüepsan.

²⁹Ngü apem nouko nunglu ngelou: Goa nou sam saitha sheitho, lüko samüh sam chija locheklouji.