Read Khiamniungan Naga Achimtsün 9 Bible Online

Achimtsün 9 - Khiamniungan Naga bible

Achimtsün 9

¹Nung apem thaiutha atao loukü thsüokü yanghe, naiuso mong- that mongsai noitsün si asio khaiunia nouso chhisiya atsüojin lüko achinyan lüko apem Goa noulu kankeiji ta thasan. Apa kha ai ti shiau noin nung sauühtso ngioau tsüshio.

²Apem dongai aküo wekülu shiji. Asiohoi naiuso tsüsiokünso ameihai dongai naiuso tsümeikü hai dongai, donyam nai mongkiutsün dongai, naiuso tsümongkiukünso dongai, aloat chaithio kiutsünso naiuso tsükiukünso dongai aküo wekülu shiji. Khaiunia amei tsak naiuso angei khaiunia tsak aküo wekülu, ngiomong shinge loutsün khaiunia tsak naiuso ngiomong shinge tsüloukün aküo wekülu.

³Khaiunia chikü dongai aküo wekü shiji, nung lüko nung goumchiko tilüsong tsüthakü thawaoji nunglilu noin. Khaiunia aakihtsün lektso khaiunia mongpem nou tsümeikün naiuso a-aiu mongyang nou meankü noiji, küta ngüso eanji.

⁴Lüko goumchi nai aakihtsünso thaiutha ayangtaiu tso tsak noin, chongkhao mea tsak ko naito jii aa bao chen.

⁵Aa noinsoüh to ngüso jamto eane ta ngeji, lüko ee nou to ti tsüngeshiji. Ngüso thaiu ti tsünoishi, ngüso thumkü be-aniu.

⁶Ngüsoüh tsüojintsün, chinyantsün, naiuso chinektsün chikü ngüso ko hakü mowaniu. Ngüsoüh loto goumchi nai ti haoson tsülohashi-e.

⁷Whai, achihsikhiam monglingkü lüheshiu, naiuso atheng amongpem amongling nou lüshiu; tiautenai Goa nou achhisiya nouso lou-iu.

⁸Asaita yanthsüokü lünoi-i, naiuso akhaiu ai asaita khaiutsom nou lütsom.

⁹Goa nou nung goumchi ko ni hau kiutsün asapat aakihlaiu chikü ni tsüojin- tsün tsammongnyiu ko monglingekü lünoi. Nung asapat aakih ajekhaiu pungkü lümongling, tiautenai ni angjakü shitsün chikü thaiutha amai epau nou nunglu noi-e.

¹⁰Ni tilüsong chhilünou kongkü lüchhi, tiautenai eantsün goumchi nai chhisiya, ayanghe, angelou, naiuso mongthat mongsai titso tsünoi-e.

¹¹Nung goumchi ko akhaolaotsün khaiunia nou asaita to ajinge nai ashio tsüepji, naiuso mongnyan nou asaita to ehli tsüshioji. Mongyang taiutsün nou asaita to eheshiu tsüthaheji, iilatsün khaiunia nou asaita to memei tsü-iulaji, naiuso amontsün khaiuniahoi nouso asaita to noithang atsok nai tsüsungji. Aküo tsümeikü nou khaiunia pungkü ta thawaoji.

¹²Ni nou atao ti taoko shiji, nung ni tilaitso tsünge. Waio nouso alekta jin nai monantsün khekkü, ngou nouso nyao nou sukloutsün khekkü, sam ti ayang tsünoitsün tsümeikün atao tsak ko sam thalouwanji.

¹³Ngü loüh nung goumchi ko mongthat mongsai titi wesankü taiuji nung athatlu amei tsak ep.

¹⁴Noknio ehentso tsak ko khaiunia thsaothsaokü noiküla. Nung noksong nou tü oukongting nokpao tsaküh poh. Apaüh nung noksong lemlou- küta pe nouso lopekkü nappau khemlou.

¹⁵Nungko noksong kipsanau shiokü akaosai naptsün tsosilu khaiunia tsak noiküla, lüko sauühtso apa tsüyangsan.

¹⁶Oukong nouko naito mongthat mongsai chentso ta ngü asai ngioji, lüko tsosilu khaiunia tsak tü to mongthat mongsai noin ta sauüh tsüyangsanji naiuso apaüh ngiotsün tü sauüh anglu au mong tsükiuji.

¹⁷Mainga hoi ajeiaikam nai nokpao tsaküh sangh asong nou wekü chitetsün tü angtsün ko naito mongthat mongsai khaiunia tsaküh yamlukü ngiotsün ngio nouso tü angtsün bao chentso.

¹⁸Ehli sahsi- ngiu nouko naito, mongthat mongsai nou chhitsün songtso, lüko angei khaiunia tsaküh chhi amei piakü lotheanji.