Read Khiamniungan Naga Jih Ongko Jih 1 Bible Online

Jih Ongko Jih 1 - Khiamniungan Naga bible

Jih Ongko Jih 1

¹Solomon jih nouso ongko ameiting jih

²Apa sonkouüh cheptsün nou ngü tü achepi! Tititenai theng nouko hauto ni tsüojintsün meitso.

³Akhaiutsom da amonglingau angannyam tsak noin, anian nung khaiutsom losangkü noitsün khekkü noin. Nungtiphe mesohoi nousoüh ni tsüojinji.

⁴Niko ngü anialou küta je jingkü khuwanko, ni jü nokpao au theküta ngü atsampai ai anialou. Sam kamkü monglingeko, thsüokü shiuküta ahat tsünoikü tsüojineko! Menyiu chikü nou ni atsüoting tsüojinji!

⁵O Yirusalem menyiuthsoso, Kedar ün nejenkhio nouso khekkü, Solomon ün nekhongjeitsün khekkü, Ngü shisileng anya lüko alengmei noin.

⁶Jü shisileng shioko ngü tü lathsülu, tiautenai ngü ajejek nou thangthekü noin. Jü deisinioso ngüko mongmatkü noiküla, naiuso ngüsoüh ngü hau sainaoshep eiu nai chhi-in. Nung tsangkü jüpem tü tilai tsüpaotsanglou.

⁷Ngü tsüojintsün ni, ngü hau achite. Ni a-onnemok hoi thsan tsamheau tiai nialükhunji? Anyiwem ajechii ainou ni ngüso hau tiai aalou-iji? Amao onnemok jimhoi onnemok ongko, Ngü ti tü yamau pohkü noin?

⁸Ni athang nou tsüngeso? O menyiuhoi ongko mesomeiting nou? Lükhu naiuso onnemok hoi tü lühoilut; onnemok jimhoi nejenkhio shimkü a-wonso thaiutha thsan nou ayamsan.

⁹Jü atsüojintsün Farao ehli tsamkei nai mokthso asang tsak ko, ngü ni welutji.

¹⁰Onthong dongko akhaiuo aleng amei noin. Naiuso nung asang ai chaiou lung nouso khekkü lemjeikü noin.

¹¹Lüko samüh nihau chaiou lakkeng sonkhiang tsak, chaiou lak nouso hakü shankiu-e.

¹²Jü nokpao apa puo ai saikü noiküla, naiuso jü angannyam khaiutsom nou ahsheih nou meankü nyam.

¹³Ngü tsüojintsün nou jü nyao chiai sailutnai, angan nyamtsün khaiutsom nou nyamji.

¹⁴Ngü tsüojintsün to, Engedi nai sainaoshep eiu ai pontsün liutsa taopun nousoli noin.

¹⁵Ngü tsüojintsün, ni titi meso amei noin; aniovei to titi atsüojinau lümeikü jeji!

¹⁶Ni titi pühe amei O jü atsüojintsün; ni ngü titi lomonglengji? Sam then au khengliu asangnya nou noi-e;

¹⁷Sam tsam kheampao hau cedar pai nouso the-e, naiuso diothop hau Cipra pai nouso the-e.