Read Khiamniungan Naga Jih Ongko Jih 2 Bible Online

Jih Ongko Jih 2 - Khiamniungan Naga bible

Jih Ongko Jih 2

¹Ngü Sharon nai liutsa taopun tsaklu noin, tsamei lakkhaiu taopun tsak noin.

²Tsao nouso ongai lakkhaiu taopun tsak khekkü, nungti menyiuhoi ongai ngü atsüojintsün menyiu noin.

³Liutsa pai nouso ongai kaiopai tsak khekkü, nungti khaiuniahoi ongai jü atsüojin noitsün pühe nou noin. Ngü nung paisoh khemko moknoi au aiuji, naiuso nung pai eiu jü sonai nyaothingkü nyakü noiküla.

⁴Apaüh ngü sümai saotsün tsamai niakü khu, naiuso jükhako atsüojin nehan apaüh shiosankü noiküla.

⁵Sainaoshep themtsai nou jü uo alokongkiu, kaioshep nou ngü aloutsamkiu, tiautenai chinekkü yangtsün nou ngü thajeian-iu.

⁶Apa pha tsatai nou jükhaiu khemai taim, naiuso apa pha uai nou ngü piplouji.

⁷Yirusalem menyiuthsoso akhaolaoting jinchai nouso, nian jounkü ngü asam tü ngioji, sam tsüojinetsünko ashiusong tsükiu-e ta ngü tü athalou.

⁸Ngü tü tsüojintsün sangh ngü luji, apa king naiuso choi nouso yankü jüdongai jingkü shiji.

⁹Ngü tsüojinetsünto jinchai tsak tsüdekünai apa thso khekkü noin. Apa pe dongko tsakü koukhanthso, aphat nai thapthioji.

¹⁰Ngü tsüojinetsün nou chiteji, naiuso ngü tü ngioji, Atsalou ngü tsüojintsün, ngü tsüojintsün ngüko ashi.

¹¹Ah-uo nou yanlükhuniu, ah-ou nou laolou-iu;

¹²goh nai taopun nouso punsanji. Jih hangtsün atao shikü noin, liutsa nai mükham nouso shitsün sangh lulaji.

¹³Phioshep nouso shemau yalouji; naiuso sainaoshep puntsün nyam nou ahsheih nou meankü noin. Nungaito atsalou ngü tsüojintsün; ngü tsüojinetsün ngüko ashi.

¹⁴Lungphat nai pamkü noitsün chongmükham khekkü ni noin. Ngü hau akhasinio amei nou a-epi, naiuso asangh anyaothing nou alula-i.

¹⁵Ngüsoüh sam sainaoshep molotheankün khako, chio ehen nouso samüh thalouko.

¹⁶Ngü tsüojinetsün nung ngü ün, naiuso ngü apa ün. Apaüh meshen onnemok hoi hau lakkhaiu taopun nouso ongko tsamhe-iji.

¹⁷Ahom chongtao moyanlükhunkün lektso, ahsheih nou moshikün lektso, naiuso ahsokhem moyanlükhunkün lektso, jinchai tsak khekkü, naiuso Bether king nai jinchaipong tsak khekkü, jü dongai laokü ashi ngü tsüojintsün.