Read Khiamniungan Naga Jih Ongko Jih 5 Bible Online

Jih Ongko Jih 5 - Khiamniungan Naga bible

Jih Ongko Jih 5

¹Ngü jü aimongai napkü noin, Ngü tsüojintsün jü tsamsigoh. Ngü jü laoshang naiuso angan nyamtsün kamshiji; Ngü jü liukhiam atsop nou sunkü heji; Ngü jü theng naiuso nyao nou shiuji. Atsüojin haiso, atsüojin nou asam mothatukkün lektso lüshiu!

²Ngü sai-an lüko jümongpem tsüsailakü noiküla. Ngü tsüojinetsün nou jü kou tü haiukü mea nai mean. Jü atsüojin hai, jü atsüojinetsün, jü mükham, ngü tsammongai anapi, jü khaiu khiamle nou paithsaokü noin, naiuso jükhaiu asoh lemlu nou chetta penkü noiji.

³Ngü sheitho tsüsunkü noin; ngü nung tiauta müjam tholoushi-e? Ngü jühok tsaowaniu; ngü nung tiauta müjam lochinyan shi-e?

⁴Jühaiüh apa pha kou nou tü thangnai, apa shimkü shitsün shioko ngü monglingkü noiküla.

⁵Ngü apa tsammongai napi au khemloukü noiküla. Jüpha naiuso jü phakhatsoso ngü kou nou tü thaloutsün taoko, angannyam khiam nou tsomkü noiküla.

⁶Jü atsüojinetsün hau ngü kou nou sopankiu, lüko apa laolokü khuwankü noiküla. Ngü apa sangh lula au thatü mongchio! Ngü apa yam lüko epau tsüshio, Ngü apa tü jon lüko tsüthala.

⁷Ehjio khaiuniahoi noknio lemkü tsakeitsünsoüh ngü ep; ngüsoüh ngü tü shiuh naiuso ngü tawaikiu; noknio pe tü hütsünsoüh jü phakhut chipek kiu.

⁸Yirusalem menyiuso asamüh jü atsüojinetsün epsan naito, asamüh apa hau ngü ayang nou jeiankü noin ta lüchite.

⁹Menyiuhoi ongko mesomeiteng nou, ni tsüojinetsün nung amaohaiko tsüemteng süne? samüh ni tü thalouau lümeikü hau apa titengkü me-in to?

¹⁰Jü atsüojinetsün to shisileng amei, naiuso kongsimongkü noin; heng 10, 000 ongko apa tsak noin.

¹¹Apa kha taoson lengli meikü noin; apa khaiuo nying nyingkü, mükho anyaching tsak khekkü noin.

¹²Apa niovei haiusai nai alengmeikü jeikeitsün mükham khekkü, mükham nou nyao nouko khiam pengküta, haiusai nai tsakü noitsün khekkü.

¹³Apa onthong nouso aleng amei aimong tsak khekkü, angannyamtsün nou meankü noin. Apa sonkou nouso angan nyamtsün nou lopaikü noitsün, lakkhaiu taopun nouso khekkü noin.

¹⁴Apa phaso lüko meikü mongkü potsün noin, naiuso apaüh nung khiapthso nousoüh koujeikü noin. Apa pem nung safir chaiou lung hakü shantsün, senpok hou nyincheikü noitsün khekkü noin.

¹⁵Apa shiolakso chaiou lakkeng nai lao-ekü shantsün, alabaster paikhiamli noin. Lebanon king nouso khekkü apa aseng noin, nung cedar pai nou tsamthong lahtsün khekkü noin.

¹⁶Apa sonkou tü chepao anyaothing noin; apa alum ko athapao lümeikü noin. Yirusalem menyiuso, jü atsüojinetsün nungti li noin.