Read Khiamniungan Naga Jih Ongko Jih 6 Bible Online

Jih Ongko Jih 6 - Khiamniungan Naga bible

Jih Ongko Jih 6

¹O menyiuhoi ongko mesomeiting nou, Ni tsüojinetsün tiai khuwan? Samüh ni tü hachukü apa epsan kiuau ni tsüojinetsün, nung yam sübao nai khuwan sam hau achite.

²Jü atsüojine nung apa aimongai, balsam pai nouso samsantsün ai saokü noin. Apaüh meshen onnemok hoi meshen aimongai thsan tsamhekü, naiuso lakkhaiu taopun kamloukü noin.

³Ngü tsüojinetsün nung ngü ün, naiuso ngü apa ün. Apaüh apa onnemok hoi hau lakkhaiu taopun nouso ongko tsamhe-iji.

⁴Jü atsüojinetsün ni Yirusalemli aleng amei, Tirza noknioli aleng amei, nungso noknioli aniamsim meikü.

⁵Aniovei ngü ainou asalükhunan, tiautenai nungsoüh ngü ngamthiowanji. Akhaiuo Gilead king nouso ainou, kopkopkü saotsün wonhoi khekkü noin.

⁶Ahou so loting tsawankü athaiu noitsün onnemok hoi khekkü. Nungso ongko tsak lüko tsümowan, ngüso chikü tongtü waokü noin.

⁷Akhaiuke phiai a-onthong so uoji.

⁸Nokpao nou dongko menyiu nokpao aoluok, tsamsigoh tsüyangkü taiutsün menyiuhoi aopetjei, naiuso mesohoi aweau tsüshiokü lünoi-i!

⁹Lüko ngüto tsaklu tsüojinji, naiuso apa mükham tsakli athapau meikü noin. Apa to apa nyiu ün thso menyiuthso pemsa, nung apa nyiuüh phopkü tsüojintsün thso noin. Menyiu chikü nou apa tü thapji, naiuso apa lomsanji. Menyiu nokpao nouso si tsamsigoh tsüyangkü taiutsün, menyiuhoi nou apa tü alomsan jih hanglutji.

¹⁰Aje tsüdekünai alei awonli jeekü naiuso aleng meikü, ah-nge awon shitsün khekkü nung menyiu nou sau?

¹¹Tsamei nai paisam ehen nouso tü thapau, sainaoshep paisha nouso tü thapau, naiuso sasashep pai nouso tü puntsün tü thapau ngü, almond pai nouso ong ai saokü noin.

¹²Ehli tsamkei niatsün tsakli, ni ngü atsüojine au mongchiotsün shankiu nou ngü ngaongaoji.

¹³Lühang lühang, Shulam menyiuthso. Ni hangtsün taoko samüh ni tü thape. Atetsünso lingthiokü noitsün jetko ngü hangnai, asamüh ngü tü thapau tiauta mongchioji?