Read Khiamniungan Naga Isa 1 Bible Online

Isa 1 - Khiamniungan Naga bible

Isa 1

¹Yihudahai nokpao Uzzia, Jotham, Ahaz, naiuso Hezekiaso vetaoko Amoz thso Isaia dongai Goa nou Yihuda naiuso Yirusalem thaiu- tha atsangshei kiutsün ngiongem nung thsam nouko satkü taim.

²APAOU nou ngiom, “Goum naiuso aün, ngo ti ngioji nung tü anglu! Ngo thashesantsün methso nousoüh jü thako khengshiji.

³Jangtso nousoüh ngüso APAOU ngeji, naiuso gado nousoüh meshen APAOU tsam ngeji. Lüko jü khaiunia Israelhaiüh to nung tsünge. Ngüsoüh nung tsüngelating.”

⁴Ayang tsünoikün, asam angei mele, chhi tsümeikü nou pai eiu, alothe kankeitsün thsoso! Asam angeiüh asam ten-ianji. Asamüh Israel ün asio Goa APAOU nou wanan küta apa dongai asam phi sheilutkü khuwan.

⁵Asam tiauta kheng- shikülu noiji? Asamüh loüh tekkü angja kiu-iau mongchioji süne? Israel hai, asam khaiu thsüluchon nou meananiu, naiuso asam mongpem si mong nouso akia noin.

⁶Khaiu ainou hokpho saokü asam pemai mouthang jije noin. Asam pem ataiwai nou naiuso chaikia nou meankü noin. Asam mou nouso tsüyanthsüo tsüdekünai tsükepok. Nung chaikia mou nouso ai khaiutsom titso tsüloulut.

⁷Asam goumchi thathe-aniu, naiuso asam noknioso in nou jekthiowaniu. Asamüh thapkü noikü, gohmao khaiunia haiüh asam goh lowane naiuso alum lotheane.

⁸Noknio nou thalouwankü, sainao- shep eiu nai eh tsühükü leantsün ehü lop tsak naiuso mülong eiu nai lopsham tsak khekkü Yirusalem noknio pemsalu poitaiukü noin.

⁹APAOU Apemshiotsün nou khaiunia ajantso tsüasanitünto, Yirusalem lüko Sodom naiuso Gomorra khek- külu thumkü mowanau noiküla.

¹⁰Yirusalem, anokpaoso naiuso akhaiuniaso lüko Sodom naiuso Gomora khaiuniaso khekkü noin. APAOU nou ni tü ti ngioji anglu. Sam Goaüh ni hau ti tsandeji nung da mong lükiu.

¹¹Apaüh ngioji, “Asamüh nung aloat chaithio nouso ngü hau kiutsün chikü ngo aiuji ta yangji süne? Ngo nungko mongchioji ta tünto, a-onnemok aloat chaithio nouso naiuso atsa thainian ameiting nouso saiukü lowankü noi-ela. Ngo jangtsopong nouso, naiuso onnemok si won nouso she ko thathsüluwaniu.

¹²Asam ngü amkhamau shinai nungso chaithio chikü kankü shiau sauüh sang? Jü Amkham Tsamai nungso chikü ngamkei-iau sauüh asam tü sang?

¹³Asam chaithio kankü shiau tüpou. Asamüh jahkü angannyam kiutsün jü thaiutha achinyan noin. Asam ün Alei Yan Sümai nouko Anonyi nouko, naiuso amkham yamko kamshitsün apem nouko ngo tsüha-e, tiautenai nungso chikü asam angei tsangkü lothekü noin.

¹⁴Ngo asam ün Alei Yan Sümai nouso naiuso asio ajekhaiu nousoko chinyanji, tiautenai nungso ngo kipau tsüshiokü thsale tsak noin.

¹⁵“Tilai asamüh pha loksankü misao-e, ngo asam ta tsüthape. Asamüh tilektso misaolünou, ngo tsüange, tiautenai asam pha she nou meankü noin.

¹⁶Asam yanthsüokü lütsawan. Jü khako asamüh tsümeikü chhitsün alaowan

¹⁷küta ayamtha nou chhiau angelou. Ngio- tsüo lükankei-thangmangkü noinso tü lühachu, mejethai hau ngüso thaiu lükiu, naiuso jihihoi thaiutha ngiotsüo nai lütsakiu.”

¹⁸APAOU nou ngioji, “Lo, samüh thathangkü ngemlouko. Asam angei nouko shengkü lao-ekü noin, lüko ngo asam nyinli yanthsüokü tsawan- kiu-e. Asam angei nouko nyakhaokü lao-ekü noilüko, asam e-mok athaiu li jaokü noi-e.

¹⁹Asamüh lu ngü ngiotsün angkü thenaito, asamüh goh ainou amei eiusantsün he-e.

²⁰Lüko asamüh ngü lochinaito, asam eaulu noin. Tiautenai, nung ngio ngo, APAOU, nou ngiowaniu.”

²¹Nung noknio ataojam mong- lamkü noitsün nung titi ajisiwop chhitsün menyiu tsak saisile khekkü iula! Ataojam nung noknio asio khaiuniahoi nou meankü noiküla, lüko lo khaiunia loattsünsolu iulan.

²²Yirusalem, ni ataojam tangkason khekkü noiküla, lüko loto ni yaang iula-iu; ataojam ni theng amei tsak noiküla, lüko loto ni khiamsanglu iula-iu.

²³Asam niakeitsünso akhengshihoi naiuso kauhoi paiu- sihai noin; ngüsoüh asaita paopei naiuso nekhem paopei nouso louji. Ngüsoüh mejethai mikhem khako tsüjunglouji naiuso jihihoi nousoüh ngüso mi kankü shinai tsüangluji.

²⁴Nungtiphe lo, APAOU Apem- shiotsün, Israel ün oukongting Goa nou ti ngioji nung anglu: “Jü ehso, ngo asam tü thamshi-e, küta loto asamüh ngü hau angja tsükiushi-e.

²⁵Ngo jüpha ni thako po-e. Ngo asam in nai son losangtsünli losange, küta asam tsüsiokün chikü losio-e.

²⁶Asam pe nai noikü shitsünli ngo asam hau nokshing nouso naiuso ayam hantsünso kiu-e. Nungai Yiru- salem ta asio, naiuso monglamtsün noknio ta jone.”

²⁷APAOU asiophe, apaüh Yirusalem naiuso mongphokletsünso pungkü kipsane.

²⁸Lüko apa thako khengshikü angei suntsün pungkü apaüh sutne-e, apa leantsünso pungkü apaüh loate.

²⁹Asamüh pai nouso amkhamkü shitsün naiuso asio aimong nouso shankü shitsün thaiutha ko miamkü yangshi-e.

³⁰Asam lampai tsakli wonankü eane, sauüh khiam tsüthsaluttsün aimong tsak khekkü noi-e.

³¹In pe tsak nou tsokap in nai jahwantsünli, oukongting khaiunia nouso ngüso chhi tsümeikün tsangkü lotheane, naiuso nung lotheantsün sauühtso loyangau tsüshio-e.