Read Khiamniungan Naga Isa 10 Bible Online

Isa 10 - Khiamniungan Naga bible

Isa 10

¹Jü khaiuniaso thangmangau asamüh ngiokhem nouso ayam tsüthakü nou shanji. Asam inyate!

²Nungti asamüh tsosilu hai ngüso ayamtha nou naiuso ngiotsüo epau noitsün ainou loyangji. Nungti asamüh jihi nouso naiuso mejet thso nouso ün jengtsaiu louwanji.

³Asam Goa nou lohat nai asamüh ti chhi-e? Laiukü jetekü noitsün goumchi ainou tilai apaüh aküothe kankü shi-e asamüh ti chhi-e? Ahalouau asam tiai khuthio-e? Asam tengkam asamüh tiai tsangtaiu-e?

⁴Asam ehli thang nai loatkü wane tsüdekünai sua au kankü khuwane. Nungti lüko APAOU ün amongmat tsüthone, angja kiuau apa pha loüh loksankülu noi-e.

⁵APAOU nou ngiom, “Asiria! Ngo Asiriahai ngo mongmattsünso tü angja kiuau pailai alaiu tsakli kankeiji.

⁶Ngo Asiriahai, ngü mongmatitsün goa tsüngekün mele tsak tü pha poau hong. Yamkheng nai achinyan khekkü khaiuniahoi aploukü, kauloukü, naiuso ngamthiokü, theau ngo ngüso hong.”

⁷Lüko Asiriahai nokpao apa pem chija alothe chhiau mongai ayang noiküla. Apaüh mele piakü lotheau yangtaiukü noiküla.

⁸Apaüh bülomkü ngioji, “Jü süpai aheihoi pungkü nung nokpao tsak noin!

⁹Ngo Kalno hai noknio nouso naiuso Kalkemis, Haimat noknio nouso naiuso Arpad shioloukü noiküla. Ngo Samaria naiuso Damaska lüko shioloukü noiküla.

¹⁰Yirusalem si Samaria nai sotsom goa noitsün ta shimkü nouso amtsün nokshing nouso angja kiuau ngo jü pha loksankü noiküla.

¹¹Samaria naiuso sotsom goa nouso apem hakü ngo lotheankü shitsünli, Yirusalem naiuso nungko sotsom goa amkü noitsün chikü ngo lotheane.”

¹²Lüko APAOU nou ngioji, “Ngo Zion king naiuso Yirusalem nai chhitsün tilai kheme, ngo apa akoitsün naiuso bülomtsün chikü thaiutha Asiriahai nokpao hau angja kiu-e.”

¹³Asiria hai nokpaoüh bülomkü ngioji, “Ngo nung chikü jü oukong nou chhikü shin. Ngo oukong, angelatsün, naiuso mongyang amei noin. Ngo mele si mele nouso jetko noitsün elung nouso tsommokü wan küta ngüso heshiu kamsantaiutsün lowan. Nungko keitsün khaiunia nouso khako ngo jangtsopong tsaküh ngamthiotsün khekkü ngamthio.

¹⁴Goumchi mele nouso nung waio ap tsak khekkü noin, naiuso ngo ngüso tengkam waioli nouso kamshitsün tü siukü kamshianiu. Nungko ngü lohatau ekuk lemlemtsün naiuso shitsün tsüdekünai awetsün tsaktso tsünoiküla!”

¹⁵Lüko APAOU nou ngioji, “Ou tsaküh meshen kankeitsün khaiunia tsak nouko to apa bao songtso ta ngioau shio-e süne? Pailinsah tsak akankeitsün khaiunia chiai atengting süne? Pailai nou pha tsükankeiji, lüko pha nou kankeiji.”

¹⁶Sauhai lo tsaloukü noin nungso lohatau APAOU Apemshiotsün nou akiasiya tsak hongau noin. Ngüso pem nai injekli jekkü noi-e.

¹⁷Goa, sau Israel hai awon noiküla, nung in tsak iula-e. Israelhai ün asio Goa nung in nyai tsak hau iula-e, nungüh nyitsokolu tsao naiuso tsaopai nouso hakü alum chetheane.

¹⁸Liutsa ameiting naiuso eiu-atsün goh nouso moisemkü jekthiowan, naiuso nung khaiunia tsak akiathe nou lotheantsün tsakli noi-e.

¹⁹Nungai methso tsaküh wesanau shiokü pai nouso thata thsaothsaokü poi-e.

²⁰Apoisantaiu nouso loto ngüso lomowantsün mele nouda tsünio- lutshi kü hau Israelhai thaiutha atao tsak shiji. Ngüsoüh Israel hai asio Goa, APAOU nou da monglamtsün atsüoting niolute.

²¹Israelhai khaiu- nia ahoi athsaosithso tsak ngüso akong Goa dongai laokü shi-e.

²²Loto Israel khaiuniahoi haiusai nai singtsoli piakü noilüko, thsaothsao- külu laokü shishi-e. Nung khaiunia- hoi thaiutha alotheantsün kamsankü taium, naiuso nung epau tongtü mai- kü noin.

²³Apaüh ngiokü taiutsünli, Akhengting APAOU Apemshiotsün nou shingkhan athum khako alothe nou kankü shi-e.

²⁴Akhengting APAOU Apemshio- tsün nou Zion nai kihtsün apa khaiu- niaso tü ngioji, “Ijip haiüh asam tü thangmangkü shitsünli Asiriahaiüh asam thangmang lüko hatkü lanoi.

²⁵Atao letletkü nouko ngo asam ang- jakiutsün khemane, küta nungphiai ngo ngüso lomo-e.

²⁶Oreb hai lung dongko Midiahai khaiunia tü ngü jü ashiuhkai nou shiuhtsünli, ngo, APAOU Apemshiotsün nou ngüso tü shiuh-e. Ngü Ijip hau angja kiutsünli ngo Asiriahai hau angja kiu-e.

²⁷Tilai nung atao shi-e, ngo asam Asiriahai oukong ainou sokthame, naiuso ngüso khe loto asam sangdongkhaiu ai tsünoishi-e.”

²⁸Eh süpaihoi nousoüh Ai noknio thalouwan! Ngüso Migron yankü khukü noiküla! Ngüsoüh ngüso eheshiu Mikmas nai lean!

²⁹Ngüsoüh aoyan nou yankü khuküta Giba nai shamkü noiküla! Rama noksong nai kihtsün khaiuniahoi lekkat, Nokpao Saul ün noksong khaiuniahoi Gibea ainou jingkü khuwan.

³⁰Gallim khaiuniahoi lüwe! Laisha khaiuniahoi anglu! Anathot khaiuniahoi nou athala!

³¹Madmena naiuso Gebim khaiuniahoi ngüso aa solouau khuwanji.

³²Lonyi ehoi nouso Nob noksong nai noin, naiuso nungko ngüsoüh Yirusalem noknio Zion king nai ngüso pha jenkü thipshikü saiu-e.

³³APAOU Apemshiotsün nou ngüso paikia nou hesankü sutnekü yakkantsünli chhi-e. Ngüso ongko abülomting naiuso atsokting nouso shapsanküta henekü wane naiuso lonyappe.

³⁴Ou tsaküh lang nai pai nouso sahhongtsünli, APAOU nou ngüso sahongkü wane, naiuso nung Lebanon pai ameiting nouso loiantsün khekkü noi-e!