Read Khiamniungan Naga Isa 11 Bible Online

Isa 11 - Khiamniungan Naga bible

Isa 11

¹David Nokpaoling nung paitsak sahongkü taiutsün khekkü noin; lüko nung paidong ainou paison thsongsantsün khekkü, nungti nokpao ayan tsak David kau mong ainou sunge.

²Apa khaiuniaso khako nokshingau amontsün naiuso ngetsün APAOU ün Onthso nou apahau mongthat mongsai kiu-e. Apaüh APAOU ün amongchio nou nge-e naiuso apa thaiutha asuhat nou noi-e,

³naiuso apa da angio angtsün nai amongtsam eppe. Apaüh khasinio tsüdekünai alulatsün tü thapkü mikhem tsükiu-e;

⁴apaüh tsosiluhai da ayamtha nai mikhem kiu-e naiuso omhetsünso ayam atha nou kiploukiu-e. Apa ngiokhem ko khaiuniahoi nou angja eppe, naiuso khaiunia tsümeikünso eane.

⁵Apaüh apa khaiuniaso ngiotsüo naiuso ayam tha nai nok-shinge.

⁶Nungai chiu naiuso onnemok nouso aalou nai kamkü kih-e, naiuso khao nouso won athso nousoko aikü kame. Chiu naiuso chongkhaothso nousoko thsan aikü tsamhe-e. Naiuso nungso ta methso ehen nousoüh paotsange.

⁷Jangtso naiuso shap nousoüh thsan aikü tsamhe-e, naiuso jangthso si shapthso nouso aalou nai kamkü khekei-e. Chongkhao nousoüh lüko jang nou hetsün tsokap he-e.

⁸Aliule suntsün pao dongko lom lüko methso tsaktso tsütawai-e.

⁹Goa ün asio king Zion, nai atawaiau tsüdekünai tsümeikü titso tsünoi-e. Khiamnok nou khiam nou miankü noitsünli APAOU ngetsün ange nou goh nou miankü noi-e.

¹⁰David nokpaoling ainou nokpao ayan tsak mele nouso thaiutha athatlu kiuau ajekhaiu tsak shiji. Ngüso apa ün nokpao noknio nai kamshiküta apa hau asuhat kiu-e.

¹¹Tilai nung ajekhaiu nou shi-e APAOU nou apa oukong kankeikü apa khaiuniaso sauhai Asiria nai naiuso Ijip nai, Patros Sudan, Elam, Babilon, Hamat, naiuso khiamnok sai nai noitsün khiamjet goumchi nouso nai poikü taiutsünso meshen goumchi ai laokü yashi-e.

¹²Apaüh Israel naiuso Yihuda khaiuniahoi nouso goumchi aniokun püle ainou pengpunkü noitsün müjam aikü kamshiji ta athat hankü APAOU nou nehan tsak loksane.

¹³Israel hai nok- shing nou Yihuda thako niovei- kiatsün tsünoishi-e naiuso Yihuda nung Israel thako tsaotsün tsünoishi-e.

¹⁴Ngüso aikü kamloukü ajenap nai noitsün Filistiahai kome naiuso ajepek nai kihtsün khaiu- niahoi nouso kamheane. Ngüsoüh Edomhai Moab hai ngüso oukong khemko wane, naiuso Ammonhaiüh ngüso ngio angkü noi-e.

¹⁵Saulünou haiu yankü tsakeiau shiokü hau APAOU nou haiuthsongan chinyatlu poitaiuküta Suez khiamnok apani-e, naiuso Eufrates haiu lo apau jekkü sheitsün ahsheih tsak kankü shi-e.

¹⁶Nungko apoi nouso meshen khaiunia Israel hai thaiutha ngüso Ijip goumchi ainou shikhutsün paosiposo khekkü Asiria ainou yamkheng punkü tsak noi-e.