Read Khiamniungan Naga Isa 13 Bible Online

Isa 13 - Khiamniungan Naga bible

Isa 13

¹Amoz thso Isaiaüh Babilon thaiutha Goa ainou ngiongem shitsün nung noiküla:

²Liupon tsüsamkün kingkhaiu nai ehli nehan tsak shiusane! Abülom noknio bekhan nouso tü po-au ngüso thaiutha ii tsakli apha loksankü süpaihoi nouso tü sang asong nou lüwelut.

³Asio ehli tsak liküta sau- haiko apa mongmatkü noin nungso angja kiuau APAOU nou apaüh monglamtsün naiuso mongsong süpaihoi nouso jonsan.

⁴Mele naiuso nokshing nouso kamshitsün sangh, khaiuniahoi asong tsak sangh-kingkhaiu nai angem nou tü anglu. APAOU süpaihoi nou ehli au khemlouji.

⁵Ngüso goh athon goumchi laiukü ainou shiji. Goumchi athon thathekü lotheanau APAOU apa amongmat nai shiji.

⁶Ajeiat nou thsüokü lüwe! Apem- shiotsün nou alotheanau kankü shitsün ajekhaiu, nungh APAOU ün ajekhaiu simkü noin.

⁷Khaiunia pungkü pha outsükongkü iula-e naiuso khaiunia pungkü mong tsüsongkü iula-e.

⁸Menyiu tsak da methso chet taoko akia sungtsün khekkü, ngüso chikü lekkate naiuso amongkia nou miane. Ngüsoüh tsaküh tsak tü ahat nai thappe, naiuso ngüso khasinio amiam nou mian-e.

⁹APAOU ajekhaiu nou shiji nungh ajekhaiu nou apa amongmat thsüokü sungtsün ajekhaiu noi-e. Goumchi nou aodangkü iula-e, naiuso angei khaiuniahoi apem lomowane.

¹⁰Maou nai kianthsüo nouso naiuso asunyangkü noitsün nousoüh awonkiutsün laowane, apek taoko aje nou nyachingkü sunge, naiuso alei nou awon tsükiu-e.

¹¹APAOU nou ngioji, “Ngo goumchi khako akuothe nou kankü shi-e küta tsümeikün khaiunia chikü ngüso angei shioko angja kiu-e. Abülomhoi pungkü ngo lonyape naiuso amongkan si amongthe nouso pung- kü angja kiu-e.

¹²Chaiou lakkeng nouko naito sauhai aa tsümowankü poikü noin ngüso bao atsaoting noi-e.

¹³Tilai ngo APAOU Apemshiotsün, nou jü amongmat hane nungh ajekhaiu ko nai ngo aün nouso ngaongao-i-e, naiuso goh nou apa athang nou da haiuhaiu-e.

¹⁴“Onnemok hoi ajimtsün tsak tsühakünai pengpuntsün naiuso jinchai nou uokop hoi ainou khuloau pengpuntsün khekkü Babilon nai kihtsün gohmao khaiuniahoi nouso ngüso goumchi yamkü khulükhune.

¹⁵Khaiunia ajantso thalounai chiatkü wane.

¹⁶Ngüso nungti ang- jakü noi taoko, ngüso nionyaothsoso ngüso khako nelangkü tapnekü loate, ngüso tsam jengtsaiu apem kamheane, naiuso ngüso tsammongnyiuso da mongdem ajisiwop chhi-e.”

¹⁷APAOU nou ngioji, “Babilonhai komau, ngo Medehai lothsümonji. Ngüsoüh tangkason thaiutha ti ayang tsünoi naiuso chaiou lakkeng nou ta tsüchinekji.

¹⁸Ngüso uokop chon nou oum khaiuniahoi nouso koppate. Ngüsoüh nionyaothso nouso khako atsüojinyang ti tsühane naiuso methsohoi nou da tsüojinkü tsüyange.

¹⁹Babilon nung nokshing chikü ongko aleng ameiting noin, nung khaiunia nouso nung thaiutha bülomji. Lüko ngo, APAOU nou, Sodom naiuso Gomora tü chhikü shitsünli Babilon lüko lomowane!

²⁰Nungko khaiunia tilaitso tsükih- shi-e. Asaikeitsün Arabhai sauühtso nungko nejenkhio tilaitso tsülahsan shi-e, naiuso onnemok jimhoi nou- soüh nungko onnemok thsan tsam- hekü tsütaiushi-e.

²¹Nungko singtso goh thainian kihtsün naiuso anya- waio nousoüh meshen a-ap shantsün athang tsak noi-e. Nungko ostrik waio nouso kihe, naiuso won nouso nung alotheantsün chiai hamkei-e.

²²Tsamthong nouso naiuso nokpao tsam nouso ai chiu naiuso jih nouso ongtsün sanghlu lu-e. Babilon ün atao shisaokü noin! Apa ajekhaiu nouso yanankü noin.”