Read Khiamniungan Naga Isa 14 Bible Online

Isa 14 - Khiamniungan Naga bible

Isa 14

¹APAOU nou apa Israel khaiuniahoi khako loüh atsüojinyang noishi-e naiuso ngüso apa ün theau chosane. Loüh apaüh ngüso meshen goumchi ai kihlou- ishi-e, naiuso gohmao khaiuniahoi nouso shikü ngüso ongko kiha-e.

²APAOU nou ngüso hau kiutsün goumchi nai laokü shishiau mele piakü nou Israel hai tü hachu-e. Naiuso nungko Israel hai ta mele nousoüh suahoiühli yathsüo-e. Sau- haiüh atao jam Israel thalouwankü noiküla nungso lo Israel haiüh thalowane, naiuso ataojam Israel hai thangmangtsün khako lo Israelhaiüh nokshing shi-e.

³APAOU nou Israel khaiuniahoi hau ngüso angja omhe naiuso ngüso tü chhi achekting chhiau thoitsün ainou aalo nou kiu-e.

⁴Tilai apaüh nung chhi-e, ngüsoüh Babilonhai nokpao tü lochikü ngio-e: “Atsaoting nokpao nou loianiu! Apaüh tilaitso sau tsüthangmang shi-e!

⁵APAOU nou tsümeikün nok- shing nouso oukong sauhaiüh mong- mat lokü khaiuniahoi thangmang;

⁶naiuso ngüsoüh shioloutsün tilaitso alaotsüyangkü noiküla, nungso lotheaniu.

⁷Lo, aphiting nai goumchi athum aalou naiuso nokmei nai noin naiuso khaiunia apem amongling nou jih hangji.

⁸Kupra pai naiuso Lebanon nai cedar pai nouso aloiantsün nokpao khako monglingji, tiautenai loto apa khuwanphe, nungko ngüso sahongau tsaktso tsünoi!

⁹“Eanhai goumchi nou Babilonhai nokpao monglingkü nialoau khemkü noiküla. Goumchi ko sauhai oukongkü noiküla ngüso mia on lothsümonkü noiküla. Nokpao nouso mia on nouso ngüso nokpao noikham ainou tsachukan.

¹⁰Ngüso chikü nou apa tü jonkü ngio, ‘Loto ni lüko sam li outsükongkü noin! Ni lüko sam tsakli iula-iu!

¹¹Ni poipoi matkü jih hang nou lomsankü noiküla, lüko loto ni eanhai goumchi nai noin. Ni wak nou ongai noin naiuso suong nou tsapjeikü noin.’”

¹²Babilonhai nokpao, ah-nge kianthsüo, aün ainou ni titi salikü noin! Ayanan taoko to ni mele nouso shiolokü noiküla, lüko loto ni goh ai saowankü noin.

¹³Ni anokpao noikham kianthsüo nouso khengai atsokting nai taiukü theau aün ai sungau ayang noiküla. Nung ajenapki king nai sübao ko goa nouso kamshiji nung kingkhaiu nai nokpao tsak khekkü moknoiau ayang noiküla.

¹⁴Thengmia atsokting nouso chiai sungküta Apemshiotsün khekkü theau ngio.

¹⁵Lüko nung- likoto, ni eanhai goumchi akheiting lo-ianiu.

¹⁶Eanhaiüh ni ta thsüokü kongkü langlutkü thape. Ngüsoüh sangkü ngio, “Goumchi lemlem-itsün naiuso nokshing nouso ngaongao-itsün nung khaiunia nouso?

¹⁷Noknio nouso lotheantsün naiuso goumchi nou singtso goh au phokleantsün nung khaiunia nouso?” Meshen akhothio- hoi tilaitso tsüsokthamtsün naiuso tsamai tsühongtsün nung khaiunia nouso?

¹⁸Goumchi nokpaohoi nouso chikü ngüso ajinka etam nai saikü noin.

¹⁹Lüko athaiutha to etam tsünoi, naiuso amia to choikü khuwanau yakkane. Nung ehli nai loatantsün süpaihoi mea nousoüh nyingjeikü lungphat nai ngüso yakthio-e; küta ngüso tü ngamkei-e.

²⁰Tiautenai ni agoumchi lotheküta akhaiuniaso loatkü wanphe, nito amao nokpaohoi khantsün khekkü to tsükhane. Tsümeikü chhitsün kau tsaktso tsükankeishi-e.

²¹Achaoatau lütsalo! Ngüso paosiposo angei shioko nung nokpao ün melothso nouso eane. Ngüsoüh tilaitso goum- chi nai nokshing tsüdekünai noknio nouso tsüthamiane.

²²APAOU Apemshiotsün nou ngioji. “Ngo Babilon kome naiuso lotheane. Ngo titso tsüpoi-e, methsohai lüko aa tsüpoi-e ta ngo, APAOU nou ngiowaniu.

²³Ngo Babilon nung shechei tsak hau iula-i-e, naiuso nungko anya waio nouso kih-e. Ngo Babilon thako tsamshiukin nou shio- küta alum shiowane; ta ngo APAOU Apemshiotsün, nou ngiowaniu.”

²⁴APAOU Apemshiotsün nou ngiomongshing tsak ngiom: “Ngo ti chhiau thatsaniu nung thawaoaulu. Ngo ti chhiau mongchiosaniu nung chhikü haulu noin.

²⁵Ngo jü goumchi Israel nai Asiriahai lomowane küta jü kingchiai ngüso da ngamkei-e. Ngo jü khaiuniaso Asiriahai khe ainou sokke naiuso ngüsoüh kanau noitsün thsale ainou sokke.

²⁶Goumchi athum thaiutha nung ngü chhiau mongchiosantsün jü ayangtaiu noin, naiuso jü pha mele nouso khako angja kiuau loksankü noin.”

²⁷Tiautenai APAOU Apemshiotsün nou nung chhiau mongchiosankü noin; angja kiuau apaüh apa pha loksaniu, naiuso nung sauüh loyangau tsüshio.

²⁸Nung ngiongem Ahaz Nokpao eantsün ponko punglutkü noiküla.

²⁹Filistiahai, asam tü shiuhtsün pailai nou longekkaniu, lüko nungko asam monglingau ti ayam tsünoi. Tilai pao tsak eanji, nung thangko nung tü phopkü jekü tsak shishiji. Paoli tsak ko ajeikeitsün dragon tsak chosanji.

³⁰APAOU nou apa ün tsosilu khaiunia tü jimtsün tsak noi-e, naiuso ngüso aalou nai noi-e. Lüko apaüh asam Filistia hai dongai naiusile athsüoting tsak honge, naiuso nungüh asam aa tsaktso tsütaiu-e.

³¹Asam Filistiahai noknio nouso chikü lüshap naiuso ahachu thaiutha lüwe! Asam chikü lekkatkü lünoi! Ajenapki ainou pukhao thengmia tsak shiji-nung amonghen tsüsunkün süpaihoi tsak noin.

³²Filistia ainou sam dongai ngiongem kankü shitsün tü samüh ti thala-e? Samüh ngüso hau APAOU nou Zion sheitho naiuso apa khaiuniahoi omhetsünsoüh nungko aalo nou eppe ta chiteau noin.