Read Khiamniungan Naga Isa 16 Bible Online

Isa 16 - Khiamniungan Naga bible

Isa 16

¹Sila noknio ainou liutsa nai Yirusalemai sauüh nokshing- kü noiküla apa hau Moab haiüh wonthso tsak paopei hong.

²Ngüsoüh Arnon Haiusai nai taiu, nungko ngüso liuwaio nouso a-ap ainou kumpengtsün taoko ayangtsünoikü asong asao ta pengkeitsünli noiküla.

³Ngüsoüh Yihuda khaiuniahoi tü ngioji, “Ti chhi-e nung sam hau achite. Anyiwem ajejek taoko pai tsaküh ahkhemsoh dangsepkü soloutsün khekkü sam asolou, naiuso samüh ni nou ahkhemsoh nouko aalou-e. Sam asolouau khukeitsünso noin; sauüh epsanau tsüshiokü ni sam asolou.

⁴Sam agoumchi ko anoi-i. Sauhaiüh sam lomoau aiuji ngüso ainou sam akipsan.” (Athangmangtsün si alotheantsün nung alao yange, naiuso shingkhan lotheantsünso khuwane.

⁵Nungai David ün thsaosithsoso ongko tsak nokpao the-e, naiuso apaüh among- kiu si atsüojin nouko khaiuniahoi khako nok-shinge. Ayam atha nou chhiau apa khaolaokü noi-e, naiuso apaüh ngiotsüo nou chhisankü eppe.)

⁶Yihuda khaiuniahoi nousoüh ngioji, “Moab khaiuniahoi nouso titi bülomji nung samüh lula-iu. Ngüso abülom si amekoi samüh ngeji, lüko ngüsoüh bülom mekoikü yangtsün nung akeng noin.”

⁷Tiautenai Moabhai angja nou ngüso omhekü shape. Kirtheres noknio nai ngüsoüh chihsikhiam amei heshiutsün tilai yangsane ngüso chikü shape. Ngüso ayang tsünoikünai komane.

⁸Hesbon simkü noitsün eiu naiuso Sibmahai sainao- shep eiu nouso lotheaniu- nung sainaoshep theng nou mele nouso nokpaohoi tukkati. Ataojam nung sainaoshep nouso Jazer noknio saokü pengpunkü noiküla, naiuso ajenap nai liutsa saokü naiuso ajenap nai E-e khiamnok etsai saokü noiküla.

⁹Lo ngo Jazer thaiutha shaptsünli, Sibmahai sainaoshep nouso thaiutha shapji. Jü niochekhiam Hesbon si Elealeh thaiutha saoji, tiautenai khaiuniahoi nou monglingiau nung- ko be-eiuyam nou tsüyam.

¹⁰Loto tsamei goh nai sautso amongling tsünoi, sainaoshep eiu nai tsaktso tsüweshi tsüdekünai jih tsühangshi. Theng shanau sainaoshep nouso da sauüh tsüngamshi; amongling sangh asong nou wetsün laolouwaniu.

¹¹Ngo Moab thaiutha mongkiakü ngetji, naiuso Kir Heres thaiutha mongjuoji.

¹²Moab hai ngüso amkham tsam noitsün king nai tanatkü misaoau songh lüko, nungüh ngüso thaiutha ti amei tsüchhikiu-e.

¹³Moab thaiutha aya nai APAOU nou kiutsün ngiongem nung noin.

¹⁴Naiuso lo APAOU nou ngioji, “Pon süme tongtü nou mongko Moab ün memei jengtsaiu khemane. Khaiunia apiating nou ongko, thsaothsaokü lu asane; naiuso ngüso outsükongkü noi-e.”