Read Khiamniungan Naga Isa 19 Bible Online

Isa 19 - Khiamniungan Naga bible

Isa 19

¹Ijip thaiutha ngiongem nung noin: APAOU nou thengmia akhaolaoting tsak chiai noikü Ijip dongai shiji. Ijip hai sotsom goa nouso apa khako ngaongaoji, naiuso Ijip hai ngüso mongsong mowaniu.

²APAOU nou ngioji, “Ngo Ijip nai ehli tsak losane naiuso nung deisinio si deisinio jetko naiuso phaosipo si phaosipo so jetko li-e. Akhengshi nok- nio nousolu li-e-i-e, naiuso akhengshi nokpao nouso si akhengshi nokpao nouso oukong nou ta juo-e-e.

³Ngo Ijip hai ayangtaiu nouso tsü- thawao-i-e naiuso ngüso amongchio oukong tsünoikü iula-i-e. Ngüsoüh ahachu au thaiutha ngüso sotsom goa tü sange, naiuso ngüsoüh meamean khutsünso naiuso eanhai mia on nouso da ayamhan nou sang-e.

⁴Ngo Ijip hai mongthe tsak hau lethiowane, nung ngüso khako nokshingau noitsün nokpao mongthe tsak hau kiuwane. Nung ngo Apem- shiotsün APAOU nou ngiowaniu.”

⁵Nail haiu apkü shiane, naiuso nung haiumong yamlukü waikükhu- wane.

⁶Haiuthsongan nouso apkü shiantsün taoko achoi nyame. Honde naiuso sang nouso seiane,

⁷naiuso Nail haiusai nai shiutsün chihsam khiamsam nouso wonane küta shipkü khuwane.

⁸Nail haiumong nai ngouphek chenhekü kihtsünso pungkü ngetkü shape; tiautenai ngüsoüh ngou taison si nyao nouso chhi tsünoishi-e.

⁹Ne amatchai lahtsünso ayang tsünoishikü iula-e,

¹⁰nelatsünso naiuso waimonhoi nou mong lothekü monghene.

¹¹Zoan hai noknio aheihoi thatü mainga noin! Ijip hai mongsai pungtsünsoüh a-aiu ayamhan kiuji! Ngüso akeng angehoi naiuso nokpao- hoi lilutsün nou ta titi nokpao nou tü ngiosomji?

¹²Ijiphai Nokpao, ni nou mongyang amei yamhantsünso tiai noin? Tsüngean, APAOU Apemshiotsün nou Ijip thaiutha ti chhiau mong- chiosankü noin, nung chitekütso-ela.

¹³Zoan si Memfis hai aheihoi nouso mainga noin. Ngüsoüh mele nou khaai nialükhunau noiküla, lüko ngüsoüh ayam tsüthakünai niaji.

¹⁴APAOU nou ngüso hau ayam pülaikü hanau kium. Naiuso thengtuk khaiunia tsak meshenüh phusan taiutsün chiko khiaantsünli, Ijip haiüh tsüthakün naiuso tsümeikün chhiji.

¹⁵Memei tsüdekünai tsosilu, atenghoi tsüde- künai tsüngesanhakünso sauüh Ijip thaiutha ahachu kiuau tsüshio.

¹⁶Ijip hai, menyiuhoi mongli henkü iulaau atao tsak shiji. Tilai ngüsoüh APAOU Apemshiotsün nou ngüso hao angja kiuao pha loksankü noitsün eppe, ngüso ahat nai ngaongao-e.

¹⁷APAOU Apemshiotsün nou ngüso thaiutha akuo khemtaiu nou yangsantsün atao pungkü Ijip khaiunia nouso Yihuda hai lon lekkatkü noi-e.

¹⁸Tilai nung atao nou shi-e, Ijip hai noknio pungo nousoko Ibri ngio ai chite-e. Nungko noitsün khaiuniahoi nousoüh APAOU Apemshiotsün nianko ngiomongshinge lou-e. Nung noknio nouso mongko noknio tsak tü, “Aje noknio” ta jone.

¹⁹Tilai nung atao shi-e, Ijip goumchi ko APAOU thaiutha amthang tsak shane, naiuso Ijip hai elung nai APAOU hau losiokü taiutsün lung kheam tsak taiu-e.

²⁰Nungso Ijip nai APAOU Apemshiotsün hakü noitsün thaiutha alat noi-e. Tilai athang- mang nai noitsün khaiunia nousoüh APAOU nou tü ahachu thaiutha jone, apaüh khaiunia ajantso ngüso kipsanau honge.

²¹APAOU nou Ijip hai dongai tsangsheikü sunge, nungai ngüsoüh mitha kiukü apa amkhame, naiuso apa dongai aloat chaithio naiuso chaithio nouso kankü shi-e. Ngüsoüh apa tü athalou mongkü shane, küta ngüsoüh thaloutsün chhi-e.

²²APAOU nou Ijip hai hau angja kiu-e, lüko nungphiai apaüh ngüso lomeikiu-e. Ngüso apa dongai phoklekü shi-e, küta apaüh ngüso misao thala-e, naiuso ngüso lomeikiu-e.

²³Tilai nung atao shi-e, Ijip naiuso Asiria goumchi jetko yam apunting yamkü noi-e. Nung goumchi nime nou khaiuniahoi nouso ngüso si ngüso jetko akhu ashi ta tsakei-ao shio-e, naiuso nung mele nime nou aikü kamkü amkhame.

²⁴Tilai nung atao shi-e, Israelüh Ijip naiuso Asiria neko jipe-e, küta nung mele süme nouso goumchi chikü thaiutha ouk kiutsün tsak noi-e.

²⁵APAOU Akhengting nou ngüso ouk kiukü ngio-e, “Jü khaiunia Ijip, ngo ni ouk kiu-e, naiuso jü phaüh shantsün Asiria, naiuso ni Israel, jü achosan khaiuniahoi nouso noin.”