Read Khiamniungan Naga Isa 21 Bible Online

Isa 21 - Khiamniungan Naga bible

Isa 21

¹Nung Babilon thaiutha ngiongem. Ahsheih athsüoting tsak liutsa nou yankü sheikü khutsünli, akuothe nou alekkatitsün goumchi tsak ainou shi-e.

²Ngü atsangshei thatü tsaokü tsak epkü noiküla; nungh asapthio-etsün naiuso alotheantsün atsangshei tsak noiküla. Elam hai süpaihoiso, asamüh lükom, Midia hai süpaihoiso, noknio nouso thumkü lüthalouwan! Babilon haiüh sübao omhe losankü noiküla, nung Goa nou lothonkü wan-e.

³Atsangshei nouko ngo ti ep naiuso lula nungüh ngü alekkat naiuso akia nou mian, nung akia menyiuhai methso chet taoko kiatsün tsak khekkü noiküla.

⁴Jükhaiu kiaji, naiuso ngo ahat nou ngaongaoji. Ngo ahsham nou shi-iau thaiutha mongchetkü noiküla, lüko nungüh alekkat kankü shiji.

⁵Nung atsangshei nouko hoithso kam asong tsak khemsan; nungko mesan hai noiau thaiutha sheam nou sabeng. Nungko ngüsoüh hekü naiuso shiukü noiküla. Nungko alekta ngiokhem athoilut ngem sang tsak nou ngiom, “Asonghoi nouso! Asamüh asam shikhao lükhemlou!”

⁶Nungaih APAOU nou ngü tü ngiom, “Lükhu, küta ehü tsak lütaiu, naiuso apaüh ti epji nung achite ta apa tü lüngio.

⁷Apaüh khaiuniahoi nouso mokthso ngamtha nai nime me moknoikü, naiuso khaiuniahoi nouso gado naiuso ut nouso chiai moknoikü epnaito, apaüh ngüso tü paotsangkü thapthioau noin.”

⁸Ehü nou wekü ngiom, “Asonghai, ngo jü ehü pothang nai ehükü asoh naiuso anyih ta tsakü shin.”

⁹Alekta, khaiuniahoi nouso mokthso chiai khaiunia nime me moknoikü, nungko ngüso shiji! ehü nou ngiongem nou kiuji, “Babilon loianiu! Ngüsoüh amkhamtsün sotsom nouso gohje ai yakpengkü noin.”

¹⁰Jü khaiunia Israel asam whettso khekkü thaonekü noiküla, lüko lo Israel hai Goa, APAOU Apemshiotsün ainou ngo lulakü shitsün ngem amei asam tü welutji.

¹¹Edom thaiutha ngiongem tsak nung noin. “Edom ainou ajantsoüh ngütü asoh nou titi liukü yanlükhune? Nung titi liukü thone ngü hau achite.”

¹²Ehü khaiunia nou thalakü ngiom, “ahom nou shiji, lüko loüh asoh nou shishi-e. Ni loüh sangshiau aiu naito, laokü shiküta asangshi.”

¹³Arabia thaiutha ngiongem tsak nou nung noin: Asam Dedan khaiuniahoi, Arabiahai lon goumchi nai asaothang shankü hoihoita tsakeitsünso,

¹⁴asam dongai lekü shitsün khaiu- niahoi hau khiam lüshen. Asam Temahai goh nai noitsün khaiuniaso, asolotsünso hau eheshiu lükiu.

¹⁵Khaiuniahoi nouso ngüso loatau khemloukü noitsün sah ainou ngü- sotü kopau khemkü noitsün uokop- chon ainou, naiuso ehli nai atawaiau noitsün chikü ainou thakhuao khulükhunanji.

¹⁶Nungai APAOU nou ngü tü ngiom, “Kedar mele ün oukong nou pon tsak tongtü mongko athonan yange.

¹⁷Kedar khaiuniahoi nung uokop khaiuniahoi mongsongting noin; lüko ngüso ongko thsaokülu poi-e; ta Ngo, APAOU Israelhai Goa nou ngiowaniu.”