Read Khiamniungan Naga Isa 22 Bible Online

Isa 22 - Khiamniungan Naga bible

Isa 22

¹Atsangshei Tsamei thaiutha ngiongem tsak nou nung noin. Ti thawaoji? Noknio nai noitsün khaiuniahoi chikü nou tsamkhaiu chinai sungkü ti sümai saoheji?

²Noknio athum pülaikü sangngem nou naiuso amongling akoisilum nou miankü noin. Akhaiuniaso sauhai ean ehli nungso taoko eantsün nou tsüde.

³Akhaiunia ahei nouso chikü ngü- soüh uokopchon tsaktso mokopkün khako khulükhunan naiuso thalouwankü noiküla.

⁴Jü khaiunia sauhai eaniu nungso chikü thaiutha thsüokü shapau lo ngü pemsa awanan. Ngü lodangau lakowe.

⁵Atsangshei Tsamei nouko alekkat, tsüshioloutsün, naiuso apülai tsak nou nung noin, naiuso nung akhengting APAOU Apemshiotsün nou sam khako hongkü noin. Sam noknio pe nouso nelangkü nyomaniu, naiuso king nouso ai ahaloau wetsün sangh alangtha nouso lushiji.

⁶Elamhai goumchi ainou süpaihoi nouso uokop pai si chon nouso kankü mokthso chiai moknoikü shiji. Kiv hai goumchi ainou süpaihoi nousoüh ngüso shikhao khemloukü noin.

⁷Yihudahai eiu tsamei goh nouso mokthso nou kankeitsün tsamkei nou mian; süpaihoi nouso Yirusalem bekhan khako mokthso chiai tsakü noin.

⁸Yihudaüh asolouau shan- taiutsün pe nouso apaüh sonan. Tilai nung thawao, asamüh dun taiutsam ainou dun nouso loshih.

⁹Nungai asamüh Yirusalem pe nouso tilüsong athang ko lomeishiau noin nungso epsan. Asamüh Yirusalem nai tsamkhaiu chikü sailu naiuso noknio pe shanshiau lung ajantso sonpeng.

¹¹Asamüh noknio pemongai khiam kamtaiuao temkhao tsak lülahsan, nungüh temkhao akeng ainou khiam tsütsangthio-ikü kiap lüko nung chikü thawaoau atao piamkü naita sauüh yangkü noiküla, lüko nung shantsün Goa tü asamüh mongtsükiu.

¹²Akhengting APAOU Apemshio- tsün nou asam shapkü, mongsaiuau, asam khaiu khaiusoi iuwanküta nethe tenloukü the au asam ta jonji.

¹³Nungliko, asam nyaihe naiuso sümaihekü noiküla. Asamüh eheau onnemok naiuso jang loat, naiuso theng nou shiu. Asamüh ngiom, “Samüh heko naiuso shiuko, tiautenai lühom to sam eane!”

¹⁴Akhengting APAOU Apemshio- tsün ngü ko chitekü ngiom, “Ngüso aakihlaiu chikü ngüso hau nung angei tilaitso tsüwankiu-e; ta ngo, Akhengting APAOU Apemshiotsün nou ngiowaniu.”

¹⁵Akhengting APAOU Apemshio- tsün nou ngü nokpao tsam nai chhitsünso khako ahei nou Shebna dongai khukü apa tü nungti lüngio ta ngiom,

¹⁶“Ni sau ta ni yangji? Lungkap king ainou apem thaiutha etam khan tsak langsatkü taiuau ni ti ayam thakü noin?

¹⁷Ni ateng khaiunia tsak lüko noi-e, lüko APAOU nou ni junlouküta yakkane.

¹⁸Apaüh ni tsaitsai khekkü thalou-e küta goumchi asong tsak ai yakkane. Ni nungai ni bülomtsün mokthso nou kankeitsün tsamkei nouso dongko eane. Ni atsampao tsammongso ko amiam tsak noin.

¹⁹APAOU nou ni achhikamthang ainou wane, naiuso anoikham atsok ainou lonyapkü taiu-e.”

²⁰APAOU nou Shebna tü ngiom, “Tilai nung thawao-e, ngo jü ayathsüotsün thaiutha Hilkia thso Eliakim jone.

²¹Naiuso ngo aneshe sheitho si omkhi apa hau thokiu-e naiuso ni taiukü shitsün oukong chikü apa hau kiu-e. Apa Yirusalem si Yihuda hai khaiunia thaiutha po tsak khekkü noi-e.

²²David thsaosithsoso, nokpao khemko ngo apa hau oukong chikü kiu-e. Apaüh chhikamthang sopau si kiapau oukong taiu-e ti apaüh sopji sauüh kiapau tsüshio-e, naiuso ti apaüh kiapji, sauüh sopau tsüshio-e.

²³Mongkü noitsün thangko ngo apa kheam tsak khekkü mongkü lathiokü taiu-e, naiuso apa tsammong athum thaiutha apa asuhat nyimsantsün tsak iula-e.

²⁴“Lüko apa tsammongso si apa tü nioluttsünso chikü nung apa thaiutha thsale tsak iula-e. Ngüso thaiutha apa chiusilak phanluttaiu- tsün kheam tsak khekkü noi-e?

²⁵Tilai nung thawao-e, nungh mongkü lahlut taiutsün kheam nou liakliake naiuso saliane. Naiuso nung da phanlut taiutsün alum thaiutha nung athonan noi-e,” ta APAOU nou ngiowaniu.