Read Khiamniungan Naga Isa 24 Bible Online

Isa 24 - Khiamniungan Naga bible

Isa 24

¹APAOU nou goumchi lokenge naiuso nung thathekü leane. Apaüh gohkha nou phokle-e küta nung chiko kihtsün khaiuniahoi apemai pengpunkü khu-i-e.

²Meson nouso naiuso hoi nouso sua nouso naiuso APAOU nouso, atuhtsünso si ajantsünso, alaiukiutsünso naiuso alaiuloutsünso memei naiuso tsosiluhoi pungkü nou akuo wekülu phete-e.

³Goumchi nou nyomkü lotheane ta APAOU nou ngiowaniu naiuso nung chhikü haulu noin.

⁴Goumchi nou wailaji naiuso sheianji, goumchi athum outükongkü iula, nungko goh naiuso maou nemtso phoi-an.

⁵Goa ün ngiokhem nouso lotheantsün tsangkü naiuso asaita thaiutha apaüh shantsün athalue ngiokhem phiowantsün tsangkü khaiunia nou goumchi lochinyan.

⁶Nungtiphe Goa nou goumchi khako athesan nou welutiu. Nung khaiunia nousoüh ngüso chhi mai epji; athsao tülu thsaothsaokü aa poitaium.

⁷Sainaoshep nouso wonanji naiuso theng nou thsaokü shi-anji. Khaiunia pungkü sauhai ataojam monglingkü noiküla, nungso lo amongmat nai noin.

⁸Naiuso amongling poipoi jihang naiuso paidan pattsün nung laowaniu.

⁹Theng khako loto amongling jihang tsünoishi, loto nung anyia nou da tsaktso tsümonglingshi.

¹⁰Noknio nai alum apülai noin, naiuso khaiu- niahoi nou kipsankü noiau meshen tsam kiapjeikü noianji.

¹¹Theng tsünoishikün shioko khaiuniahoi nou sonkeng nai sangh asong nou weji. Athontsüyang thaiutha amongling mowaniu; nung goumchi ainou honganiu.

¹²Noknio nou alothe nai noin, naiuso nung noknio bekhan nouso nyomthiowankü noin.

¹³Goumchi apemai mele pungkü nai nung thawaoau noin. Tilai Olip shep aou pungkü ainou thio-iji naiuso sainaoshep aphiteng nou sainaoshep auo ainou panloji nung be-eiuyam athonting khekkü noi-e.

¹⁴Sauhai jahsankü noin ngüsoüh amongling jih hange. Ajenap nai noinsoüh APAOU titi asong nung chite-e,

¹⁵naiuso ajepek nai noinsoüh apa lomsane. Khiamnok sai nai kihtsün khaiuniahoi nou Israel hai Goa APAOU nou lomsane.

¹⁶Laiukü jetekü noitsün goumchi athang nouso ainou samüh asio mele Israel hai lomsantsün jih hang sangh nou lula-e. Lüko nungko jü thaiuthato ayang ti tsünoi! Ngo paiulishi-anji! Ngio- tsüo janhetsünso tsülaokü sapthio- iji, naiuso ngüso akausai-etsün nung tekkü tsümei tsümeikü iulaji.

¹⁷Khaiunia pungkü nou ngü tü anglu! Nungko alekkat, khanthop, naiuso jin nousoüh ni tü taiuji.

¹⁸Sau alekkat ainou thakhuau kowe-e, apa khantop nai sathio-e, naiuso sauüh khanthop ainou thakhuau kowe-e, apa jin nouko mone. Maou ainou ah-uo nou kongkü uo-e, naiuso goh athanya nouso haiuhaiu-e.

¹⁹Goumchi nou ngiapekkü pai-e naiuso chipekkü sopsate.

²⁰Goh nou thengtuk khaiunia tsak khekkü ngaongao-e naiuso a-ou asheih taoko tsamthso tsakli haiuhaiu-e. Goumchi nou angei nou shioko lethsange; nung loiane küta tilaitso tsütsashi-e.

²¹Khütha oukong nouso naiuso goumchi nokpao nouso angja kiuau APAOU nou atao tsak kankü shiji.

²²Goa nou nokpao nouso khantop tsak nai akhothiohoi khekkü kamshikü taiu-e. Ngüso hau angja kiuau atao moshikün lektso apaüh ngüso akhotsam nai kiapjeikü wane.

²³Alei nou nyakheme, naiuso aje nou awon tsükiushi-e, tititenai APAOU Apemshiotsün nung nokpao noi-e. Apaüh Zion king Yirusalem nai nok-shinge, naiuso khaiunia aheihoi nousoüh apa ajinka eppe.