Read Khiamniungan Naga Isa 26 Bible Online

Isa 26 - Khiamniungan Naga bible

Isa 26

¹Tilai khaiuniahoi nousoüh Yihuda goumchi nai nung jih hange, nungh ajekhaiu tsak shiji. Sam noknio mongkü noin! Goa apa pemüh nung pe nouso jimji!

²Noknio bekhan nouso asopan küta sau mele khaiuniaüh ayam thakü chhiji nungh amongkiutsün mele anapi.

³Sauhaiüh meshen ayangtaiu mongkü taiuji naiuso amonglam ni da niolutji, ngüso hau APAOU ni tongtü saiukü aalou kiuji.

⁴APAOU nou da asai amonglam lütaiu, tiautenai apaüh sam asaita jimji.

⁵Sauhai bülomkü noiküla apaüh ngüso lonyapkiu; apaüh ngüso kihtsün noknio akongting nou lomokiu, küta nung pe nouso pukhaoli iulakü sutnekü wan.

⁶Sauhai thangmangkü noiküla, lo ngüso nung chiai tsakeikü ngüso hok nou nung da ngamkeiji.

⁷APAOU, ni khaiunia amei nouso thaiutha yam nyincheikü shanji, ngüso tsakeitsün yam nung su-aikü noin.

⁸Samüh ni mongchio nai hoilutji, naiuso sam ayang ni da taiuji, sam mongchiotsün apem nung ni noin.

⁹Asoh taoko jü mong apem nou ni da yangji; tilai ni goumchi naiuso nungko noitsün khaiuniahoi mi kheme, ngüsoüh ngiotsüo nou ti in nung apem ngela-e.

¹⁰Ni akausai khaiunia nouso hau atsüojinyang han lüko, ngüsoüh ayam atha nou chhiau tilaitso tsüngelouji. Nung asio khaiuniahoi goumchi nai lüko ngüsoüh tsüthakün ngelaji; ngüsoüh ni asong nou ngesanau tsüaiu.

¹¹A-ehsoüh ni ngüso lohatau noitsün tsünge. APAOU, ngüso miamsimokü lütaiu, naiuso ngüso omhekü lünoi-i; ni khemkü taiutsün angja nouko ngüso omhekü lünoi-e. Ni akhaiuniaso tititso tsüojinji nung ngüso hau lühan.

¹²Ni sam hau atsüomei nou kiu-e, APAOU samüh chhisantsün alum nung ni ti chhiji nung eiu noin.

¹³APAOU sam Goa, sam tü amaohai tsangkü nokshingkü shin, lüko nilu sam APAOU noin.

¹⁴Lo ngüso eankü noin naiuso loüh ahkü tsüshishi-e; ngüso mea on tsüchushi-e, tititenai ni ngüso hau angja kiu naiuso ngüso lothekiu. Khaiunia sauüh loto ngüso tsüyangsanshi.

¹⁵APAOU, ni sam mele shingkü khu-in, aniokun pungkü nai elung nouso losongkiu, naiuso nung tsangkü ni hau asuhattsün kankü shin.

¹⁶APAOU, ni akhaiuniso tü thut, naiuso amongmat nai ngüsoüh ni tü misao saokü noiküla.

¹⁷Menyiu tsaküh methso chet taoko akiasung nou wetsünli, APAOU, ni sam hau we-in.

¹⁸Sam kiakü naiuso thsüokü kiakü noiküla, lüko samüh titso tsüchetkiu. Samüh sam goumchi thaiutha ti shioloukü tsünoi; samüh titso tsüchhisan.

¹⁹Sam khaiuniaso sauhai eankü noin ngüso müjam ahkü shishi-e. Etam khan nai saikü noinso chikü chushi-e naiuso amongling jih hange. Khiamle ehenthso saotsün nou goh thapenji, nungti APAOU nou laiukü naita eankü noitsünso lo aashi-e.

²⁰Jü khaiuniaso, asam tsamai lükhu, küta asam phiai kou nou lükiaplouwan. Goa amongmat moyanlükhunkün lektso thaiutha asam pamkü anoi.

²¹Goumchi khaiuniahoi hau ngüso angei thaiutha angja kiuau aün anoithang ainou APAOU shiji. Goumchi ko akau ai loatkü wantsünso achiai sunge, naiuso sauhai loatkü noin nungso loto goh nou tsütsangshi-e.