Read Khiamniungan Naga Isa 28 Bible Online

Isa 28 - Khiamniungan Naga bible

Isa 28

¹Israel hai nokshing inyate! Apa ajinka thengtuk aheihoi nouso khaiu ai taopun nou shantsün nokpao kandio shei-antsün khekkü noin. Ngüso abülom ahei nouso angan meikü nyamji, lüko ngüso nungko tukkatkü saiji.

²APAOU nou ngüso tü pha puo au akonghoi naiuso oukongting nouso khemkü noin, ngüso san saotsün khekkü shi-e, ah-the tsak khekkü shi-e, liukü shitsün tsak khekkü, khiamlim khengthiokü, nung goumchi meikü thapukkü shi-e.

³Nung thengtuk aheihoi abülom nouso hokkhem nai ngamkei-e.

⁴Nungso abülom aheihoi ajinka shei-antsün nung latshep ayating eiukü semkü panheantsün naiuso tsüepshikü molüshi-antsün khekkü noi-e.

⁵Tilai APAOU Apemshiotsün nung apa khaiuniaso sauhai poikü noin nungso thaiutha taopon ajinka nokpao kandio tsak khekkü noi-e nung ajekhaiu tsak nou shiji.

⁶Apaüh mikhemli yathsüotsünso au ngiotsüo mongyang tsak kiu-e, naiuso sauhaiüh noknio bekhan nouso tü ehoi hau tsükomheani-ao jimkü noiküla, ngüso hau mongnyan nou kium.

⁷E-po nouso si meson nouso lüko theng nou thatü tukkat nou shioko ngüso ngaongaokü tsakeiji. Ngüsoüh theng naiuso atuktsün jim thatü shiuphe ngüso tsakei nai amongnya nou khia-anji. Goa nou hongtsün atsangshei ngelaau e-po nouso theng nou thatü tukkat, naiuso mi kankü shitsün janthat kiuau tsüshiokü meson nouso theng nou thatü tukkat.

⁸Ngüso kamtsün po nou aphusan nou mian, naiuso nungko athang yanthsüokü titso tsüpoitaiu.

⁹Ngüso jü thako namnam. Ngüsoüh ngioji, “Nung khaiunia nou apaüh tsandetsün sau ta yangji? Apa ngiongem sauüh pokü noin? Nungto loting nionyaothso nousoüh nyao leantsünso thaiuthalu pokü noin!

¹⁰Apaüh sam hau thsamsat tsak ainou thsamsat tsak, ahoi tsak ainou ahoi tsak, naiuso ngioyak tsak ainou ngioyak tsak tsandeau koweji.”

¹¹Ni ngü tü tsüanglukü naito, Goa nou asam tü ngioyak tsak tsandeau gohmaohai ngiochitetsün tsak kankei-e.

¹²Apaüh sam chikü hau aalo naiuso atsüomei nou kium, lüko asamüh apatü angau tsümongchio.

¹³Nungshioko APAOU nou asam tü thsamsat tsak ainou thamsat tsak, ahoi tsak ainou ahoi tsak, naiuso ngioyak tsak ainou ngioyak tsak tsande-e. Nungai asam hokngam pungküko asam khia-ane. Asam tawai-e, jin nai mone, naiuso sua au thaloukü khuwane.

¹⁴Lo Yirusalem nai hoi khako nokshing shingtsün asam alochitsün khaiunia nouso, APAOU nou ti ngioji anglu.

¹⁵Tititenai asamüh bülomkü ngiom, E nouko samüh ngiomong shinge tsak shaniu, naiuso eanhai goumchi nouko athalou-e tsak noi-iu. Tilai akuothe shi-e nungai asam poisane ta asam amonglam noin, tiautenai asam kipsankü taiuau asamüh yaang ngio nouso naiuso akaosai nou da amonglam noin.

¹⁶Nungti lo Akhengting APAOU nou ngioji, “Ngo Zion nai athanya kongkü naiuso mongkü shantaiuji. Nungko ngo aniokun kheam tsak mongkü kihkü taiu, naiuso nung lung nou chiai nung ngio nouso satkü noiküla, ‘Amonglam mongkü noitsün ajeilu lüko noin.’

¹⁷Nung athanya thaiutha athatlutsün auo nou ngiotsüo, naiuso auoke nou asio noin.” Sanlung nousoüh ni nioluttsün ngiotsüo tsüdekünai chikü kütlokü khuwane, naiuso khiamthe nou ni solutsün lotheane.

¹⁸Eh nouko asamüh ngiomongshing shantsün nung lomowane, naiuso ean goumchi nouko ni thalou-e taiutsün nung moisemkü lomowane. Tilai akuothe nou kutlokü khu-e nungüh ni shiolouwane.

¹⁹Nungüh ni tü ahom tsütokü loüh loüh ta shiuh-e. Asamüh nung asoh si anyi tsütokü jeilouau noin. Goa ainou ngiongem ayan pungkü nou asam dongai alekkat ayan kankü shi-e!

²⁰Nungko ni ngiopung ngiothi thsam nai ngiotsün khaiunia tsak khekkü noi-e. Khaiunia sau then tsak ko asai-au koweji lüko saiau then nou thatü letkü, nemut ne nou tenpokau tsüshiokü nemut ne nou thatü letletkü.

²¹Apa chhi thatü athanga lüko, apaüh chhi-au noitsün chhisanau Apaüh Perazim king naiuso Gibeon tsamei nai chhitsünli, APAOU nou eh nou li-e. Apaüh anga- wantsün chhi thumkü chhikheme.

²²Ngo asam hau kiutsün alohat nou tü asam lanyailut! Asam nyailut naito, asam thaiutha akhulouau loüh tekkü achek noi-e. Nung goumchi athum lotheanau APAOU Apemshio- tsün nou yangtaiutsün ngo lula-iu.

²³Ngo ti ngioji nungtü anglu; ngo asam hau ti chiteji nungtü mong akiu.

²⁴Eiu ah khaiunia sautso asaita eiu khutpekkülu tsünoi naiuso lelu lüko asaita shiulutkü tsünoiji.

²⁵Apaüh le lethio au goh nou khemtaiuküta, chiuthe si nyiam le nouso shiuthioji; küta eiuthon nai amao lelu nouso shiuthioji.

²⁶Apaüh ti chhi-e nung apaüh ngeji, tiautenai Goa nou apa hau tsandekü noin.

²⁷Apaüh chiuthe si nyiam nyasanau athiokai kongkü tsükankeiji, nungliko apaüh kai aluhek omtsü kankeiji.

²⁸Apaüh whettso tü thanyomkülu theau tsünyaji, lüko awoi nou tsülothekü nyasanau titi chhi-e nung ngeji.

²⁹Nung mongthat mongsai nouso chikü APAOU Apemshiotsün ainou shiji. Goa nou thattsün apem ameiting noin, naiuso nungso asaita ashioloutsün noin!