Read Khiamniungan Naga Isa 29 Bible Online

Isa 29 - Khiamniungan Naga bible

Isa 29

¹Goa ün amthang, Yirusalem ting nung inyate! Davidüh asaothang shantsün noknio inyate! Pon tsak si nime nung sümai nouso si sümai saohetsün hakü lüyanlükhuni,

²nungthan ko, “Goa ün amthang,” ta jontsün noknio khako Goa nou akuothe kankü shi-e. Nung ashaptsün naiuso amongsaiutsün noi-e, naiuso noknio athum she nou miankü noitsün amthang tsak khekkü noi-e.

³Goa nou nung noknio lemloukü, thaloukü kome.

⁴Nungai mia on tsaküh goh kheiai noikü pukhao nouso ongko sang tsüsasakü tsaküh chite au kowetsün khekkü noi-e.

⁵Yirusalem, gohmao hai sauhaiüh ni da pha nou poji, ngüso pukhaoli shipkü khuwane, naiuso ngüso ün ahatao lümeikü süpaihoi nou tsokap khekkü kankü khuwane — Alekta naiuso ayang tsünoikünko,

⁶APAOU Apemshiotsün nou asam aoasheih athsüoting naiuso gohaiu nouso tsangkü kipsane. Apaüh ahthe naiuso ajekting in nouso honge;

⁷nungai Goa ün noknio amthang tü pha potsün melehoi süpai nouso, ngüso dun naiuso jengtsaiu alum asoh miamian nai tso tsak eptsün khekkü mowane.

⁸Nungaih Yirusa- lem komau kamshitsün mele nouso chikü naiusile khaiunia tsaküh meshen miamianko heshiukü lüko naiukü chungetsün tsak khekkü noi-e, tsüdekünai khiam nou letsün khaiunia tsaküh meshen miamianko khiam shiukü lüko aiukhan wai- ankü khiam nou lelekü chungetsün tsak khekkü noi-e.

⁹Asam maingalu lünoi! Asam niopeklu lünoi! Theng ti tsühakü tukkatkü lünoi! Theng mem tsak lüko tsüshiukü hene khukhukü lünoi!

¹⁰Asam nio thatü thsüokü ngaoküta saiani-au APAOU nou asam niongao ngamkü iula-in, E-po nouso nungso niovei theau noiküla, lüko Goa nou ngüso niovei pek-in.

¹¹Khapiam atsangshei ngio alat apem asam ainou tsangkü wane; nung thsamlai ii thanglutkü taiutsün tsak khekkü noi-e. Asamüh nung wesanau montsün khaiunia ajantso dongai kankü khukü, nung apa tü asam thaiutha awesankiu ta sangnai apaüh nung tsüshio-e, tiautenai nung ii thanglutkü noin ta apaüh ngio-e.

¹²Asamüh nung vesanau tsüshiokünso ajantso hau kiukü asam hau nung awesankiu ta apa tü sangnai, nungaih nung titi theji tsünge ta apaüh thala-e.

¹³APAOU nou ngiom, “Nung khaiunia nousoüh ngu tü amkhamji lüko ngüso ngioko alat ti tsünoi, naiuso ngüso mongpem amao tsotsak ai noin. Khaiunia ngiokhem naiuso saisile sübao ngüsoüh mongai ngetaiutsün tü simkü ngüso dun titso tsünoi.

¹⁴Nungtiphe ngü ngüso tsak si tsak jetko ayang tsünoikün akuo tsaküh shiuhkü lekkati-e. Ngüso sauhai mongthat mongsai eptsün khaiuniahoi noiküla, nungso mainga hoi au iula-e, naiuso ngüso ilatsün khaiunia chikü nou ilatsün yaang iula-e.”

¹⁵Sauhaiüh meshen ayangtaiu nouso APAOU ainou tsangpok au koweji nungso inyate! Ngüsoüh chhisiya akau ai chhiji naiuso ngüsoüh chhitsün sauüh tsüeppe tsüdekünai ti chhiji sauüh tsüngela-e ta yangji.

¹⁶Ngüsoüh alum phokle- lekü kankeiji. Lak saitsün khaiunia nou süne lak nou chentso? Khaiunia tsak ta apaüh seithosantsün tso tsaküh, “Ni ngo tsüseitho tsüde- künai, ni ti chhiji nung ni tsüngela” ta ashanpao tü ngioau shio-e süne?

¹⁷Nungti ngioji, atao laiukü tsü- noikü liutsa lang nou eiu-a gohthang au iula-e, naiuso eiu-ah gohthang nou liutsa lang au phoklekü iulashi-e.

¹⁸Tilai nung ajekhaiu shi-e, noukek nou sangh asong nou wetsün lula au shio-e, naiuso niopek khaiunia sau anyakhem nai kihkü noian, apa niovei sopsatküta eppe.

¹⁹Israel hai asio Goa APAOU nou kiutsün amongling nou tsosilu naiuso nyaploukü thetsün khaiu- niahoi nou loüh epshi-e.

²⁰Sauhaiüh amaohai thangmangji naiuso Goa tsüwesankü hanji nungso thaiutha nung athon noi-e. Angei khaiunia apem lomokü wane.

²¹Amaohai kau- saiattsünso, sheloshitsünso tü angja kiutsün ko loyangtsünso, naiuso ngiotsüo khaiuniahoi nou ngiotsüo epau noitsün ainou lolaokü yaang ngio chitetsünso Goa nou lomowane.

²²Nungtiphe lo APAOU, Israel Goa, sauüh Abraham angja ainou kipsan apaüh ngioji, “Jü khaiuniaso, asam loto miammatkü tsünoishi-e, naiuso loto amiam nou asam khasinio sangjenkü tsü-iulashi-e.

²³Tilai ngo asam hau methsoso kiutsün asamüh eppe, nungaih asamüh ngü Israel hai ün asio Goa nou ta wesane. Asamüh ngü lomsane naiuso jü khako hatkü tsa-e.

²⁴Maingahoi nousoüh angela au ngelou-e, naiuso sauhai asaita namnamkü noiji ngüso atsandetsün thaiutha monglinge.”