Read Khiamniungan Naga Isa 30 Bible Online

Isa 30 - Khiamniungan Naga bible

Isa 30

¹APAOU nou ngiom, “Sauhaiüh Yihuda nai nokshing shingji, ngüso inyate, tiautenai ngüsoüh jü thako khengshiji. Ngü tsümong- chiokün mongyang ta ngüso hoilutji, naiuso jü mongyang thako ngüsoüh ngiomong shingetsün ii nou thanglutji, naiuso angei tsak chiai angei tsak ta kamlutji.

²Jü ayamhan tsüsangkü ahachu thaiutha ngüso Ijip nai khuji. Ngüsoüh Ijip hai au ngüso kiplou-iau aiuphe, ngüsoüh Ijip hai nokpao da monglamji.

³Lüko nokpao nou da asam hachu au oukong ti tsünoi-e naiuso Ijip haiüh kiploutsün nung akuothe nai thonane.

⁴Ngüso paiusihongso Zoan si Hanes hai ün Ijip noknio nouso ai shingoiankü noilüko,

⁵nungh amonglam tsünoikün mele sübao ainou ngüsoüh ahachu aiutsün taoko epau tsüshio nung mele tü monglamkü noikü shitsün thaiutha Yihudahai ayangelat noi-e.”

⁶Ajepekki nai noitsün thainianhoi thaiutha Goa ün ngio ngem; “Chongkhao nouso si aliule suntsün pao nouso naiuso in sunkü jeikeitsün dragon nouso kihtsün ahatting goumchiso thsatkü paiusihong tsakeiji. Ngüso hau ti ahachu kiuau tsüshiokün mele tsak hau kiuau chai apia mai paopei nouso ngüsoüh gado si ut nouso hau thsa kankiuji.

⁷Tititenai Ijipüh kiutsün ahachu nung titso atheau tsünoi, asapat, nungtiphe ngo Ijip tü nianib nou, ‘Atawai au tsüsunkün Dragon’” ta ibkiu.

⁸Ngüso titi tsümeikü noiküla, naiuso nung khaiuniahoi nouso ti khekkü noiküla ta asaichi thsamsat nai taiuau khukü thsamsat ko lüsat taiuta Goa nou ngü tü ngiom.

⁹Ngü- soüh Goa thako asaita khengshiji, asaita yaang chiteji, APAOU ün atsandetsün tü angio angau asaita tsümongchioji.

¹⁰Ngüsoüh e-po nouso tü nyankü noianau ngio. “Ti ayam thakü noin nung thaiutha sam hau lachite ta ngüsoüh ngioji. Lüko sam hau samüh angluau mongchiotsün achite. Samüh atsüo tsüdekü monglamtsün nung kankei- ko.

¹¹Sam yam ainou lükhuwan, naiuso sam yam nouso kiapjeitsün alaowan. Samüh asam Israel hai ün asio Goa thaiutha lula au tsü aiu.”

¹²Lüko Israel hai asio Goa nou nungti ngioji: “Ngo asam hau ti chiteji nung asamüh tsüwesankü lüko asamüh alotheantsün si akausai nou da niolutji.

¹³Asam aphio noin. Asam lungpe atsokting tsak asung- thon ainou asaothon saokü ngiapaikü noitsün tsak khekkü noin; alekta asam loithiowane.

¹⁴Nungai asam pulak tsak nelangkü thipektsün khekkü noi-e, nung thatü thsüokü lopaianphe inkaio ajek tsak tsonsanau lümeikü waokü tsaktso tsüpoi-e, tsüdekünai khiamdan ainou khiam khaiusanau lümeikü mikekli tso tsünoi-e.”

¹⁵Akhengting APAOU, Israelhai asio Goa nou, khaiuniahoi nouso tü ngioji, “Laokü ashi naiuso ngü da nyankü monglamlutkü anoi. Nungaito asam oukongkü naiuso aaloukü noi-e.” Lüko asamüh nung chhiau tsümongchio!

¹⁶Nungliko, asam mokthso nouso chiai moknoikü asam ehoi ainou thakhuau asamüh yang. Naiuso nungko asam ayam thakü noiküla tititenai asamüh chhiau nouto athakhuau noulu noiküla. Asam mokthsoso thatü khaolaoji ta asamüh yangji, lüko sauhaiüh asam tü kumji ngüso tekkü khaolao-e!

¹⁷Tilai asamüh ehoi süpai tsak eppe asam, heng tsak ngoikü khulükhunane, naiuso asam chikü jingkü khu-iau süpai pungo nou omane. Kingkhaiu nai nehan tsaklu poitaiukiutsün tü simkü asam süpaihoiso ün titso poikü tsütaiu-e!

¹⁸Nungti lüko APAOU atsüojinyang nou asam tü taiukü noi-e. Apaüh tsüojinyang kiukü asam loau khemkü noin tiautenai Apaüh asaita ayamtha nou chhiji. Sauhaiüh APAOU nou da amonglam taiuji ngüso thaiumei.

¹⁹Asam Yirusalem nai kihtsün khaiuniahoiso loto asam tsüshap shi-e. APAOU nou atsüojinyang noin, naiuso tilai asamüh apa tü ahachu thaiutha we-e, apaüh asam tü thala-e,

²⁰APAOU nou asam hau achektao yankü khu-i-e, lüko asam hau tsande au apa pem nungko noiha-e, naiuso loto asamüh apa tü yamshiau tsünoi-e.

²¹Naiuso tilai asamüh asam yam uai tsüdekünai tsatai phokle-e, asam noukhanüh asam phiai sangh tsaküh chitekü lula-e, “Nungko yam nou noin, nungtü lühoilut.”

²²Asamüh tangka- son naiuso chaiou nou shantaiutsün sotsom nouso lo-e, naiuso nungso sangh asong nou wekü ngio-e, “Sam kha ainou lükhuwan!”

²³Tilai asamüh chihle khiamle shiuthio-e, APAOU nou nungso samsanau ah-ou nou honge, naiuso asam hau be-eiuyam ameiting yami-e, naiuso asam thainiansoüh khengliu saiukü eppe.

²⁴Asam eiu-atsün jangtsopong naiuso gado nousoüh khutpektsün ameiting eheshiu heshiu-e.

²⁵Asam ehoi ehüthang nouso thaloutsün ajekhaiu ko naiuso ngüso khaiunia loattsün ajekhaiuko nai, king si choi pungkü ainou khiamngan nouso chette.

²⁶Aleije nou aje ou khekkü uo-e, naiuso aje uo nou chinyatnyi uotsün tsakhaulu thekü nung khako jetsün tü haoson chinyatjam phopshikü je-e. APAOU nou meshen khaiunia atawaitsün keshiau, naiuso ngüso tü shiuhtsün muo nou lomeitsün ajekhaiuko nai nung thawao-e.

²⁷APAOU ün oukong naiuso ajinka nung laiukü jettekü ainou lüko epau shiom, In naiuso inkhao nou apa mongmattsün hanji. Apa singionai, apa ngio nouso in khekkü nyaiji.

²⁸Khiamthe nou alum kankü khuwantsün khekkü apa khako apaüh ahsheih nou hongji. Nungüh mele nouso lothonan kiuji. Naiuso nungso tsümeikün ayangtaiu athon iula-iji.

²⁹Lüko asam, Goa ün khaiuniahoi, to asio sümai asoh tsak nouko monglingkü jih hangtsünli noi-e. Israel kipsantsün APAOU Amkham Tsam yamai poipoi matkü naiuso jih hangkü khutsünsoko naito asam bao tekkü monglinge.

³⁰APAOU nou apa ajinka sangh khaiunia pungkü hau lula-i-e naiuso apa amongmat oukong ngesani-e. Nungko innyai, ah-mok, sansao, naiuso ah-ou athsüoting uotsün noi-e.

³¹Tilai APAOU ün sangh lula-e, Asiriahai lekkate naiuso apaüh angja kiutsün oukong nou ngesane.

³²APAOU nou ngüso tü loüh loüh ta wetsün ko, apa khaiuniasoüh danpatkü naiuso poipoi matkü noi-e. Asiriahai thako Goa apa pem ehli-e.

³³Atao laiukü ai yakü Asiriahai nokpao in songkü nai jah-anau athang tsak khemtaiukü noiküla. Nung aokü naiuso punkü, ajahpai nouso phansankü noiküla. APAOU nou nung da in jahlutau innyai nung khiamtsang tsak khekkü ii nou salut-e.