Read Khiamniungan Naga Isa 32 Bible Online

Isa 32 - Khiamniungan Naga bible

Isa 32

¹Atao tsak ko ngiotsüo nou nokpao tsaküh nokshing shinge, naiuso apa khemko noitsün aheihoi nousoüh ngiotsüo nai nok-shinge.

²Ngüso apem nung ahsheih ainou asoloukiutsün tsak khekkü noi-e naiuso ah-ou-ahsheih ainou pamloutsün athang tsak khekkü noi-e. Ngüsoto singtso goh tsak nai haiuthso tsangtsün khek, naiuso paisam aosam tsünoikün goh thang nai long asongting ahsokhem tsak khekkü noi-e.

³Ngüso niovei naiuso noukhan khaiuniahoi apoutsün lulaau sopkü noi-e.

⁴Ngüso loto hekliukü tsünoishi-e, lüko ngüsoüh angelatsün ko chhi-e naiuso ngüsoüh ti yangji nung singio-e.

⁵Mainga tsaküh asuhat epau naiuso tsümeikün khaiunia tsak mong saitha noi-e ta khaiunia sauüh tsüyange.

⁶Mainga tsaküh mainga ngio chiteji naiuso tsümeikün chhisiya aolu yangsanji. Apaüh ti chhiji naiuso ti ngioji nung APAOU tü alochi noin, naiuso apaüh tilaitso naiukü noitsün hau tsüwao-e naiuso lekü noitsün hau titso tsüsen-e.

⁷A-aiu khaiunia tsümei naiuso apaüh tsümeikün lu chhiji, apaüh yaang ngio chitetsün tsangkü tsosiluhoi nouso lotheau yangji naiuso ngüso epau noitsün ayamtha nou loyangkiuji.

⁸Lüko asuhat eptsün khaiunia nou ngiotsüo chhi chhiji naiuso ayamtha nou thaiutha mongkü tsaji.

⁹Asam menyiuhoi sauhai ti tsüyangelatkün asiute aakih nai kihkü noin, ngo ngiotsün tü anglu.

¹⁰Asam loto mongtsamkü noiau shiom, lüko nungthan ponko nungtao tongtü nai asam mongkia-e tiautenai sainaoshep eiu nai shep nou tsüeiu-e.

¹¹Asam ayangelat tsünoikü, asiute aakih nai kihkü shiji, lüko loto ahat nou lüngaongao! Asam neshe nouso lükhowan küta nekongthe nouso lokü omthsa lüthsa.

¹²Amongsaiu nou akongai lülalo, tiautenai gohtsa eiu nouso naiuso sainaoshep aimong nouso lotheaniu,

¹³naiuso tsao si siampai nouso jü khaiuniaso ün gohthang nouko samsaniu. Tsam apem tiai khaiuniahoi monglingkü noiküla naiuso amongling nou miankü noikü shitsün noknio thaiutha lüshap.

¹⁴Nokpao tsam lüko leane naiuso noknioting nou lüko thumkü wanane. Tsam naiuso ehü po sübaoko noikü ngüso tü ehükü noiküla nung asaita hau lotheane. Liuai noitsün gado nouso nungko khekei-e, naiuso nungko onnemok nousoüh thsan nou yamhe-e.

¹⁵Lüko loüh jam Goa nou sam dongai apa onthso hongshi-e. Tsükankeikü wantsün gohthang nou gohtsa goh iula-e, naiuso eiu nousoko be-eiuyam amei yam-e.

¹⁶Gohthang alumai asio naiuso ngiotsüo nou chhi-e.

¹⁷Tiautenai khaiunia pungkü nou ti ayamtha noin nung chhisiya nou shioko nungko asaita aaloukü naiuso mongtsamkü noi-e.

¹⁸Goa ün khaiuniahoi ayangelat ainou thakhu- kü noi-e, naiuso ngüso tsamkhaiu aalou naiuso kipsankü noi-e.

¹⁹Lüko liutsa naito san nou sao-e, naiuso noknio nou lotheane.

²⁰Nungai chihsikhiam thaiutha khiam saiukü naiuso gado si jangtso nouso thaiutha alumai aalokü tsamheau khengliu nou epnai khaiunia pungkü titi amonging noi-e.