Read Khiamniungan Naga Isa 33 Bible Online

Isa 33 - Khiamniungan Naga bible

Isa 33

¹Sam ehso inyate! Tiautenai ngüso sauüh tsükauat naiuso tsü kausaiat lüko, ngüsoüh akausai chhi naiuso akausaiat chhi nou chhianiu. Lüko ngüsoüh kautsün naiuso kausaiattsün atao nouso athon yange, naiuso nungko ngüso pem kauate naiuso kausaiate.

²APAOU, sam da atsüojin. Samüh sam ayang ni da taim. Ajekhaiu pungkü sam akiplu naiuso angja omhe taoko sam akipsan.

³Tilai ni sam thaiutha ko liji, ehlingem tsangkü mele nouso khulükhunji.

⁴Ngüso jengtsaiu nouso kamsanküta nung aploukü kankü khuwane.

⁵APAOU titi asong noin! Apaüh alum khako nokshingji. Apaüh Yirusalem ngiotsüo naiuso asaitha nou miani-e

⁶naiuso mele nou mongiji. Apaüh meshen khaiunia asaita kiplouji naiuso ngüso hau mongthat mongsai naiuso angela nou kiuji. APAOU lun asuhattsün nung ngüsoüh taiutsün asongting noin.

⁷Mongnyanhoi nousoüh ahachu thaiutha jonji. Ngüso paiusihong sauhaiüh aalou kankü shiau koweji nungsoüh thsüokü weji.

⁸Yambao nouso ai thatü ahat noi nou shioko nungai sau tsütsakeiji, Ngiomong- shingetsün nouso lotheaniu naiuso athalou-e nouso lotheaniu. Loto khaiunia sautsüo asuhat tsünoishi.

⁹Gohthang nou yaang nai leankü noin. Lebanon liutsalang nouso wailaaniu, Sharon gohtsa tsamei nou singtso goh tsak khekkü noin; Bashan si Karmel king nai pai nouso ainou paisha nouso salianji.

¹⁰Mele nouso tü APAOU nou ngioji, “Lo ngo chhi nou chhi-e. Ngo titi oukong noin nung ngo hane.

¹¹Asamüh yaang mongthat thatji naiuso asamüh chhitsün alum asapat noin. Jü onthso in khekkü noin nungüh asam lotheane.

¹²Lung nouso longpoi khiam shanau thiopektsün naiuso tsao nouso in moi iulakü jahthiowantsün khekkü asam noi-e.

¹³Simkü naiuso komaikü noitsün khaiunia pungkü nou ngo ti chhin nung alula naiuso jü oukong ngesankü athe.”

¹⁴Zion nai angei khaiuniahoi ahat nou ngaongaoji. “Goa ün mikhem nouto athontsüyangkü nyaikü noitsün in khekkü noin ta ngüsoüh ngioji. Nungti inli nouko sam aasanau shio-e süne?”

¹⁵Asamüh ayamtha nou ti noin nung ngiokü chhisiya naito asam aasane. Tsosilu- hai sapthio-iau a-oukong lakankei naiuso nekhem paopei nouso lalou. Aloatau yangtsünso mongyang nai laha tsüdekünai amaohai tü tsümeikün lachhi.

¹⁶Nungaito asam kipsankü noi-e; lungpe akongting tsak sohko aaloutsünli asam aaloukü noi-e. Asamüh eheao chih nou taiu-e naiuso ashiuau khiam nou kih-e.

¹⁷Loüh jam asamüh nokpao tsak goumchi tsak khako aniokun apemai thasaokü aniamsim nokshingtsün eppe.

¹⁸Asam akeng taoko gohmao- haiüh liukim shitsün lon hattsün naiuso akautha nouso, ayangshi- hetsün tsaklu noi-e.

¹⁹Asamüh mongthe gohmao khaiunia sauhaiüh asamüh ngelaau tsüshiokü ngio chitetsün tilaitso tsüepshi-e.

²⁰Sam don sümai saohetsün Zion noknio ta athaplu. Yirusalem tü athaplu! Nung mongko kih-au titi aalou athang tsak noi-e! Nungto tilaitso tsülemlemkün nejenkhio tsak, sübao kheam tilaitso tsüphatsan naiuso auo nouso tilaitso tsüchankün tsak noin.

²¹APAOU nou sam hau apa ajinka hane. Sam haiu asong si haiuthso nouso saiai kih-e, lüko ehoi kheng nousoüh nung chiai tsüshikih-e.

²²Nung kheng nouso phantsün chikü asapat; tititenai nung tsangkü kheng niakeitsünsoüh nialokü khuau tsüshio! Samüh sam thako tsatsün süpaihoi nouso jengtsaiu apem thalouwane, naiuso nungko chionehoi nousoüh lüko haoson saiukü epau shio-e. APAOU apa pem sam nokpao noi-e; apaüh sam khako nok-shinge naiuso sam da jime.

²⁴Sam goumchi ko kihtsün sauühtso loto akiasiya noin ta tilaitso tsünamnam shi-e; naiuso angei chikü wankiu-e.