Read Khiamniungan Naga Isa 34 Bible Online

Isa 34 - Khiamniungan Naga bible

Isa 34

¹Goumchi khaiuniahoi apem ashi! Lemkü akamshi küta anglu. Goumchi athum naiuso nungko kihtsün chikü ashi küta anglu.

²Mele chikü naiuso nungso süpaihoi chikü khako APAOU mongmat sungkü noin. Apaüh alotheanau thaiutha ngüso thumkü kiuwaniu.

³Nungso mia nouso tsükhane, lüko choinyamkü wane; naiuso king nouso she lopengtsün tsangkü aseng noi-e.

⁴Aje, alei, naiuso kianthsüo nouso apem puau iulakü nyomkü khuwane. Maou nou thsamlai tsak khekkü laishiküta monkü khuwan naiuso kianthsüo nouso sainaoshep auo tsüdekünai phiopai thsamli saliane.

⁵APAOU nou apa salaiu aün nai khemkü taiu, naiuso nungüh Edom khaiuniahoi sübao apaüh alotheau khemkü taim lo nung ta shiuh-e.

⁶Onnemok thso naiuso wonthso aloat chaithio kiu taoko ashe naiuso eiu nouli apa salaiu she naiuso eiu nou chujeikü noi-e. APAOU nou nung aloat chaithio Bozra hai noknio nai thio-e; nung achaoattsün asong nou apaüh Edom hai goumchiko chhi-e.

⁷Nung khaiuniahoi nou liuai noitsün jangtso naiuso tsamai noitsün jangtsopongthso nouso khekkü loiane, naiuso she si eiu nou goumchi nou aseng chujeikü noi-e.

⁸APAOU nou Zion kipsanau naiuso apa ehoiso thako thamshiau nung atao noi-e.

⁹Edomhai haiumongso inthio khiamli iula-e naiuso goh nouso kakkak ta jüokü iula-e. Ngüso goh athum inthio khiamli jeknya-e.

¹⁰Nung asoh naiuso anyih chikü nyai-e, naiuso nungko sungtsün inkhao nou athontsüyange. Nung goumchi vetao si vetao tsükankei shikü leane, naiuso khaiunia sautso loto nung thsatkü tsütsakei shi-e.

¹¹Sangkhao nouso si khiamwaio nousoüh nung goh mianane. Nung khakoli APAOU nou nung goh loühjam akeng iula-i shi-e.

¹²Nung goumchi nokshingau nokpao tsünoishi-e, naiuso aheihoi nouso chikü khuwankheme.

¹³Nokpao tsam keng nouso chikü nai tsao si siam nouso samsane naiuso komjeikü taiutsün noksong nouso ai samsane, naiuso nungko chio si sangkhao nouso kih-e.

¹⁴Nungko liu thainian nouso tsakei- e, naiuso angei onthso nousoüh tsak si tsak ta jonekü noi-e. Anyakhem nai kihtsün atsaoting thainian nouso nungko aalo athang ta yamkü shi-e.

¹⁵Sangkhao nousoüh nungko ngüso a-apshankü, ali thiokü athso nouso etsankü ta paotsangkü noi-e. Miahe letche nouso nungko tsakjam tsakjam ta kamshi-e.

¹⁶Asamüh APAOU ün aa thainian thsam nai lüyam naiuso nungko ti ngioji lüwelu. Nung thainian nouso ongko tsaktso tsümo-e, naiuso tsak- tso ahai tsühakü tsünoi-e. Nungtihau nung APAOU nou ngiokhem kiukü noin; apa pemüh nungso aikü kamshi-e.

¹⁷Ngüso ongko ngüso pungkü hau goh janthatkü haoson kiuau nung APAOU nou noin. Ngüso nung goumchiko vetao si vetao kih-e, naiuso nung athontsüyang ngüso thaiutha noi-e.