Read Khiamniungan Naga Isa 35 Bible Online

Isa 35 - Khiamniungan Naga bible

Isa 35

¹Singtso goh nouso monglingate, naiuso liutsa lang nai taopun nouso punsane.

²Singtso goh nou jih hangkü amongling sangh asong nou we-e; nung Lebanon king nousoli aleng meikü noi-e loüh Karmel si Sharon khengtaiu nousoli gohtsa noi-e. Khaiunia pungkü nou APAOU ün alengmei, apa asong nou naiuso oukong eppe.

³Ouchankü noitsün pha nouso naiuso tsaosilaohai singkao oulokongkiu-e.

⁴Sauhai monghenkü noin, “ngüso pungkü tü mongnyankü naiuso tsühatkü lüthe ta lüchite! Goa nou asam ehoiso hau mikhem kiukü asam halouau shiji.”

⁵Nungai niopek nou epau shio-e, naiuso noukek nou lula-e.

⁶Chione nou hamkü jih hange, naiuso asingioau tsüshiokünsoüh amongling sangh asong nou wekü chite-e. Singtso goh nou thsatkü haiuthso nouso tsang-e,

⁷Jekkü noitsün singtso goh sheasong tsakau iula-e, naiuso gohwon goh nou haiuthso nou mian-e. Chiu nouso kihtsün gohthang nai langthengme naiuso ut nouso samsan-e.

⁸Nungko yamkheng asong “Asio Yam,” ta jontsün tsak noi-e. Nung yamko angei khaiunia tiaitso tsütsakei-e; mainga sau nung yam tü tsakeitsün aphio nai nialükhunau tsüshio-e.

⁹Nungko chongkhao nouso tsünoi-e, atsaoting thainian tiühtso nung yam tsüyan-e. APAOU nou kipsantsünso tsamai khuao nung yam tsangkü tsakei-e.

¹⁰Amongling thaiutha sangh asong nou wekü jih hangkü ngüsoüh Yirusalem monglingatkü sao-iu-e. Ngüso amongsaiu naiuso monget ainou athontsüyangkü thakhu-e, naiuso ngüso athontsüyangkü monglingkü noi-e.