Read Khiamniungan Naga Isa 37 Bible Online

Isa 37 - Khiamniungan Naga bible

Isa 37

¹Nokpao Hezekiaüh ngüso ainou ngiongem lukü thunkü, amongsaiu nou meshen ne chipekküta nethe tenloukü, APAOU amkham Tsamai khu.

²Apaüh nokpao tsam tü paotsangtsün asong Eliakim, naiuso mikhem noikham nai asat thetsün Shebna, naiuso mesonhoi ashethso nouso Amoz thso nou e-po Isaia dongai hong. Ngüsoüh lüko nethe tenloukü noiküla.

³Apaüh Isaia hau kiuau ngüso hau chitetsün ngiongem nungti noiküla: “Lonyi nung omhetsün ajekhaiu tsak noin; sam angjakü naiuso amiam nai noin. Menyiu tsaküh methso chetau pem outsükongtingkü noitsün tsak khekkü sam noin.

⁴Asiria hai nokpao nou apa ün asonghoi khako ateng nou aa Goa lochilotsao kiuau hong. Sau- haiüh nung alochilotsao ngio ngioji, ni nou APAOU Goa nou lulaküta ngüso angja lükiu. Nungtiphe sam khaiunia sauhai poisankü noin nungso thaiutha Goa da misao lüsao.”

⁵Tilai Isaiaüh Nokpao Hezekia ün ngiongem ep,

⁶apaüh nung athalatsün ngio laokü hongshi. “Apaüh asam kipsanau tsüshio-e ta Asiria haiüh ngiotsün tsangkü asam lalohati ta APAOU nou asam tü ngioji.

⁷APAOU nou nokpao hau atenlam ngio tsak lula-i-e naiuso nungüh apa meshen goumchi ai laolokü khu-ishi-e, küta apa APAOU nou nungko loatkü wane.”

⁸Asiriahai asong nou nokpao Lakis leaniu küta khukü Libna hai noknio simkü noitsünso thako ehliji ta ngela, küta apa nungai asangluao thaiutha khu.

⁹Sudan hai Nokpao Tirhakaüh niakü Ijiphai süpaihoi ngüso komau shiji ta ngiongem nou Asiriahai shingoi. Tilai nokpao nou nung lula, apaüh Yihudahai Nokpao Hezekia tü ngioau thsamsat tsak hong.

¹⁰“Goa sübao da asam mong- lamji apaüh asam jü phamongko tsüloi-e ta asam tü ngio-iu, lüko nung ngio nou asam lasapthio-i.

¹¹Asiria hai nokpao nou ti goumchi lünou apaüh lothe ta thattsün asamüh lula-iu. Asam thakhu-e ta asamüh yangji süne?

¹²Jü paosiposoüh Gozan, Haron naiuso Rezel nouso lotheküta Telassar nai kihtsün Bertheden hai khaiunia loatkü wan, naiuso ngüso goa soüh ngüso tsaktso kipsanau tsüshio.

¹³Hamat, Arpad, Sefwaim, Hena, naiuso Ivva nung noknio nokpao nouso tiai noin?”

¹⁴Nokpao Hezekiaüh ngiongem kantsünso ainou thsamsat nou lo küta nung tü welu. Nungai apa Amkham Tsamai napküta nung thsamsat APAOU khako taiu,

¹⁵naiuso misao lokü ngiom,

¹⁶“Apemshiotsün APAOU, Israelhai Goa, akoipotsün thainian nouso khengko moknoitsün, goumchi nokshing chikü khako nokshingtsün, nilu Goa noin. Ni goum naiuso aün nou shan.

¹⁷Nungtiphe lo, APAOU, sam da ti thawaoji nung athap naiuso alula. Senakeribüh ni aa Goa nou lochilotsaotsün chikü da anglu.

¹⁸APAOU, Asiriahai nokpao nousoüh mele piakü lothekiuküta ngüso goumchi aodangkü wanantsün sam apemüh ngeji.

¹⁹Ngüso goa paisilung nouso tsangkü khaiunia pha nou shantsün sotsomsolu noin-nungso goa atsüoting tsüde-nungso in nai jathiowan.

²⁰Nungtiphe, APAOU, sam Goa, goumchi mele chikü nou Goa nilu noin ta ngeau Asiriahai oukong ainou sam akipsan.”

²¹Nungai Isaiaüh Nokpao Hezekia dongai ngiongem tsak hongkü ngiom,

²²nokpao misao tü thalakü APAOU nou ngiom, “Senakerib, Yirusalem noknio ni tü nyailutji, naiuso ni lochilotsaoji.

²³Ni lochilotsaotsün nung sau da chhiji ta yangji? Ngü asio nou Israel Goa, ni asutsühatkü shin.

²⁴Ni mokthso tsamkei nouso Lebanon atsokting king nouso shiolom ta ngü hau bülomdeau ni atsamkiso hongkü noiküla. Nungko ni cedar pai alaiuting naiuso Kupra-pai ameiting nouso sahongji ta ni bülomji, naiuso ni liutsa langmong nou saokü noin ta bülomji.

²⁵Ni temkhao nouso thaiu küta gohmaohai goumchi nai khiam nou shiuji ta ni bülomji, naiuso a-süpaiso hokngamüh Nail Haiumong tha-apta ni bülomji.

²⁶“Ngo nung atao laiukünai yakü thattaiukü shin ta asamüh tsülu süne? Naiuso lo nung ngo chhianiu. Ngo nihau mongkü pejeikü taiutsün noknio nouso nelangkü thiopekkü wanau oukong kium.

²⁷Khaiunia sauhai nung noknio nouko kihküla ngüso oukong tsünoi, ngüso hattat naiuso lekkat. Tilai shingngan ahsheih akongting nou ngüso shipkü khuwan ngüso tsamei nai khengliu tsüdekünai sam tsamkhaiu ai hotükhak sungtsün tsak khekkü noin.

²⁸“Lüko ni ti chhiji naiuso tiai khuji athaiutha ngo alum ngeji. Ngü thako ni titi mongmat nung ngo ngeji.

²⁹Ngo ni mongmattsün naiuso bülomtsün ngiongem epiu, angan chatkü ngoutaison naiuso asonkou nai son auo nou thiokü kelute naiuso ni shitsün yam ta laokü kankü khushi-e.”

³⁰Nungai Isaiaüh Nokpao Hezekia tü ngiom, “Ti thawao-e nung thaiutha nung ii nou noin. Lüso naiuso nyungo pon asamüh apa chija samsantsün chihsikhiam heshiu-e, lüko sampon nouko yaküto asamüh chihle khiamle thioau shiokü nungko nou yamhe-e, naiuso sainaoshep nouso thomkü nungh eiu panhe-e.

³¹Yihuda nai sauhai poikü noin nungso to paisam aosamli goh kheiai eiu saokü shinge küta eiu nou eiusane.

³²Tsümowankü poisantsün khaiuniahoi Yirusalem si Zion king nai noi-e, tiautenai APAOU Apemshio- tsün nou nung thawaoau shanlouwaniu.

³³“Asiria hai nokpao thaiutha APAOU nou nungti ngiom, ‘Apa nung noknio nouko tsünape tsüdekünai nung noknio thako uokopchon tsak tso tsükoppe. Nung noknio simkü süpaihoi tsakühtso tsütsakjei-e, tsüdekünai nung noknio lemkü goh loksankü tsüsaisane.

³⁴Apa nung noknio nai tsünapkü apa shitsün yamtalu laolokü khushi-e; nung ngo, APAOU nou ngiowaniu.

³⁵Jü asuhat taiuau naiuso jü ayathsüotsün David tü athalou shantsün shioko, ngo nung noknio kipsane naiuso jime.’”

³⁶APAOU ünhonghoi tsak Asiria hai saothang nai khuküta süpaihoi 185, 000 loatkü wan. Nungthan nyap ahshiochan ngüso apem nungko loikü ean!

³⁷Nungai Asiriahai nokpao Senakerib laoküta Nineve ai laokü khuwan.

³⁸Nyitso apa meshen goa Nisrok amkhamtsün tsamai amkhamkü noitaoko, apa thso Adammelek si Sherezer neüh ngüne salaiu loukü apa loatkü Ararat hai goumchi ai khuthiowan. Apa thsoso ongko tsak, Esarhaddonüh apa nokpao noikham lilokü khu.