Read Khiamniungan Naga Isa 40 Bible Online

Isa 40 - Khiamniungan Naga bible

Isa 40

¹“Jü khaiuniaso lümongtsam,” ta sam Goaüh ngioji. “Ngüso lümongtsamkiu!

²Yirusalem khaiuniahoi lülomongsong. Ngüso saiukü omhekü shi-iu ta ngüso hau lüchite naiuso loto ngüso angei wankiuwaniu. Ngü ngüso angei thaiutha ngüso hau angja saiukü kiu-iu.”

³Sangh tsaküh wekü ngioji, “APAOU thaiutha liutsa nai yam tsak lükhemkiu! singtso goh nai sam Goa thaiutha yam lukü lüshan!

⁴Tsamei pungkü alomian, naiuso king nouso pungkü su-aikü ashan. King nouso tsamei iula-e, naiuso goh khepkhengkhengkü nouso tülinglingkü shan-e.

⁵Nungai APAOU ün ajinka tsangsheikü sung-e, naiuso nung khaiuniale chikü nou eppe. Nung APAOU apa pemüh thaloukü noin.”

⁶Sangh tsak nou wekü ngioji, “Ngiongem tsak lüwelut!” Nungai ngo sangshin, “Ngo ti ngiongem wepenge?” “Khaiuniale chikü khengliu khekkü noin; ngüso liutsa taoponli aakih laiukü tsünoiji ta lüwepeng.

⁷Sang nou shei-anji naiuso taopun nou sappanji, Tilai APAOU nou nungso khütha nai ahsheih nou hongji. Sang nou jeiloutsün chiai shikü khaiunia nouto tsüjeiji.

⁸Ah, sang nou shei-anji naiuso taopun nou sappanji, lüko sam Goa ngio nung athontsüyangkü noiji.”

⁹Yirusalem, ni king atsok nou chiai lüsungh küta ngem amei nou lüwepeng! Zion, ni sangh asong nou wekü lüjon, ngem amei nou lüthipeng! sangh ngem asong nou lüwepeng hatkü lanoi. Yihuda hai noksong nouso hau ngüso nokpao shiji ta lüchite!

¹⁰Akhengting APAOU nou apaüh kipsantsün khaiuniahoi niakü oukong nai nokshingau shiji.

¹¹Onnemok jimtsün tsak khekkü apaüh meshen onnemokthso nouso aikü kamshi-e küta ngüso apa sangdongkhaiu ai loklou-e, ngüso hau nyao chepitsünso apaüh paotsangkü niakei-e.

¹²Khaiunia ajantsoüh khiamnok nou da phayam tsangkü thatluau shio-e süne tsüdekünai maou nou da apa phayamüh thatluau shio-e süne? Khaiunia ajantsoüh goh pu nou thengkam tsakko sailouau shio-e mo, tsüdekünai king si choi nouso da tsoi nouko thatluau shio-e mo?

¹³Khaiunia ajantsoüh APAOU hau chhi chhiau yam hanau shio-e mo? Apa tü sauüh tsandeau tsüdekünai ayam hanau shio-e?

¹⁴Angelouau naiuso angela au naiuso chhisiya titi chhiau noin nung ngelouau Goa nou sau da sangloji?

¹⁵APAOU thaiutha mele nouso ti wesankü tsünoi, nungso jidaochan tsaklu noin; khiamnok asong nouso lüko pukhaoli lohekkü noin.

¹⁶Lebanon liutsa nai noitsün thainian nouso chikü lüko sam Goa hau aloat chaithio thioau tsüsaiu, naiuso nung langpai nouso jah au thatü chaokülu noin.

¹⁷Apa khako mele nouso chikü titso tsüde.

¹⁸Nungaito asamüh goa nung sauko weluweau shio-e? Apa ti khekkü noin ta ni titi chiteau shio-e?

¹⁹Apa to asaisantsün khaiunia nousoüh saitsün sotsom, khekkü tsüde, naiuso sonlang khaiunia nousoüh tangkason si chaiou lakkeng nou chiolutkü shantsün tsüde.

²⁰Tangkason naiuso chaiou lakkeng epau tsüshiokün khaiunia nou tsüchoilükhunkü nou pai cholouji. Apaüh tsüloiankü tsakü noitsün sotsom shanau waimon khaiunia tsak yamsanji.

²¹Asamüh tsüngeso? Asam hau chitekü tsünoiso? Goumchi nou titi atao laiukü khako yachu nung thaiutha asamüh tsüluso?

²²Nung goh khütha nai maou nou yankü sau apa nokpao noikham ai mokkü noin nung tsak nou tsangkü shan, nungko noitsün khaiuniahoi nouso mao nousoli henkü noin. Apaüh maou nou nekhongtsün tsak khekkü sapengji, naiuso akihtsün nejenkhio tsak khekkü sapengji.

²³Oukong suntsün nokpaohoi apaüh lonyapji küta ngüso ti tsüdekü iula-iji.

²⁴Ngüso nung gohkheiai pai eiu meikü mosaokü lo thomtsün paisam khekkü noin. Tilai APAOU nou ahsheih tsak hongji ngüso wonanji naiuso tsokap khekkü shipkü khuwanji.

²⁵Asio Goa nou sauko welu-e au shio-e? Nungko apa khekkü amao noi shin süne?

²⁶Maou nai athapsan! Ni eptsün nung kianthsüo nouso sauüh seitho? Nungso süpaihoi tsak khekkü niakeitsün tsak nou, nungko tititso noin apaüh ngeji naiuso nung pungkü nianjonkü jonji! Apa oukong thatü asong noin nungso tilaitso tsaktso tsümowante!

²⁷Israelhai, nungaito APAOU nou ni angjatsün tsünge ta ni tiauta namnamji tsüdekünai ni ngiotsüo tsüdekünai omhekü noinai tsüpaotsang ta ngioji?

²⁸APAOU athontsüyang Goa goumchi chikü nung apaüh seitho ta asamüh tsüngeso? Asamüh tsülula so? Apa tilaitso tsütanji naiuso uo tsüchanji. Apa ayang nouso khaiunia sauüh ngelaau tsüshioji.

²⁹Sauhai outsükong naiuso tanatkü noiji apaüh ou lokongkiuji.

³⁰Oumhai lüko ouchankü iula-e; oum khaiunia nouso tanatkü loianau shio-e.

³¹Lüko sauhaiüh ahachu thaiutha APAOU da amonglam taim ngüsoüh oukong ayan epshi-e, Ngüso da letche khekkü akoi nou samsane; ngüso jingkü khu-e lüko uochankü tsü-iula-e.