Read Khiamniungan Naga Isa 41 Bible Online

Isa 41 - Khiamniungan Naga bible

Isa 41

¹Goa nou ngioji, “Nyankü anoi küta ngütü anglu, asam goumchi laiukü nai noinso! Asam mihsingem mikhem thangnai kiuau khemloukü lünoi; nungko asam hau chite-iau atao nou eppe. Sau ayamtha nai noin nung singthalouau sam aikü kamshiko.

²“Ajepek ainou ashioloutsün niakü shiküta apa khutsün apemai ashio epitsün nung sau noiküla? Nokpao nouso naiuso mele nouso khako ashiolou nou apa hau sauüh kiuji? Apa salaiu nou ngüso pukhaoli chaothio. Apa uokopchon nousoüh ngüso ahsheih nou khako tsokap khekkü sukpengkü wan.

³Goa da meikü tsüthankü apa akomtsün dalu thapkü khaai khu!

⁴Nung thawaotsün sau noiküla? Ngiolat nou shanau sau mongkiukü noiküla? Ngo, APAOU nou, chongting nai noiküla, naiuso loüh ngo, APAOU nou, aphiting nai noi-e.

⁵“Kumai noitsün goumchi khaiuniahoi nousoüh ngo ti chhin nung epiu; ngüso hatat naiuso ahat nou ngaongao. Nungtiphe ngüso chikü kamsanküta shiji.

⁶Waiyang khaiuniahoi nou ngüso tsak si tsak hachu-ekü oulokongeji.

⁷Paisik khaiunia nou sah langtsün tü ngioji, ‘Meikü chhisaniu!’ Khaiunia sauüh sotsom nyincheikü shanji apaüh sonla kamkü lahtsün tsak nou oulokongji. Ngüsoüh ngioji ‘Sonchio-etsün nung meikü noin’- naiuso ngüsoüh nung sotsom athang nai sonlah nou mongkü lahjei.

⁸“Lüko ni, Israel jü ayathsüotsün, asam ngo chosantsün khaiuniahoi noin, jühai, Abraham thsaosithsoso.

⁹Ngo ni goh athon nouso ainou nialoukü shin; Ngo ni tü alaiuting ainou jonkü ngiom, ‘Ni jü ayathsüotsün noin.’ Ngo ni tsüwanan-lüko ni chosan.

¹⁰Hatkü lanoi- Ngo asamko hakü noin! Ngo asam Goa noin-asam tiühtso lalekkat! Ngo ni hachu-e naiuso ni lokong-e Ngo ni kiplou-e naiuso ni kipsan-e.

¹¹“Sauhai niko mongmatkü noin ngüsoüh tsüshioloukün amiam nou nge-e. Sauhai ni thako ehli au tsalou-e ngüso ean-e

¹²naiuso goumchi ainou tsüepshikü mowane.

¹³Ngo APAOU asam Goa noin; ngo asam lokongkü ngioji, ‘Hatkü lanoi; ngo asam hachu-e.’” APAOU nou ngioji, “Israel ni methso naiuso tsaosilao noin, hatkü lanoi; ngo ni hachu-e. Ni kipsantsün tsak nou, ngo, Israelhai asio Goa noin.

¹⁵Ngo ni atsao pokü noitsün tsonyak sutnetsün jengtsaiu amonting ayan tsak shan-e. Ni king nouso sutne küta nelangkü lothe-e; Choi nouso pukhaoli sutpeke.

¹⁶Ni nungso ahsheih nai soksane; küta ahsheih nou nung kankü khuwane, naiuso nungso ah-ou-ahsheih nou sukpenge. Nungai ni monglinge tiautenai ngo a Goa noin; ni ngo Israelhai asio Goa nou lomsane.

¹⁷“Tilai jü khaiuniasoüh khiam nou da pokü yame, naiuso tilai ngüso aiukhan khiam letsün nou waian-e, nungai ngo, APAOU, nou ngüso misao thala-e; ngo, Israelhai Goa nou ngüso tilaitso tsülean-e.

¹⁸Ngo ti tsüsamkün choi akeng nouso ongko haiu nouso tsangi-e. Naiuso tsamei nousoko haiuthsongan nouso tsangi-e Ngo singtso goh nou khiam temkhao au phokle-e naiuso gohwai nou haiuchetngan iula-e.

¹⁹Ngo Cedar pai nouso, akacia pai nouso, angannyamtsün pai nouso naiuso olip pai nouso singtso goh nai samsani-e. Tsonpai, juniper pai, naiuso Cyprus pai nouso thangkeng nai liutsa langpaili samsani-e.

²⁰Khaiuniahoi nou nung ngo, APAOU nou, shan ta eppe naiuso nge-e. Israelhai asio Goa nou nung thawao-iau shan ta ngelakü noi-e.”

²¹APAOU Israelhai nokpao nou nung ngioji: “Asam mele nouso goa, asam mi kankü shikü ahan, Asam mitha akongting nouso kankü ashi!

²²Nungai ashi küta ti thawao-e nung lüngio, nungaito tilai nung shithawao-e samüh nge-e. Mikhem khako ayanan taoko thawaokü shitsün lüthaiute, küta nungso ti thaiutha ngioji sam hau achite.

²³Samüh asam goa nouso ta nge au ashiau noi nou chhisiya nouso sam hau achite! Amei tso tsak lüchhi tsüdekünai tso tsak akuothe kankü ashi; sam ahat nou tsüdekünai alekkat nou miankü anoi-i!

²⁴Asam si sam chhisiya nouso ti tsünoi; sauhaiüh ni tü amkhamji ngüso achinyan noin.

²⁵“Ajepek ai kihtsün khaiunia tsak ngo chosaniu; ngo apa ajenapki ai yakü khengshiau kankü shi-e. Apaüh nokshing nouso da puchetli, lak saitsün nou puchet nouda ngamkeitsün khekkü ngamkei-e.

²⁶Samüh asam ayamtha nai noin ta mongi-au, ashiau tao nung thawao ta asam sübaoüh ngioji? Asam sauühtso nung thaiutha ngio tsaktso tsüngio; asamüh ngiotsün sauühtso tsülula!

²⁷Nung ngiongem Zion hau chongting chitetsün ngo, APAOU noiküla; Ngo Yirusalemhai ta ngio kiuau ngiongem kantsün tsak hong, ‘Akhaiuniaso shiji! Ngüso tsamai shiji!’

²⁸Tilai ngo goa nouso ongko thapkü noiküla, ngüso sauüh ngio tsaktso tsüngio, ngüso ongko ngo sangtsün ngio ta sauüh thalaau tsüshio.

²⁹Nung goa nouso chikü yaang; ngüsoüh ti chhisanau tsüshio nung sotsom goa nouso tsaosilao naiuso ngüso da oukong ti tsüsun.”