Read Khiamniungan Naga Isa 42 Bible Online

Isa 42 - Khiamniungan Naga bible

Isa 42

¹APAOU nou ngioji, “Sau ou ngo lokongiu ngo chosantsün tsak, sau da ngo mongtsamji, nung jü ayathsüotsün nungko noin. Ngo apa jü onthsoüh miankiu-iu, naiuso apaüh mele pungkü dongai ngiotsüo nou kankü shi-e.

²Apaüh tsüwe-e tsüdekünai apa sangh tsokkü tsüshei-e tsüdekünai sonkeng nai sangh asong nou tsüchite-e.

³Apaüh hondepai shapthiokü noitsün tsak lüko tsülongek-e tsüdekünai in nyaikü noitsün tson tsaktso tsülonyate. Apaüh khaiunia chikü dongai asaita hau ngiotsüo kankü shi-e.

⁴Apaüh ayangtaiu tsüdekünai amongsong tsülaokü noiji; goumchi nai apaüh ngiotsüo nou chhi-e. Kumai noitsün goumchi nousoüh apaüh tsandetsün thaiutha mongchiokü taiuji.”

⁵Goa nou aün nouso seitho küta nung sapengkü wan; apaüh goumchi naiuso nungko kihtsün chikü alengmeikü yamlut, apaüh nungko noitsün khaiunia chikü hau aa naiuso ilo nou kiu. Naiuso lo APAOU Goa nou apa yathsüotsün ta ngioji.

⁶“Ngü, APAOU nou, goumchi nouko ngiotsüo nou chhi süne tsüchhi nung ta thapau asam jon naiuso asam hau oukong kium. Ni tsangkü ngü mele nouso dongai awon nou kankü shi-e; ni tsangkü ngü khaiunia chiküko athalou-e tsak shan-e.

⁷Ni niopek hai niovei sopsat kiu-e naiuso akhothio nai noinso hau khaiuniatsüo nou kiu-e.

⁸“Ngülu APAOU asam Goa noin. Jü ajinka naiuso jü nianlom haoson amao ti goa hau lünou tsüdekünai sotsom hau lünou tsükiu-ha-e.

⁹Ngü khapiam ngiotaiu nouso lo thawaokü shiji. Lo ngü nungso mothawaokün khako lüko tso tsak ayan asam hau chite-e.”

¹⁰APAOU nou tü jih ayan tsak lühanglut; Goumchi chikü nou apa alomsan jih lühang! Asam khiamnok chiai tsakeitsünso apa lülomsan; khiamnok nai noitsün aa thainianthso chikü nou apa lülomsan! Kumai noitsün goumchi ai kihtsünso chikü nou jih lühang!

¹¹Liutsa naiuso noksong nousoko noitsünsoüh Goa lülomsan; Kedar nai noitsün khaiuniahoi nousoüh apa lülomsan! Sela hai noknio nai noitsünsoüh kingchung ainou amongling sang asong nou lüwe!

¹²Goumchi laiukü nai kihtsünsoüh APAOU hau ajinka naiuso alomsan lükiu!

¹³APAOU nou leng tsak khekkü ehli au khuji; apa ehli au mongchiokü naiuso khemloukü noin. Apaüh ehlithang nai wetsün sangh asong nou ehli nai ekhong ngem kiuji; apaüh apa ehso khako apa oukong hanji.

¹⁴Goa nou ngioji, “Atao laiukü ngo nyankü noikü shin; ngo jü khaiuniaso tü tsüthalakü noiküla. Lüko lo ngo chhi nou chhiau atao shisaokü noin; Menyiu tsak methso chet tao oukong kiutsün khekkü ngo sangh asong nou weji.

¹⁵Ngü choi nouso si king nouso lotheane, naiuso khengliu si paisam nouso lomowane. Ngü haiusai tsamei nouso singtso goh au iula-i-e, naiuso khiam temkhao nouso apani-e.

¹⁶“Ngü jü khaiunia niopek hoi nouso ngüso tilaitso tsütsakeidekün yam tsangkü nialoukü khu-e. Ngü ngüso anyakhem nung awon au phokle-e; naiuso ngüso khako tsümeikün goumchi meikü shane. Nungso jü athalou nouso noin, naiuso ngo nungso tsüphiokü kankei-e.

¹⁷Sotsom nouso da monglamtsünso chikü, sauhaiüh sotsom nouso tü ngüso goa ta jonji, ngüso to thangmangkü naiuso amiam asong epi-e.”

¹⁸APAOU nou ngioji, “Anglu, asam noukek khaiuniahoi! Asam niopek nouso, shimkü shikü athaplu!

¹⁹Jü ayathsüotsün tü tekkü ajantso niopek tsüdekünai jü ngiongem kantsün khaiuniahoi tü tekkü ajantso noukek noin süne?

²⁰Israel, ni thatü piakü epiu, lüko nungüh ni ta ti alesan noin? Ni lulaau noukhan nou pokü noin? lüko atsüoting to ni ti lulakü noin?”

²¹APAOU Goa to akipsanau mongchiotsün tsak noin, nungtiphe apaüh apa ngiokhem naiuso atsandetsünso loksanji, naiuso apaüh meshen khaiunia hau nungso tü asuhat-iau mongchioji.

²²Lüko lo apa khaiuniaso komhean-iu; ngüso jin nai monan, naiuso akhotsam nai kiapkü wanan. Ngüso haloau khaiunia tsaktso tsüshikü ngüso kauat naiuso yanhean.

²³Asam ajantsoüh nungtü anglu-e mo? Lo yakü asamüh nungtü paotsangkü anglu-emo?

²⁴Sauüh Israel aplowaniau kiuwan? Samüh sau thako angei sunlo nung APAOU apa pem noiküla! Sam apaüh mongchiotsünli tsükih tsüdekünai apaüh sam hau kiutsün ngiokhem nouso tsüang.

²⁵Nungtiphe apaüh sam hau apa mongmat oukong ngesan-i naiuso athsüoting ehli nai angja-i. In khekkü apa amongmat nou Israel thapekkü nyaikü noiküla lüko samüh ti thawaoji nung tilaitso tsünge; samüh nung ainou titso tsüngelou.