Read Khiamniungan Naga Isa 43 Bible Online

Isa 43 - Khiamniungan Naga bible

Isa 43

¹Israel, Asam shantsün APAOU nou ngioji, “Hatkü lanoi-tiautenai ngo ni kipsane. Ngo anian jünkü jon, ni ngü nou noin.

²Tilai ni khiam a-outing thsatkü khu-e, ngo niko noi-e; asam angja nousoüh ni tsülemlou-e. Tilai ni in nou thsatkü khuji, ni tsüchethe-e; angja athsüoting shitsün nou ni tsütawai-e.

³Tititenai ngo APAOU asam Goa noin, Israelhai asio Goa, sauüh asam kipsanji. Ni hau khaiuniatsüo nou kiuau ngo Ijip, Sudan naiuso Seba kiuwane.

⁴Ngo asam aa nou kipsanau mele nouso athum kiuwane, tiautenai jü khako ni chaiou noin naiuso ngo ni tsüojinkü ni hau asuhat kiuji.

⁵Hatkü lanoi-tiautenai ngo asam ko hakü noin! “Ajepek naiuso ajenap alaiuting ainou ngo asam khaiuniaso tsamai nialoukü shi-e.

⁶Ajenapki nou da ngüso lükhulut-i naiuso ajenapki nou tü ngüso lalolao ta ngo ngio-e. Jü khaiuniaso goumchi aniokün pungkü ainou naiuso laiukü ainou laolokü ashi-i.

⁷Ngüso jü tengkam so noin, naiuso ngühau ajinka kankü shiau ngo ngüso shan.”

⁸Goa nou ngioji, “Jü khaiuniaso mikhem nai lüjon. Ngüso tü niovei po, lüko ngüso niopek; ngüso tü noukhan po, lüko ngüso noukek!

⁹Mele nouso athelu nai shiau lüjon, ngüso goa ongko sübao nou ashiau thaiutha ngiokiu au shio-e? Lo ti thawaoji nung thaiutha nungso sübao nou ngiotaiukü noiküla? Ngüso ayamthakü nai noin ta mitha hanau thaiutha nung goa nouso hau ngüso mitha kankü ashi-i. Naiuso ngüso ngio nouso ngiotsüo ta mitha hanau noin.

¹⁰“Israel khaiuniahoiso, asam jü mithaso noin; Ngo ni ngü yathsüoau chosanji, nung tsangkü asamüh ngü ngekü ngü da monglame naiuso ngo lu Goa noin ta ngela-e. Jü khako ti goa tsünoi, tsünoiküla naiuso laitso tsünoishi-e.

¹¹“Asam kipsanau shiotsün APAOU nou ngolu noin.

¹²Ti thawao-e nung ngo ngiotaiu, naiuso nungthanko ngo asam haloau shin. Gohmao goa tiühtso nung chhisiyakü tsünoi; nung thaiutha jü mithaso asam noin.

¹³Ngo Goa noin naiuso nung asaita noi-e. Jü oukong ainou sau thakhuau tsüshio; Ngo ti chhisiyaji nung sauüh li-ekiu au tsüshio.”

¹⁴Israel hai asio Goa, APAOU sauüh asam kipsanji ta apaüh ngioji, “Asam kipsanau thaiutha, Babilonhai thako ngo süpaihoi tsak honge; Ngo noknio bekhan nouso lothe-e, naiuso nung khaiuniahoi nou wetsün sangh ashapau iula-e.

¹⁵Ngo APAOU, asam ün asio Goa. Israel, asam seithotsün ngo, naiuso ngo asam nokpao noin.”

¹⁶Kümi APAOU nou khiamnok nai khiampek nou thsatkü khuau yam shan.

¹⁷Apaüh ehli tsamkei naiuso mokthso nouso hoi asong akongting süpaihoi alothe kiuau thaiutha niakü khu. Ngüso chikü tilaitso tsüchushikü hau thaiutha loian, ngüso tson nai in nyaitsün ne khekkü chethean!

¹⁸Lüko APAOU nou ngioji, “Asamüh ayanan chhisiya nouso layangsanshi, tsüdekünai pe nai chhisiyatsün thaiutha layanglu.

¹⁹Ngo lo chhiau noitsün chhi ayan noutü thapkü anoi. Nung thawaokü shiji-asamüh lo nung eppe! Ngo singtso goh nou thsatkü yam tsak yame naiuso nungko asam hau haiuthsongan nouso kiu-e.

²⁰Liu thainian nousoüh lüko ngü lomsane; jü achosan khaiuniahoi au khiam kiuau tilai ngo singtso goh nai haiuthso nouso tsangi-e nungai chiu naiuso ostrich waio nousoüh ngü lomsane.

²¹Nung khaiunia nouso ngo jü tengkamau shantsün khaiuniahoi noin, naiuso ngüsoüh jü alomsan jih nouso hange!”

²²APAOU nou ngioji, “Nungti lüko O, Israel, ni ngüko thsülukü noiküla, tiautenai ni ngo tsüamkham.

²³Ni onnemok jahkü amkhamtsün jü dongai kankü tsüshi; ni aloat chaithio nou ngü lomsankü tsüthe. Ngo ni tü chaithio nouso saotsün tsangkü thsale tsükiu tsüdekünai angannyam chaithio saotsün tsangkü ouchankü tsüyang-i.

²⁴Ni ngü hau angan nyamtsün tsütukiu tsüdekünai athainianso atsating nou ngü tsümongtsami. Nunglikoto ni nou angei nousoüh ngü thsale iula-i; ni ayam tsüthakü chhitsün nou ngü ouchankü iula-i.

²⁵Nungti lüko, ni nou angei nouso wankiutsün Goa nou ngo noin, ngo noitsün shioko nung chhiji. Ni nou angei athako ngo tsüyangsan shi-e.

²⁶“Amih kankü ashi, sam mikhem nai khuko! Ni ayam thakü noin ta mitha kiuau amih kankü ashikiu!

²⁷Apaosipoting nousoüh angei nou sunlu; ngü thako asam paosiposoüh angei nou sunlu,

²⁸naiuso anokpaosoüh jü asiothang lochinyan. Nungtiphe ngo Israelhai khako alothe nou kankü shin naiuso ngo jü khaiunia Israel lochilotsao-in.”