Read Khiamniungan Naga Isa 44 Bible Online

Isa 44 - Khiamniungan Naga bible

Isa 44

¹“Jü achosan khaiunia, Yokob thsaosithsoso, ngü yathsüotsün, Israel lo anglu.

²Ni seithotsün APAOU nou ngo noin; ni chettsün tao ainou, ngo ni hachukü shin. Nungtiphe hatkü lanoi; ngo tsüojintsün jü achosan khaiunia naiuso jü ayathsüotsün ni noin.

³“Lekü noitsün goumchi hau khiam ngo kiu-e naiuso waikü noitsün goh hau haiuthso tsangkü ngo shankiu-e. Ngo athsoso khako jü onthso kheplutkiu naiuso athsaosithsoso khako jü ouk kheplut kiu-e.

⁴Ngüso khiam nou khengliu meikü pekkü noitsün khekkü same, naiuso willow pai haiuthso khiam tsangtsün dongko samtsün khekkü noi-e.

⁵“Tsakühjam tsakühjam ta khaiuniahoi nou ‘ngo APAOU thaiutha ta ngio-e’; Ngüso Israel khaiuniahoiko halutau shi-e. Khaiunia pungkü nou meshen phemthso nai APAOU nian ii satlutkü apa chija, ngo Goa ün khaiuniahoi ongko tsak ta jone.”

⁶APAOU, sauüh Israel jimkü nokshingji, nung APAOU Apemshiotsün nou nung ngioji: “Ngo chongting, naiuso phiting, Goa tsaklu; ngütü simkü amao goa tsünoi.

⁷Ngo ti chhikü shin nung amao ajantsoüh chhiau shio-e süne? apem ko chongting ainou atao athon ta thalutkü athawao au noitsün chikü thaiutha sauüh ngiokiuau shio-ela?

⁸Hatkü lanoi, jü khaiuniaso! petao ainou losaokü athawaoau noitsün thaiutha ngo ngiokium ta nung asamüh ngeji, naiuso asam jü mithaso noin. Nungko amao goa noishin süne? Nungko ngo tilaitso tsülutingkü nou oukongting goa ajantso noin süne?”

⁹Sotsom goa shantsünso chikü ti amai tsüsung naiuso nung goa nouso piakü he jantsün nung asapat. Nung goa nouso tü amkhamtsün nouso niopek naiuso ti tsünge- ngüso amiam eppe.

¹⁰Jengtsaiu nou shantsün da amkhamtsün nung alat tsünoi.

¹¹Nung amkhamtsünso pungkü amiam noi-e. Nung sotsom shantsün nung amao tsüde lüko khaiunialu noin. Ngüso shikü ta alilu nai atsa-i ngüso hate naiuso amiam eppe.

¹²Sonlanghaiüh sonpai tsak loküta nung in nou jekkü shanji. Apa pha oukong nou senkhaiuhop kankeikü thioküta aleng ayam nai sungiji. Apaüh nung chhi nai, naiuji, leji, naiuso tanji.

¹³Pai mistri nou pai noutü thatji. Apaüh nung thsamsatkai nou satsankü thaluji, küta nung sonhunsattsün nou hunsatji; naiuso nung khaiunia alengmei sotsom tsak khekkü shansanji, küta nung apa tsam niokun nai taiuji.

¹⁴Apaüh nung shanau liutsa lang ainou cedar pai, lampai tsüdekünai cypres pai nouso kankeiji. Tsüdekünai apaüh laurel pai thomthioküta ah-uo nou sungiau taiuji.

¹⁵Khaiunia nou pai apaitso ajah-ao naiuso apaitso sotsomau shanji. Apaüh apai tsak meshen lamkü noiau in jahkü ta themtsai tsaiji; naiuso nungh paikia amao tsak nou apaüh amkhamau goa tsak shankü nung tü amji.

¹⁶Pai ajantso nou apaüh in jahkü; nyih nou thengji, küta heji, naiuso mong- tsamji. Apaüh meshen lolam küta ngioji, “Nung titi alam naiuso amei noin! Nung in titi aluau lüko amei noin!”

¹⁷Naiuso nung pai apoi nousoüh apaüh sotsom tsak shanji, küta nung khako kauthiokü amkhamji. Apaüh nung sotsom nou tü misaokü ngioji, “Ni jü goa noin-ngü akipsan!”

¹⁸Nungtin khaiunia nou ngüsoüh ti chhiji nung ngeau thatü achek. Ngiotsüo khako ngüso niovei naiuso mong kiapankü noin,

¹⁹Sotsom shantsün khaiunia da “Pai ajantso to ngo in nai jahwaniu, ta ngioau mongyang tsüshiji. Ngo pai ajantso chiai themtsai nou jekkü naiuso nyih nou tsaohekü noin. Naiuso nung pai apoi nousoüh sotsom tsak shan. Naiuso ngo nungko paiyan tsak khako kauthiokü noin.”

²⁰Nungko haoto lo hetsünbao alesan. Apa meshen mainga mong- that mongsai nou ahalouau tsüshio- kü ayam tsüthakü nai nialoukü khuwan. Apa pha mongko semkü noitsün sotsom nou nung goa tsüde ta apa chija tsüngioji.

²¹APAOU nou ngioji, “Israel, nung lüyangsan; ni jü ayathsüotsün ta lüyangsan. Ngo ni ngü yathsüoau thaiutha shan, naiuso ngo ni tilaitso tsübeane.

²²Ni nou angei nouso ngo thengmiakhao yankü khuwantsün tsak khekkü beiyankiu-iu. Jü dongai laokü ashi, tiautenai ni kipsantsün nou ngo noin.”

²³Asam aün nouso akoi nou sangh songkü lüwe! Goh akheiting athang nousoüh sangh asong nou lüwe! King nouso, naiuso liutsa nai noitsün paisam pungkü koikü sangh asong nou lüwe! Apa khaiunia Israel kipsantsün tsangkü APAOU nou apa asong haniu.

²⁴“Ngo APAOU ni kipsantsün; ni seithotsün nou ngo noin. Alum seithotsün, APAOU nou ngo noin. Ngo lu aün nouso sapeng; Tilai ngo goumchi nou shan, sauüh ngü tsühachu.

²⁵Akuo chitetsünso ngo mainga iula-in naiuso khapiam ngio chitetsünso asapat iula-i mongthat mongsai noitsün khaiuniahoi tsüngekün naiuso ngüso ange tsüngekü iula-in.

²⁶Lüko tilai jü ayathsüotsün nou khapiam ngio-e, naiuso ngo tilai jü mongyang hanau ngiongem kantsün tsak hongji, ngo nung khapiam ngio nouso si mongyang nouso thawao-iji. Nungko khaiuniahoi loüh kihshi-e ta ngo Yirusalem tü ngioji, naiuso Yihudahai noknio nouso ayanta lahsan shi-e ta ngiom. Nung noknio nouso alothean ainou sungshi-e.

²⁷Ngiopem tsak ngiotsün tsangkü ngo khiamnok nou apkü iula-in.

²⁸Ngo Cyprus tü ngioji, ‘Jü thaiutha nokshingau nou ni noin; ngo ni hau ti chhi-iau aiuji ni nung chhi-e; Yirusalem ayan ta lahsanshiau naiuso Amkham Tsam athanya nou yaloshiau ni ngiokhem kiu-e.’”