Read Khiamniungan Naga Isa 45 Bible Online

Isa 45 - Khiamniungan Naga bible

Isa 45

¹Sairus nokpao theau APAOU nou chosan! Apaüh Sairus hau mele nouso shiolouau kiu. Nokpao nouso oukong lowanau APAOU nou Sairus hong; naiuso APAOU nou Sairus hau noknio bekhan nouso sopankiu-e. Sairus tü APAOU nou ngioji,

²“King naiuso choi nouso lo-aikü ngo jüpemüh ayam khemkiu-e. Daoson lung nou shantsün bekhan nouso ngo lopekke naiuso ngüso sonpe nelangkü thiopeke.

³Anyakhem ainou chaisiou akauai taiutsün ngo ni hau kiu-e; nungai anian junkü jontsün Israelhai Goa APAOU nou ngo ta ni nge-e.

⁴Ngo chosankü taiutsün khaiuniahoi jü ayathsüotsün Israel tü hachuau ngo ni taiukiuji. Ni to ngo tsünge lüko, ngo ni hau asuhat asong nou kiuwaniu.

⁵“Ngo APAOU noin, amao goa tsünoi. Ni to ngü tsünge lüko, ni potsün oukong ngo ni hau kiu-e.

⁶Khaiunia pungkü goumchi aniokun tsak ainou aniokun tsak saokü nou nungko amao goa sau tsünoi lüko ngo lu APAOU ta ngeau ngo nung chhiji.

⁷Ngo awon naiuso anyakhem nemthso shan; naiuso ngo ouk naiuso akuothe nemthso kankü shiji. Ngo APAOU nou nung apem chhiji.

⁸Maou ainou ah-ou khekkü ngo ashioloutsün honge; nung waoloau goh hau ayam sopkiuji naiuso nung khaiuniatsüo si ngiotsüo nou ponsane. Nung ngo, APAOU nou, thawao-i-e.”

⁹Pulak tsak amao pulak khekkü noitsün nou meshen saitsün nouko ngio khenge some süne? Pulak nou apa saitsün tü apaüh ti chhiji ta sangji süne? Pulak nou apa saitsün khaiunia nou ta chhi tsümon ta namnamji süne?

¹⁰Ajantsoüh meshen posinyiu tü, “Ni ngo nung khekkü tiauta seitho ta ngiosomji süne?”

¹¹APAOU, Israel ün asio Goa, sauüh ashiau noitsün shanji nungüh ngioji; “Jü thsoso thaiutha ngü tü sangau ni ayam tsünoi tsüdekünai ngo ti chhi au noin nung thaiutha ngü hau chiteau tsünoi!

¹²Goumchi shanküta nungko kih-au khaiuniale shantsün nou ngo noin. Jü oukong tsangkü ngo aün nouso sapeng, Aje, alei, naiuso kianthsüo nouso ngo kankeiji.

¹³Ngo jüpemüh jü ayangtaiu thawao-iau naiuso alum ayam nai singthakü taiuau Sairus chhi nai thiokü lothsümon. Apa tsakeitsün yam pungkü ngo lolu-e. Apaüh jü noknio, Yirusalem shanshi-e, naiuso jü khaiunia akhothio nai noitsünso sokshi-e. Nung chhi-iau sauüh apa chai kiukü tsüdekünai apa hau nekhem paopei tsütuh.” Ta nung APAOU Apemshiotsün nou ngiowaniu.

¹⁴APAOU nou Israel tü ngioji, “Ijip hai naiuso Sudanhai memei jengtsaiu ni nou noi-e, naiuso Sebahai konsitheng alaiu nouso asua au the-e; ngüso sonkhiang nou phankü aphiai hoilute. Ngüsoüh akhako kauthiokü shanlou-e, ‘Goa nou asamko hakü noin-apalu Goa noin.

¹⁵Israelhai Goa, sauüh apa khaiunia kipsanji apa to meshen chija pamkü noitsün Goa noin.

¹⁶Sauhaiüh sotsom nouso shanji ngüso chikü amiam noi-e; Ngüso chikü miamsimokü noi-e.

¹⁷Lüko Israel to APAOU nou kipsankü noin, naiuso apa ashioloutsün athontsüyangkü noi-e; apa khaiuniaso to tilaitso amiam nai tsünoi-e.’”

¹⁸APAOU nou aün nouso shan, Goa nou apa noin! Apaüh goumchi nou seithokü sai apaüh nung mongkü naiuso asaita hau seitho. Apaüh nung atheau tsünoikün tsak nai tsüseitho, lüko khaiunia kih-au thaiutha seitho. “Ngo APAOU noin, loüh amao goa tsünoi, ta ngiotsün apa noin.

¹⁹Ngo akauai tsüchite, tsüdekünai jü ayangtaiu tsangpokkü tsütaiu. Israel khaiuniahoi nou atheau tsünoikün goumchi nai ngo yamau jü thaiutha tsüpo. Ngo APAOU noin, naiuso ngo ngiotsüo nou chiteji; Ti ayam atha nou noin nung ngo ngela-ikü taiuji.”

²⁰APAOU nou ngioji, “Ashikam, melethsoso, nokshing loiantsünko aasantsünso chikü; atheluau thaiutha asam chija akamshi! Sauhai ngüso sotsom nousoko hoiji naiuso ngüso kipsanau tsüshiokün goa nouso tü misao saoji nung titso tsüngetengkün khaiuniahoi!

²¹Asam mih kankü shikü akiu, mitha nouso tsak si tsak ta lüngemi. Atao laiukü aita sauüh athawaoau khapiam ngiokü noiküla? Nung ngo, APAOU, Goa sauüh apa khaiuniaso kipsan apa tsüde süne? Nungko amao goa tsünoishi.

²²“Goumchi khaiuniahoi chikü lo jü dongai laokü ashi küta kipsankü lünoi! Nungko ngo lu Goa noin.

²³Jü athaloutsün nung ngiotsüo noin, naiuso nung tsüli-eshi-e. Nung ngo jüpemüh mongkü thalouji; Khaiunia pungkü shi-e küta jü khako kau-e naiuso ngü ta saitha noiau ngiomongshinge noi-e.

²⁴“Ngüsoüh ngü tsangkülu ashioloutsün naiuso oukong nou epji ta ngio-e; lüko ngü ta chinyantsün chikü nou amiam nai angja eppe.

²⁵Ngo, APAOU nou, Yakob thsaosithsoso chikü kipsane, naiuso ngüsoüh ngü hau alomsan nou kiu-e.”