Read Khiamniungan Naga Isa 46 Bible Online

Isa 46 - Khiamniungan Naga bible

Isa 46

¹“Babilon ün goa nouso thaiutha nung athon noin! Bel naiuso Nebo da ataojam amkü noiküla, lüko ngüso kamshiküta loto gadohoi chiai kanlutiu, tanatkü noitsün thainian thaiutha ngüso thsale tsak iula-iu.

²Sotsom nousoüh ngüso chija kipsanau tsüshio; ngüso thalouküta kankü khuwaniu. Nung Babilon ün goa nouso thaiutha athon noin!

³“Ngütü anglu, Yakob thsaosithsoso, naiuso poikü noitsün jü khaiunia chikü. Ni achet tao ainou ngo athaiutha paotsangkü shin.

⁴Ni sonkü khaiuou mothaiuwankün lektso ngo a Goa noin naiuso ni paotsange. Ngo ni shan naiuso ni ta paotsange ngo ni hau ahachu kiu-e naiuso ni kipsane.

⁵APAOU nou ngioji, “Ni ngü saoko welu-e-e?” “Nungko ngü khekkü ajantso noin süne?

⁶Khaiuniahoi nou ngüso nekong sopji küta chaiou lakkeng losanji; ngüsoüh tangkason nou tsoi chinai thatji. Sotsom goa tsak langau ngüsoüh sonlang khaiunia tsak mephaiu kiukü taiuji; küta ngüso nung khako kauthiokü nung da amji.

⁷Ngüsoüh nung sotsom nouso ngüso sangdongkhaio ai loklutküta kankü khuji; naiuso nung athang tsak ko taiuji nungko nou lemlemau tsüshiokü tsakülu noianji. Ajantsoüh nungtü misao lonai, nungüh tsüthalaji tsüdekünai akuothe ainou apaüh tsükipsanji.

⁸“Nung lüyangsan, asam angeihoi; ngo ti in chhin nung da lüyanglu.

⁹Atao laiukü nai ti thawaokü noiküla; nung lüyangsan; Ngo lu Goa ta lüngelu naiuso Ngo khekkü amao tsaktso tsünoi.

¹⁰Thawaokü noitsün thaiutha chongting ainou ngo khapiam ngiom; laiukü aita ti thawao-e nung ngo ngiokü noiküla. Jü ayangtaiu nouso tilaitso tsüphio-e, naiuso ngo ti chhi au mongchioji nung ngo alum chhiji ta ngo ngiokü noiküla.

¹¹Ajepek ainou shiau ngo khaiunia tsak tü jonji; apa nung letche tsak khekkü langkü saoji naiuso ngo ti yangtaiu nung apaüh chhikheme. Ngo nung ngiowaniu, naiuso nung chhi-iu.

¹²“Ashioloutsün epau laiukü noishin ta yangtsün, asam mongkonghoi, ngü tü anglu.

¹³Ngo ashioloutsün ajekhaiu shimkü kankü shiji- nung thatü laiukü tsünoi. Jü ashioloutsün nung tsangankü tsünoi-e. Ngo Israel kipsane, nungko Israel hau asuhat nou kankü shi-e.”