Read Khiamniungan Naga Isa 47 Bible Online

Isa 47 - Khiamniungan Naga bible

Isa 47

¹APAOU nou ngioji, “Babilon anokpao noikham ainou asao, küta goh ai pu ongnai anoi. Atao jam ni asangting meso tsak, tsüshiohekün noknio tsak khekkü noiküla, lüko ni loto ashethop naiuso sanglingkü tsüdeshi! Ni lo sua tsak noin!

²Asutnetsün lung alou! won nou asutne! Ni nou akhojeitsün ne alowan! Aneshe amei nouso angiowan! Haiuthso nouso yankü khuau anejenkhio nouso akhapsan!

³Khaiuniahoi nou ni tsosa eppe; ngüsoüh ni nyaplokü naiuso amiam nai eppe. Ngo phao nou sane, naiuso sauüh ngü tsüloyange.”

⁴Israel hai asio Goa nou sam soktham apa nian APAOU Apemshiotsün noin.

⁵APAOU nou Babilon tü ngioji, “Ni ngio tsüsingiokü anyakhem nai lünoi; loto mele nouso ün menyiu nokpao ta ngüsoüh ni tü tsüjonshi-e!

⁶Ngo jü khaiuniaso ko mongmatkü noiküla; Ngo ngüso tü ngü ün tsüdeli kankei: Ngo ngüso a-oukong nai thiowan, naiuso ni ngüso asunhai saokü atsüojinyang tsülepkü thatü thsüokü kankei.

⁷Ni asaita menyiu nokpao tsak noi-e ta yang, naiuso nung chikü athon nai titi noi-e ta tsüyang naiuso mong nai mongkü tsülou.

⁸“Nung tü anglu, asam akoisilom tü tsüojintsünso, asam aaloukü naiuso kipsankü noin ta yangtsünso. Asam Goa li songkü noin naiuso loüh asam khekkü amao tsünoishi ta ngiotsünso. Ni tilaitso jihi tsüiula-e tsüdekünai thsohai mowantsün tsangkü asapat angja tsünoi-e ta yang.

⁹Lüko jamaolu, nyitso kolu, nungne nemthso ni da thawao-e. Ni alonga chhi apem kankei lüko, ni atsammongpo naiuso athsoso mowane.

¹⁰“Tiautenai ni tsümeikün ayang nai ni atsüo ta monglam; sauühtso ni epau tsüshio-e ta ni yangkü noiküla. Amongthat mongsai naiuso ni nou ange nou ni tsüthakün yamai nialükhun, naiuso ni achija ngiom, ‘Ngo Goa nungko ngü khekkü amao tsaktso tsünoi.’

¹¹Akhako akuothe nou shi-e, naiuso ni alonga chhitsün tsakühtso nung lolaoau tsüshio. Akhako alothe nou alekta shi-e ni tilaitso mea tsümeankü nou akuo nou ni lothe-e!

¹²Ni nou sonsi een athesan chhisiya naiuso alonga chhitsün ni oum taoko yakü chhikü shitsün ko ni lütsa. Tsüngean nungso athaiutha ko alesan noiau shiom; tsüngean ni meshen ehoiso lohat louau shiom.

¹³Ni alotsüo eplüko ni ti tsüli-esan. Loto aün nouso thatpektsünso, naiuso kianthsüo nouso tü thaptsünso naiuso ni tü alei pungkü akuo ngiokiutsünso, naiuso ah taothat thaisantsünso shiküta ni lükipsan-i.

¹⁴“Ngüso anelang tsokap nouso khekkü noi-e, küta nungso in nou chetheane! Ngüsoüh ngüso pem lüko kipsanlouau tsüshio-e- ngüso thaiutha nung innyai thatü thsüokü jekkü noi-e, alamhe au injahtsün khekkü tsüde-e.

¹⁵Ni aakih chikü kianthsüo thapkü thaisantsünsoüh ni hau chhikiu ao ameiting nou nung noi-e. Ngüso chikü nou ni wanküta momo yamai khu-e, naiuso ni kipsanau sautso poikü tsünoi-e.”