Read Khiamniungan Naga Isa 48 Bible Online

Isa 48 - Khiamniungan Naga bible

Isa 48

¹Nungtü anglu, Israel khaiuniahoi asam Yihuda ainou chitsinyimtsünso: Asamüh APAOU nianko ngiomong shingkü Israelhai Goa tü amkhamji ta ngioji- lüko ni ngiotsün ngio tsaktso atsüotsüde.

²Külüko ni asio noknio paopung ta ngioau bülomji. Naiuso Israel Goa APAOU Apemshiotsün nian da monglamji.

³APAOU nou Israel tü ngioji, “Atao laiukü aita athawaoau ngo ngiom; nungai alekta ngo nung thawao-in.

⁴Ni mongkong, sonli ajüoche naiuso tiko tsüyappelükhuntsün daoson lung ta ngo ngekü noiküla.

⁵Nungtiphe akhako shiau nou thaiutha laiukü noikü aita ngo khapiam ngiom, nungh ni nou sotsom nouso si paishan tsangkü thawao-in ta tsüngio-iao thaiutha welut.

⁶“Ngo khako ngiotsün chikü lo thawaokü shi-iu; nungtiphe jü khapiam ngio nung thakü noin ta ni amongai louau noin. Ngo nung thaiuko atsangshei tsükiukün, chhi nouso lo ngo asam hau ashiau chhi ayan chite-e.

⁷Lolu ngo nung thawaoau shanji: ayanan taoko nai nung khekkü ti thawaokü tsünoi. Nung thawaokü noitünto, nung chikü thaiutha ni ngekü noiküla ta ngio-e.

⁸Ni da amonglamau tsüde ta ngo ngekü noiküla tiautenai ni asaita khengshikü noitsün ta ngekü noin. Nungshioko ni nung tilaitso tsülulakü noiküla, nungtiphe anoukhan ai nung ngio tilaitso tsüshi.

⁹“Khaiuniahoi nou jünian lomsanau nou shioko, ngo jü amongmat ngekü hejeikü noin; ngo nung ni tsülotheanau lolaokü wan.

¹⁰Tangkason nou in nyai nai losangtsünli ngo ni da in nai angjatsün tsangkü thelu-iu. Lüko ngo ni tiau tsümeikü epsan.

¹¹Ngo ti chhiji nungto jü thaiutha au chhiji- ngo jünian asutsühatikü tsütaiu-e tsüdekünai sauhautso ajinka haoson tsükiu-e nungh ngü nou, naiuso loüh ngü noulu noi-e.”

¹²APAOU nou ngioji, “Ngo chosantsün khaiunia, Israelhai, ngü tü anglu! Ngo Goa, chongting, phiting, Goa tsaklu!

¹³Jü phaüh nung goh athanya nou shan naiuso aün nouso sapengkiu. Tilai ngo goh naiuso maou jonji, ngüso jamaolu kamkü shiji.

¹⁴“Asam chikü akamshi naiuso anglu! Khaiunia sau ngo chosan, apaüh Babilon kome ta goa sauühtso ngesankiuau tsüshio; ngo apa hau ti chhi-iau mongchioji apaüh nung chhi-e.

¹⁵Apa jonsan küta chitetsün nou ngo noin; ngo apa niashikütün phiai apa hau ashioloutsün kium.

¹⁶“Lo asam jü dongai shimkü ashi naiuso ngo ti ngioji nung anglu. Chongting ai yakü ngo khakhakü chite-iu, naiuso jüngio nouso atsüo asaita thawaokü shin.” (Lo Akhengting APAOU nou ngü hau apa onthso kiuküta ngü hongiu.)

¹⁷Israel hai asio Goa, APAOU sauüh asam kipsanji, apaüh ngioji: “Ni meiao naiuso ni hau tsandeau mongchiotsün tsak nou naiuso ni khuau yam hanau nou APAOU a-Goa ngo noin.

¹⁸“Asamühlu jü ngiokhem nouso angtünto tilaitso tsüaplüshitsün haiuthso tsak khekkü asam thaiutha ouk nouso tsangkü noi-ela! Naiuso haiukuk nai khiampek peksantsün khekkü, ashioloutsün asam dongai shikü noi-ela.

¹⁹Loüh athsaosithsoso khiamnok goh nai, tsüwekhemtsün singtsoli noilüsao, naiuso jü khako apa nian tilai tsülomoau mongkü shanlüsao.”

²⁰Babilon ainou lüshikhuwan, khaiuniathsoli lükhu! “APAOU nou apa yathsüotsün Israel kipsaniu!” ta sangh asong nou ngem amei monglingkü wekü alumai lüngela-i.

²¹Tilai APAOU nou apa khaiuniaso ajek, awai singtso goh nouso yankü nialoukü khu, ngüso khiam nou lekü tsüangja. Apaüh ngüso thaiutha lung ainou khiam sungi; apaüh lung lopaikü sopsat, naiuso khiam tsangkü shin.

²²“Nungko angeihoi thaiutha aalou tsünoi,” ta APAOU nou ngioji.