Read Khiamniungan Naga Isa 49 Bible Online

Isa 49 - Khiamniungan Naga bible

Isa 49

¹Ngü tü anglu, laiukü nai noitsün mele nouso, asam sauhai laiukü nai kihji anglu! Ngo mochetkün khako, APAOU nou ngü chosan naiuso ngü apa yathsüo-iau taiukiu.

²Apaüh jüsontham ngio nouso sah amongtingli iula-in. Apa pha nou apaüh ngü sojei. Apaüh ngü akopau khemtaiukü noitsün ajeting uokopchon tsak khekkü shan.

³Apaüh ngütü ngiom, “Israel, ni ngü yathsüotsün noin; ni shioko, khaiuniahoi nou ngü lomsane.”

⁴Ngo ngiom, “Ngo chhin, lüko nung tititso asapat! Ngo jü oukong kankei, lüko titso tsüchhisan,” Nungti lüko jü mih jüosanau ngo APAOU da monglamau shioji; ngo ti chhiji nung thaiutha apaüh ngü hau amai kiu-e.

⁵Pengpunkü noitsün Israel hai, apa khaiuniaso müjam niakamshiau apaüh ngü apa yathsüoau shankiu, nung APAOU nou ngo mochetkün khako chosanankü noiküla. APAOU nou ngü hau asuhat kiuji apa jü oukong shitsün noin.

⁶APAOU nou ngü tü ngiom, “Jü ayathsüotsün, ni chhiau ngo chhi asong taim. Israel khaiunia sauhai poisankü noin, asam songtsün müjam laoshiau noulu tsüde, lüko goumchi khaiunia chikü kipsanau thaiutha ngo ni mele nouso khako awon tsak noi-i-e.”

⁷Israel ün asio Goa naiuso akipsantsün nou ngioji, khaiunia nou thatü thsüokü lochikiutsün, sau da mele nousoüh chinyanji naiuso nung nokpaohoi ayathsüotsün noin; apaüh ngioji: “Nokpaohoi nousoüh ni sokkü eppe naiuso ngüsoüh asuhat kiuau thatü nyapkü kauthio-e.” APAOU nou apa yathsüotsün cholou nou shioko nung thawao-e; Israel ün asio Goa nou apa athalou nouso kankeiji.

⁸APAOU nou apa khaiuniaso tü ngioji, “Tilai ni kipsanau atao nou shi-e, ngo ni hau atsüojinyang han-e naiuso ahachu thaiutha ni wetsün thala-e. Ngo ni tü hükü noi-e naiuso kiplou-e naiuso ni tsangkü khaiunia chikü ko athalou-e tsak shan-e. Lo leankü noitsün agoumchi ko ngo loühjam ni kih-ishi-e.

⁹Akhothio nai noitsünso tü ‘iwonkü lükhu!’ naiuso anyakhem nai noitsünso tü, ‘Aawon dongai ashi!’ ta ngio-e. Ngüso king nouso chiai thsan tsamhetsün onnemok hoi khekkü noi-e.

¹⁰Naiuso loto ngüso tilaitso tsünaiusile-shi-e. Aje naiuso singtso goh ajek nou ngüso tsütawai-e, tititenai ngüso tü tsüojintsün tsak nou ngüso niakei-e. Apaüh ngüso haiuthso khiam dongai nia-e.

¹¹“Ngo king nouso yankü yam apun tsak yame naiuso jü khaiuniaso tsakei-au thaiutha yam tsak khemkiu-e.

¹²Ajenap si ajenapki naiuso Ajepekki Awon ainou naiuso alaiuting ainou jü khaiuniaso shi-e.”

¹³Jih lühang, aün nouso! Oh goum, amongling thaiutha sangh asong nou lüwe! king nouso hau jihang nai lüwe-i! APAOU nou apa khaiuniaso mong aalou-i-e, naiuso apa ün omhe khaiuniahoi khako apa atsüojinyang noi-e.

¹⁴Lüko Yirusalem khaiuniahoi nou ngiom, “APAOU nou sam lethiowaniu! apaüh sam bethiowaniu”

¹⁵Nungtiphe APAOU nou thalaji, “Menyiu tsaküh apa thsoting beanau shio-e süne? naiuso apaüh chetkiutsün methso tsütsüojine süne? Menyiu tsaküh meshen thso bean lüko ngo ni tilaitso tsübean-e.

¹⁶Yirusalem, ngo ni tilaitso beanau tsüshio! Ngo anian jü phamong da satlutkü taiu.

¹⁷“Sauhaiüh ni shanshiau noin ngüso liukü shiji, naiuso sauhaiüh ni lothean nungsoüh leankü khuwane.

¹⁸Lemkü lüthap küta tilüsong thawaoji nung tü lülu!- Akhaiuniaso kamshikanji- naiuso ngüso adongai shiji! Tsammongnyiu tsak apa chaiou tü bülomtsünli, ngo atsüoting aa Goa noin ta akhaiuniaso shioko ni monglinge.

¹⁹“Agoumchi nung lotheankü naiuso akeng leankü noiküla- lüko lo sauhai nungko kih au shiji ngüso thaiutha nung thatü henkü noi-e. Naiuso sauhaiüh ni lothekü lean ngüso ni ainou laiukü jetekü wane.

²⁰Akhaiuniaso sauhai akhothio taoko chet ngüsoüh ajekhaiu tsak ko ni tü ‘Nung gohthang thatü henkü noin nungtiphe samüh loüh akih- au tsampai piakü poji ta ngio-e!’

²¹Nungai ni amongpemai ngio-e, ‘Nungso thsoso chikü sauüh ngü hau chetkiu? Jü thsoso mowan naiuso loto tsükih shi-e. Ngo koman küta kothiokü noiküla, nungaito nung thsoso sauüh tsadsan? Ngo pemsa leankü noiküla- nungaito nung thsoso ti ainou shin?’”

²²Akhengting APAOU nou apa khaiuniaso tü ngioji: “Ngo mele nouso hau nehan nou hane, nungai ngüsoüh athsoso tsamai nialoukü shi-e.

²³Asam thaiutha nokpao nouso pohoi khekkü, naiuso menyiu-nokpao nouso nyiuhoi khekkü noi-e. Ngüsoüh asam khako nyapkü kau-e naiuso asam lomsane; asam thaiutha ngüsoüh ngüso ün asuhat nyaploukü hane. Nungai asamüh ngo APAOU ta nge-e; sauhaiüh jü ahachu ta taiuji ngüso tsümiami-e.”

²⁴Süpai tsak phamongko aloatau noitsün ni aplouau shio-e süne? Tsüdekünai oukong tsaküh khotaiu nouso- ni kipsanau shio-e süne?

²⁵APAOU nou thalakü ngioji, “Ti athawao au noin nung tongtü khekkü noin. Süpai tsak ün akhothio nouso kankü khuwane, naiuso oukong nou aloatau noitsün nung thalou-e. Ni ko litsünso thako ngo li-e naiuso ngo athsoso kipsane.

²⁶Ni tü thangmangtsünso ngo tsak si tsak loate-i-e; ngüso achaoate nou tukkate naiuso mongkia-e. Nungai khaiuniale chikü nou asam kipsanküta khaiuniatsüo iula-itsün nou ngo APAOU noin ta ngela-e. Ngo Israel ün oukongting Goa ta ngüsoüh ngela-e.”