Read Khiamniungan Naga Isa 5 Bible Online

Isa 5 - Khiamniungan Naga bible

Isa 5

¹Jühai naiuso apa sainaoshep eiu ün jih tsak, nung jih ngo ni tü hang nai anglu. Jühaiüh thatü tsakü noitsün king goh tsak nai sainaoshep eiu tsak ah taim.

²Apaüh goh nou thaiuküta lung nouso yaman, nungko apaüh sainaoshep ameiting nou thomthio. Nungso tü ehü au thaiutha apaüh koipuo tsak lahshan, naiuso nungko sainaoshep nunpekau khan tsak thaiu. Apaüh sainaoshep nouso shemiau thaiutha taiukü noi, lüko nung sainaoshep apem ehejek noiküla.

³Nungtiphe lo jü haiüh ngioji, “Asam khaiunia sauhai Yirusalem naiuso Yihuda nai kihji nungsoüh jü sainaoshep eiu je jetko mi akhemkiu.

⁴Ngo nung thaiutha ashio tsüepkün tso noin süne? Nungaito ngo yangkü taiutsünli tiauta sainaoshep amei tsüdekü ehejek sainaoshep eiusanji?

⁵“Jü sainaoshep eiu tü ngo nungti chhiau noin: ngo nung lemkü noitsün tsaosisiam nouso yanane, nung pejei- taiutsün pe nouso lotheane, naiuso nung liu thainian hau heani-e naiuso ngamkei-i-e.

⁶Ngo nung sang nouli mowani-e. Ngo nung sainaoshep nou ta tsüthsome naiuso goh nou tsüphenlute. Lüko tsao nouso naiuso sang nouso hau nung meijeiani-e. Ngo nung chiai ah oulut-iau theng- mia hau ayam tsüsopkiu-e.”

⁷Israel to APAOU Apemshiotsün ün sainaoshep eiu noin; Yihuda khaiuniahoi nung apaüh thomthiotsün sainaoshep auo nouso noin. Apaüh ngüso ainou amei chhi nou epau yangtaiuküla, lüko nungliko ngüsoüh she nou lopeng. Apaüh ngüso ainou ayamtha nou epau yangtaiu, lüko ngüsoüh angjakiutsünsoüh ngiotsüo thaiutha we.

⁸Tiautenai asam inyate! Asam phamongko lo ti taim nung khaiuai asamüh goh naiuso tsam nouso piakü tuhji. Lo tsütsangkü saulünou akih au athang tsünoishi-e, naiuso goumchi nouko ni apemsalu shisinge.

⁹APAOU Apemshiotsün nou ngiotsün ngo lulakü noiküla. “Nungso tsam amei, asong nouso lotheankü kengane.

¹⁰Sainaoshep auo gohthat hektar nimeko samsantsün nou theng liter kheilu yamsane. Chonglam lelu nyikong che nouko chonglam liter chekü petjeilu yamsane.”

¹¹Asam inyate! Asam thengshiu ahom beeta tsalouji, naiuso asamüh theng tukkü ahsham saokü atao wanji.

¹²Asam sümai taoko asamüh pha nou khongtsün kokiang, pha nou saiutsün kokiang, naiuso poipoi nouso naiuso theng kankeiji. Lüko APAOU nou ti chhiji nung asamüh tsüngela,

¹³nungtiphe asam akho- thioau kankü khuwane. Asam aheihoi nouso naiusile nou eane, naiuso hoi nouso khiamle nou eane.

¹⁴Eanhai goumchi ngüso thaiutha naiukü; naiuso nungh atao athattaiu tsüyangkü meshen son sopkü noin. Nungüh angemtsün khaiuniahoi nouko hakü Yirusalem hai asonghoi nouso miolianji.

¹⁵Khaiunia pungkü amiam noi-e, naiuso sauhai bülomkü noiküla ngüso tsübülomshi-e.

¹⁶APAOU Apemshiotsün nou apa ün asong ayam thakü chhitsün tsangkü hanji, naiuso apa khaiuniahoi ta thaisantsün tsangkü apaüh apa ün asio nou tsangsheikü sungkü hanji.

¹⁷Noknio nouso lotheantsün thangko onnemokthso nousoüh khengliu sangpon nou tsamhe-e naiuso wonthso nousoüh thsanyan nou eppe.

¹⁸Asam inyate! Tiautenai asam angei auoke ainou lothatkü khaiu- niatsüo iulakü thakhuao tsüshio.

¹⁹Asamüh ngioji, “APAOU nou apaüh chhi-e ta ngiotsün nung chhisiya au liuliukü athe, nungai samüh nung da thapau shio-e. Israel ün asio Goa hau apa ayangtaiu kankü achhi-i. Apa mongpemai ti noin nung samüh thapluko.”

²⁰Asam inyate! Tiautenai asamüh tsümeikün tü amei ta naiuso amei tü tsümei ta jonji. Asamüh anyakhem nou awon hau li-eji. Asamüh ti akhosak noin nung anyaothing ta, naiuso ti anyaothing nung akhosak hau shanji.

²¹Asam inyate! Tiautenai asamüh meshen chija mongthat mongsai noitsün ta yangji, naiuso meshen chija angelatsün noin ta yangji.

²²Asam inyate! Asam thengmeng ün lenghoi noin! Tilai heshiu-e, nungai to mongnyan naiuso ahat tsünoikün shiji!

²³Lüko nekhem paopei tsak shioko asamüh aphio khaiunia nouso sokthamji, naiuso asamüh aphio tsünoikün khaiuniahoi apen epau noitsün ainou loyangji.

²⁴Nungtiphe lo, tsokap naiuso khengliu wonantsün jah anji nung khekkü asam eiu nouso choiane, naiuso asam thsanyan nyimsantsünso wonane naiuso ahsheih nou shipkü khuwane, tiautenai asamüh Apem- shiotsün APAOU, Israel ün asio Goa, nou sam hau tsandetsün tsüloukü wanan.

²⁵APAOU apa khaiuniaso ko mongmat naiuso ngüso lohatau apa pha loksan. King nouso saiusaiu-e, naiuso sauhai eankü noin nungso mea yamkheng nouso ai beisikinli leane. Lüko APAOU ün amongmat tsülao-e, naiuso ngüso lohatau apa pha tsülaokü loksankü noi-e.

²⁶Laiukü nai noitsün mele tsak hau apaüh ii tsak kiu-e. Apaüh ngüso ta goh athon ainou kamshiao poipoi nou matkü jone. Naiuso nungko ngü- so thata liuliukü naiuso khaolaokü shi-e.

²⁷Ngüso ongko sautso tanatkü tsüiula-e, tsüdekünai tsükhia-e. Ngüso tilaitso niotsüngao tsüdekü- nai tsüsaila. Omkhi tsaktso tsütham, tsüdekünai hokkhut auo tsaktso tsüchan.

²⁸Ngüso oukopchon nouso monkü noin, naiuso ngüso uokoppai nouso akopau khemkü noin. Ngüso mokthso chan nouso sonli kongkü noin, naiuso ngüso tsamkei hok nouso ahsheih khekkü iula-e.

²⁹Süpaihoi nouso chongkhaohoi thainian loatküta ngüso ainou sauühtso kankü khuao tsüshio- shitsün tao ngaotsünli ngaoji.

³⁰Tilai nung ajekhaiu shi-e, ngüsoüh khiamnok khiampek sang- ngemli songkü Israel khako ngao-e. Nung goumchi nou ta athaplu. Anyakhem naiuso angja! Awon nou anyakhem nou mioliankü noin.