Read Khiamniungan Naga Isa 51 Bible Online

Isa 51 - Khiamniungan Naga bible

Isa 51

¹APAOU nou ngioji, “ngü tü anglu, asam akipsanau aiutsünso, asam jü dongai ahachu thaiutha shitsünso. Asam lung sübao ainou shin, naiuso khan a-outing sübao ainou thaiusan nung lüyanglu.

²Asam paosipo, Abraham, naiuso Sarah, sauhai ainou asam chetsinyim nung lüyanglu. Ngo Abraham jon taoko, apa methso tsühakü noiküla, lüko ngo apa hau methso ouk kiu küta apa thsaosithsoso shingkü khu-in.

³“Ngo Yirusalem hau atsüojinyang hane, naiuso nung alothean noknio nouko kihtsün chikü hau hane. Apa gohthang nung singtso goh tsak noilüko, Eden nai ngo aimong tsak shantsün khekkü ngo nung aimong khekkü shane. Nungko alomsan jih nouso si ngü tü nianlomkiu nouso naiuso koikü monglingetsün noi-e.

⁴“Ngü tü anglu, jü khaiuniaso, ngo ti ngioji nungtü anglu: Ngo jü atsandetsün nung mele nouso hau kiuji; jü ngiokhem nousoüh ngüso hau awon kankü shi-e.

⁵Ngo liukü shi-e küta ngüso kipsane; jü ashioloutsün atao shimkü noin. Mele nouso khako jüpemüh nok-shinge kumaikü noitsün goumchi nousoüh Ngo shitsün ta taiuji; ngüsoüh ngü tü ngüso kipsanau yangkü taiuji.

⁶Aün nouso tü ngüsankü athap; naiuso goumchi nou ta athaplu, aün nouso inkhaoli mowane; goum nou netheli nyiane; naiuso nungko noitsün khaiunia nouso chinyili eane. Lüko akipsan sübao ngo liukü kankü shiji nungto asaita noi-e; Jü ashioloutsün nung athonting noi-e.

⁷“Ngü tü anglu, asam ayamtha nou ngetsünso, Jü ngiokhem mongpem nai taiutsünso. Tilai khaiunia nou thute naiuso lochilotsao-e, asam hatkü lanoi.

⁸Mat nou sopheantsün neshe khekkü ngüso mowane! Lüko akipsan sübao ngo kankü shiji nungto asaita noi-e; naiuso jü ashioloutsün nung vetao chikü thaiutha noi-e.”

⁹Achu, APAOU, küta sam ahachu! A-oukong lükankei küta sam akipsan; Pe taoko ni chhitsünli nung lükankei. Khiamnok nai oukong thainian Rahab nung ni nelangkü tsütapne süne?

¹⁰Sauhai kipsanji, ngüsoüh yankü khuau thaiutha, asamüh khiamnok lu ap naiuso khiamnok yankü yam seitho.

¹¹Ni sauhai kipsan ngüsoüh monglingkü jih hangkü, naiuso wekü Yirusalem sao-iu-e. Ngüso angja omhe ainou naiuso amongkia ainou, athontsüyangkü aalokü noi-e.

¹²APAOU nou ngioji, “Asam oulokongtsün Ngo noiküla. Ean khaiunia lon asam tiauta hat-e, nungto aakih nou khengliu chiai phopkü tsüde?

¹³Sauüh aün nouso sapengküta goum nou athanya shan, nung asam shantsün APAOU nou asamüh beaniuso? Asam mongmatkü thangmangtsünso lon asam asaita tiau hatkü noi-e? Sauhaiüh asam lomowanau khemkü noin, ngüso amongmatüh asam tü tsüthantan-e.

¹⁴Khotaiukü noinso lo shakta sokkan-e; ngüso aakih laiukü kih-e, naiuso ngüsoüh potsün eheshiu apem eppe.

¹⁵“Ngo APAOU asam Goa noin; Ngo khiamnok nouso lothsümonküta, khiampek nouso ngao-iji. APAOU Akongteng nung Jü nian noin!

¹⁶Ngo aün nouso sapengküta goum athanya nouso shan; Ngo Yirusalem tü, ‘Ni jü khaiunia noin ta ngiom! Ngo nihau jü atsandetsün kium, küta Jüpha nou ni soloukü taiuji.’”

¹⁷Yirusalem, athsümmon! Achija tsakü achu! APAOU amongmat nai ni hau ashiu au thengkam kium; küta ni nung angja thengkam shiuwaniu, nungüh ni chepchep khukhukü iula-in.

¹⁸Ni niakeiau nungko tsaktso tsünoi, ni pha nai thaloukü tinkei-au asam ongko tsaktso tsünoi.

¹⁹Akuothe chhisiya nime nou ni da thawao-iu; Ehli tsangkü agoumchi lothe, naiuso akhaiuniaso naiuat. Nungko ni hau atsüojinyang hanau tsaktso tsünoi.

²⁰Yamkau pungkü nai akhaiuniaso tsaosilao tsangkü ngüso nung uokop khaiunia tsak jin ko thaloutsün jinchai tsak khekkü noin. Ngüsoüh Goa amongmat oukong ngesaniu.

²¹Asam angja omhetsün Yirusalem hai asam thengtuk haili chepchep khukhukü tsakeitsünso.

²²APAOU Goaüh ni kiploukü ngioji, “Jü amongmat taoko ni hau kiutsün thengkam ngo kankü khuwanji. Ni chepchepkü kei-itsün theng loto ni tsüshiu shi-e.

²³Ngo nung asam tü thangmangtsünso sauhaiüh asam yamkheng nai sai-in küta asam da beisikinli hok nou ngamkeikü noiküla nungso hau kiu-e.”