Read Khiamniungan Naga Isa 52 Bible Online

Isa 52 - Khiamniungan Naga bible

Isa 52

¹Yirusalem lükong naiuso loüh songkü lüthe! Goa ün asio Noknio, ni aleng amei neshe lütholou! Loto tsüsiokün naiuso tsütippankün abekhan ai tilaitso tsünapshi-e.

²Achija pukhao lüsowan, Yirusalem! pukhao ainou tsakü athsüo küta anokpao noikham nouko anoi! Achija ni ketaiu nou aochen lüsokkan, O akhothiotsün Zion ün khaiunia nouso!

³Akhengting APAOU nou apa khaiuniaso tü ngioji, “Ni tilai sua iulakü noiküla athaiuthako ti chai tsütham, nunglilu asam khaiuniatsüo iula-iau ti chai tsüthame.

⁴Tilai asam Ijip goumchi ai khu, nungai asam gohmao khaiuniahoili kih-au khun, asamüh nung asamüh mongchiotsünli chhin. Asam Asiria haiüh ngüso mongchio nai kankü khu, naiuso asam thaiuthako titso tsütham.

⁵Naiuso lo Babilon nai nung chhi lilu thawaokü noin: Asam sua nouso, asam thaiuthako titso tsütham. Asam khaiuko sauhaiüh nok-shing, ngüsoüh jü thaiutha asaita lochi naiuso bülomkü han.

⁶Ashiau taoko asamüh ngo Goa naiuso asam ko chite-iu ta mitha kiu-e.”

⁷Nokmei ngem amei kankü king atsok nouso yankü shitsün, ngiongem kantsün tsak nou epau titi athanga noin! Apaüh Zion tü ashioloutsün welutkü ngioji, “A Goa nung nokpao noin!”

⁸Noknio nou tü hütsünsoüh kamsanküta koikü weji! APAOU Zion nai laokü shitsün ngüso niovei pemüh epji!

⁹Asam lothekü noitsün Yirusalem hai akoi nou wekü lüsopsat! APAOU nou apa noknio jüosane naiuso apa khaiuniaso aalou-i-e.

¹⁰APAOU nou apa asio oukong kankeikü, apaüh meshen khaiunia kipsane naiuso nung goumchi apem nou eppe.

¹¹Asam amkham tsam jengtsaiu kantsünso chikü asamüh Babilon atsüoting lülean! Tsüsiokün titso lathantan; asam siokü lütaiu küta tsaloukü lükhuwan.

¹²Lo taoko naito asamüh hekliokü letaiukü tsükhu-e; naiuso asamüh akhulükhunau tsükoweau noin. Ayam pungkü nai APAOU asam Goaüh asam nia-e naiuso kiplou-e.

¹³APAOU nou ngioji, “Jü ayathsüotsün nou apa chhisiya ashio eppe; apa hau atsokting asuhat kiu-e.

¹⁴Tilai ngüsoüh apa ep, khaiunia piakü lekkat; tiautenai apa khaiunia tsükhekkü iulakü noiküla.

¹⁵Lüko lo mele nouso piakü apa tü ngawane naiuso, alekkat nou nokpao nouso ngio chiteau tsüshiokü noi-e. Ngüsoüh nung khako tilaitso tsüngedekün tso tsak eppe naiuso ngela-e.”