Read Khiamniungan Naga Isa 53 Bible Online

Isa 53 - Khiamniungan Naga bible

Isa 53

¹Khaiuniahoi nou thashikü ngiom, “Samüh lo chitetsün tü sauhaiüh monglam? Naiuso nungko APAOU oukong sauüh epkü noiküla?

²Goh awai nai eiu saokü paisam tsak khekkü apa yathsüotsün samsanau nung APAOU mongchiotsün noiküla. Sam hau ngesani-au apa da alengmei tsüdekünai asuhat tsüsunküla. Apa tü sam tenlutau lümeikü nungko apa thaiutha ti achinektsün tsünoiküla.

³Samüh apa lochilotsao naiuso apa tsülou; apaüh omhetsün naiuso akia nou jeilou. Apa tü athaptso sauüh tsüthap apa ti tsüdeli samüh apa tsülusankü wanan.

⁴“Lüko apaüh omhetsün jeilou- nung sam thaiutha noiküla; nung akia nou samüh kanau noiküla. Loüh samüh apa omhetsün nung apem Goa tsangkü hongtsün athesan ta yangkiu.

⁵Lüko sam angei shioko apa tawai, shiuh, nung sam angei chhi shioko noiküla. Apa angja omhe eptsün tsangkü sam akia lomeikü noin, apa tü woitsün tsangkü sam ameilei nai noin.

⁶Sam chikü onnemok khekkü yam phiokü khuwan, sam khaiunia pungkü nou meshen yamai phoklekü khu. Lüko APAOU nou sam chiküüh epau maikü noitsün angja nou apa pem da kanlutlou.

⁷“Apa tü thatü thsüokü angja kiukü kankei, lüko apa meshen chija nyaploukü jeilou; apaüh ngio tsaktso tsüsingio. Aloatau thaiutha kankü khutsün onnemok thso tsak khekkü, apun tippanau nialoukü khutsün onnemok tsak khekkü, apaüh ngio tsaktso tsüsingio.

⁸Apa kelowan naiuso aa nou thumkü wananau khem, naiuso khaiunia sauühtso apa akuo thaiutha to paotsangkü tsüyanglu. Apa sam khaiuniahoi angei thaiutha loatkü wan.

⁹Apaüh ti mi tsülem lüko, tsüdekünai tilaitso tsübom lüko, ngüsoüh apa tsümeikünso akuo ko wekü shankiu, naiuso apa akhantsün taokoto memei haiko aikü khantaiukiu.”

¹⁰APAOU nou ngioji, “Apa omhetsün nung jü amongchiotsün tsak noiküla. Apa eantsün nung awankiu kankü shiau aloat chaithio tsak noiküla, nungtiphe apaüh meshen tsaosithsoso epkü, apa aakih laiukü kih-e, naiuso apa tsangkü jü ayangtaiu nou ashio eppe.

¹¹Angja omhe aakih nou phiai, loüh apaüh amongling epshi-e; apa omhetsün nung asapat nai tsüde ta apaüh nge-e. Thumkü kiukü yathsüotsün jü tsamki, sau tü ngü mongtsamji, apaüh khaiunia piakü ün angja kane, naiuso apa shioko ngo piakü ün angei wankiu-e.

¹²Nungtiphe ngo apa hau asuhat athang nou kiu-e, nung athang nou asong si oukong khaiunia ongko noi-e. Apaüh meshen aa nung ee saokü thumkü kiu, naiuso angei khaiuniahoi akuo nouko wethiohakü noiküla. Apa angei khaiuniahoi thangko tsakiu, naiuso ngüso angei wankiu-au thaiutha apaüh kojakiu.”