Read Khiamniungan Naga Isa 56 Bible Online

Isa 56 - Khiamniungan Naga bible

Isa 56

¹APAOU nou apa khaiuniaso tü ngioji, “Ti ngiotsüo naiuso ayamtha nou noin, nung lüchhi, tititenai liukü ngü asam kipsane.

²Sauhaiüh Yihuda Anounyi nung tsülothekü meikü noukü kankei-e ngü ngüso oukkiu-e. Sauhaiüh tsümeikün titso tsüchhiji nungso ngü oukkiu-e.”

³Gohmao khaiunia tsak sau APAOU ün khaiuniahoi ongko halutkü noin apaüh, “APAOU nou ngü hau apa khaiuniaso ongko tsüamkhami-e ta tsüngioau noin.” Athsülemtsün khaiunia tsak nou apa da methso chetlutau tsüshiophe, apaüh tilaitso Goa ün khaiunia ongko haoson thehaau tsüshio-e ta tsüyangau noin.

⁴APAOU nou nungtin khaiunia tsak nou tü ngioji, “Ni ngü hau Yihuda Anounyi noutsün tsangkü asuhat kiu naito, naiuso jü ngiokhem mongkiukü kankeitsün tsangkü ngü monglingi naito,

⁵ni da melothso naiuso menyiuthso chetlut- tsün ngüso aakihlaiu chiai shikü jü Amkham Tsamai naiuso jü khaiu- niaso ongko anian tilaitso tsübeankü yangsane.”

⁶Naiuso APAOU nou gohmao khaiunia sauhai apa khaiuniahoi ongko tengkam tsak hau iulakü, apa tsüojin naiuso yathsüo, naiuso Yihuda Anounyi nou meikü kankei naiuso loüh apa athalou-e nou mong kiukü kankei nungso tü ngioji:

⁷“Ngo jü asio king Zion nai asam nialoukü shi-e, naiuso misao lotsün jü tsamai asam hau amongling nou kiu-e, naiuso asamüh jü amthang khako aloat chaithio kiutsün nouso lou-e. Jü Tsam tü mele khaiunia chikü thaiutha misao loutsün Tsam tsak ta jone.”

⁸Akhengteng APAOU sauüh apa khaiunia Israel hai thaloukü khu- wantsün ainou niakamshin, apaüh loüh amao mele nouso ngüso ko hoilutau niakame ta thaloukü noin.

⁹APAOU nou gohmao mele nouso tü kengpun nai apa khaiuniaso mioli-anau liu thainian khekkü ashi ta ngiom.

¹⁰Apaüh ngioji, “Aheihoi chikü sauhaiüh jü khaiuniaso tü alohat ngio kiuau noiküla, nungso chikü niopek! Ngüsoüh titso tsünge. Ngüso ajei tsüjeikün ehü jii nouso khekkü-ngüso mea meanhe külu sai-anji. Ngüsoüh asaianaulu aiuji!

¹¹Ngüso tilaitso saiukü tsüep hekün achinek jii nouso khekkü noin. Nung aheihoi nouso da angelatsün tsünoi. Ngüso pungkü nou momoüh mongchiotsünlu chhiji naiuso momo alesan eptsün talu yamji.

¹²Nung thengtukhoi nousoüh ngioji, ‘samüh theng intso shiuko, nung samüh shiotsün lektso shiuko! Lühom nou to lonyi nou tü meitsokü noi-e!’”