Read Khiamniungan Naga Isa 57 Bible Online

Isa 57 - Khiamniungan Naga bible

Isa 57

¹Khaiunia mei nouso eanji, naiuso sauühtso nung tsüngela tsüdekünai mongai lüko yangkü tsünoi. Lüko ngüso tilai eanji, akuothe tiühtso ngüso tsütawaiji.

²Sauhai aakih amei nai kihkü shin, ngüsoüh ean nai aalou naiuso amongtsam nou epji.

³Asam angei khaiuniahoi, mikhemau nungai ashi! Mia on ko chitetsünso, tsütsüo tsütsamkünso, naiuso ajisiwop chhitsünso chiai nai asam meithso tsüde.

⁴Asam sauko lonyai-eji? Sau thako asamüh atsüotsüdekün lei khaiu nou hanji?

⁵Asam sauhai asio paisohkhem nai lelou kiutsün goa nousoko atsüojine chhi tsangkü amkhamji. Haiu- tsongan nou shimkü lungken nai asamüh asam thsoso chaithio kiuji.

⁶Asamüh nungko nou lung anyinchei nouso louji küta nungso tü ngüso meshenli amji. Asamüh nungso tü theng chaithio thsalutji naiuso nungso dongai khülam chaithio kankü shiji. Nung chikü nou ngü monglingiji ta asamüh yangjiso?

⁷Asam king atsok nai aloat chaithio nouso kiuau khuji küta nungai ajisiwop chhiji.

⁸Asamüh meshen koukhan nouso khadengko among- chio oukong lochinyantsün sotsom nouso taiuji. Asamüh ngü wankü asamüh tsüojintsün haisoko asam neshe lowanküta then atsok nouso chiai sunghji, küta asamko kamha- iji; küta nungko asamüh asam achinek mongtsam losanglouji.

⁹Molek goa amkhamau asamüh khaiutsom naiuso angannyam nouso tsomlutkü khuji. Goa nouso yamkü amkhamau asamüh ngiongem kantsünso alet alaiu athang nouso si eanhai goumchi nai saokü hong- pengji.

¹⁰Amaohai goa tü thaptsün ko asam chija tanatji, lüko asamüh nung tsüle-an. Amongchio oukong lochinyantsün sotsom goa nousoüh asam hau oukong kiuji ta asamüh yangji nungti asam tilaitso tsaosilaokü tsü-iula.

¹¹APAOU nou ngioji, “Asamüh ngo hau yaang ngio chitekü naiuso ngo thumkü beankü khu-itsün naiuso asam hat-itsün nung goa nouso titi nou goa noin? Ngü atao laiukü tsüsingiokü noian shioko asam ngo lomsantsün ko laowaniu süne?

¹²Asamüh ti chhiji nung thakü noin ta asamüh yangji, lüko ngü asam saisile achiai sungi-e, naiuso asamüh nou sotsom goa nousoüh asam hachu au tsüshio-e.

¹³Tilai asamüh ahachuau we-e, nungaih asam ün sotsom goa nousoüh asam lükip- sankiu! Ahsheih nou ngüso kankü khuwane! Lüko sauhaiüh ngo da amonglam taim ngüso to goumchi nai kih-e, naiuso jü Tsam nai Ngo tü amkhame.”

¹⁴APAOU nou ngioji, “Jü khaiuniaso jü dongai laokü ashi-i. Ngüso yamkheng ainou alomjeitsün alum alowan! Yam nou ayam, küta nung khemloukü ataiu!

¹⁵“Sau athontsüyangkü kihji, nung Akhengteng naiuso asio Goa nou Ngo noin. Ngo akhengteng naiuso asio Thang tsak nouko kihji, lüko loüh Ngü nyaploukü naiuso mong phoklekü noitsünsoko kihji, nungti Ngü ngüso ayang naiuso amonglam shanau shioji.

¹⁶Ngü jü khaiuniaso hau Ngo ainou aah kium, nungtiphe Ngü ngüso ko tenekü tsüli-eshi-e tsüdekünai asaita ngüsoko tsümongmat shi-e.

¹⁷Ngüso angei naiuso achinek shioko Ngo ngüsoko mongmatkü noiküla, nung- tiphe ngü ngüso lohatküta leankü noiküla. Lüko ngüso mongkongkü meshen yamailu khuwan.

¹⁸“Ngüsoüh titi chhiji nung Ngü epiu, lüko Ngü ngüso lomei-e. Ngü ngüso yam nia-e, naiuso hachu-e, naiuso mongsaiukü noinso mong Ngü aalou-i-e.

¹⁹Kumaikü naiuso shimkü noinso chikü hau Ngü aalou nou kiuji! Ngü jü khaiuniaso lomei-e!

²⁰Lüko tsümeikünhoi to achinyan kankü shitsün tilaitso alao tsüyang- kün khiampek, aalo tsünoikün khiamnok khekkü noin.

²¹Angei khaiuniahoi thaiutha nungko aalo tsünoi,” ta APAOU nou ngioji.