Read Khiamniungan Naga Isa 58 Bible Online

Isa 58 - Khiamniungan Naga bible

Isa 58

¹APAOU nou ngioji, “Ni shiotsün lektso sangh asong nou lüwe! Jü khaiunia Israelhai hau ngüso angei lüchite!

²Ngüsoüh jü yam nouso ngeau naiuso jü ngiokhem nouso angio ang-au mongchioji ta ngiokü ngüsoüh ngü ajekhaiu pungkü amkhamji. Ngü ngüso hau ngiokhem lu kiuküta Ngo am- khamtsün nai ngüsoüh amongtsam epau ta ngüsoüh ngioji.”

³Khaiuniahoi nousoüh sangkü ngioji, “APAOU nou tilaitso tsüngesan naito, tiauta keithon lou-e? Apaüh mong tsükiukü naito, samüh thai tsüsamkü tiauta misao-e?” APAOU nou ngüso tü ngioji, “Asam keithon ajekhaiu nai asamüh meshenüh aiutsün chhiji naiuso asam hau chhikiutsünso chikü thangmangji.

⁴Asam keithon nou asam mongsungiji, küta asam ngematkü li-eji. Nungtin keithon saisile nou asam misao tü ngü anglu-e ta asamüh yangjiso?

⁵Tilai asamüh keithonji, asamüh asam chija angja loji; khengliu sunli taokü saokü asam khaio ngamthioji, naiuso nethe sapengkü asailutau luo lopengji. Asamüh keithon ta ngiotsün nung süne? Nungko Ngo monglinge ta asamüh yangjiso?

⁶“Ngü mongchiotsün keithon misao nouto nung noin: Athangmang aoke naiuso khe aoke nou soktham küta athangmang nouso khaiunia- tsüo nai jashitsün noin.

⁷Achihsi- khiam naiusile hai hau lüsonwao, naiuso tsam tsühakü tsosilu hai hau atsam sopkü lütaiu. Atenau tsütaiukünso hau neshe nou lükiu, naiuso atsammongso tü hachuau tsümongchiokü lanoi.

⁸“Nungaito jü atsüojinyang nou ahom ajee awon khekkü akhako awone, naiuso ni nou mou nouso liukü meian-i-e. Ni kipsanau asaita Ngo niko noi-e; Ngo hatsün nou ayam pungkü nai ni kiplou-e.

⁹Ni tilai misao lou-e, Ngü thala-e. Tilai ni ngü jone, Ngo thashi-e. “Ni athangmangtsün, khakhakü lochilotsaotsün, naiuso tsümeikü chitetsün wanetünaito,

¹⁰Naiüso achihsikhiam naiusilekü noinso hau jane waokü tsosilu hai aalou-i- etünaito, nungaito ni lemkü anya- khem nou anyi awon hau phokle-e.

¹¹Naiuso Ngü ni asaita jime naiuso eheshiu amei nou ni mongtsami-e Ngü ni kongsimongkü naiuso meikü taiu-e. Khiam saiukü omkü noitsün aimong tsak khekkü ni noi-e, naiuso tilaitso tsüapkün haiuchetngan tsak khekkü noi-e.

¹²Akhaiuniaosüh peh nai lotheankü noitsün shanshi-e, akeng athanya nou ta loüh lashanshi-e. Asam lotheankü noitsün pe nouso lahsanshitsün naiuso lotheankü noitsün tsam nouso shanshitsün ta nge-e.”

¹³APAOU nou ngioji, “Ni Yihuda Anou nung asio wesan küta nung ajekhaiu ko ni mongchiotsün titso tsüchhikü naito, ni nung jü asio ajekhaiu ta tsütsakeikü, tsüchhi- siyakü, tsüdekünai nung ajekhaiu ko yaang tsüsingiokü naito.

¹⁴Ngo yathsüotsün shioko shitsün among- ling nou ni eplou-e. Ngü nihau goumchi chikü nou khako asuhat epau shankiu-e, naiuso apaosipo Yakob hau Ngü kiutsün goumchi amongling nou itaiu-e; ta APAOU nou nung Apa sontham ai shikü chite-iu.”