Read Khiamniungan Naga Isa 59 Bible Online

Isa 59 - Khiamniungan Naga bible

Isa 59

¹Asam kipsanau APAOU thatü tsaosilao ta layang; tsüdekünai asamüh jontsün lula au APAOU nou thatü noukek ta layang!

²Nungh asam angei shioko apaüh asamüh jontsün tsülulaji. Asam Apa amkhamau kowetsün taoko goa ainou punge-itsün nung asam angei noin.

³Tiautenai asam alothe nou, she loshitsün nou, atsüotsüdekü chitetsün nou longeikü noin.

⁴Asam mikhem nai khuji, lüko asamüh ngiotsüo apem nou tsüepji. Asam mi ashio epao asamüh yaang ngio nou da monglamji. Amaohai mong tawaikiuau asamüh asam ayangtaiu nouso chhisiyalükhunji.

⁵Asamüh shansantsün tsümeikün mongthat nouso nung aliule khutsün pao tsaküh thiotsün ali nouso tü tsaojeng noin. Tilai paoli tsak lopaiji, nungko pao tsak shikhuji! Lüko asam tsümeikün mongthat nou asam thaiutha amei titso tsüchhiji-nungto mekhakha aochan nou lahsantsün nepat tü tsaojeng!

⁷Asamüh asaita tsotsak tsümeikü thatji, naiuso asamüh nung chhiau jeikü jeilouji. Asam aphio tsünoikün khaiunia loatau tilaitso henyikü tsünoi. Asam tilüsongai khuji nungai alothe naiuso anyi-anlu wanji.

⁸Tilai asamüh nung chhiji tsaktso aaloukü tsünoi. Asamüh chhitsün alum nung ayam tsüthakü jije noin. Asam yam akiang nou tü hoilutji, naiuso nung yam tü sauhai tsakeiji tilaitso aalou tsünoiji.

⁹Khaiuniahoi nou ngioji, “Goa nou sam athangmangtsünso ainou tiauta tsükipsan nung samüh lo ngeji. Sam tsakeiau samüh awon thaiutha yang, lüko nungko anyakhemlu noin,

¹⁰nungtiphe sam niopek khaiuniahoi khekkü kamshin. Asoh hokkha thektsünli naiuso sauhai anyakhem goumchi nai tsakeitsünli, sam anyi khia-an.

¹¹Sam hatatkü naiuso yangelatkü noin. Athangmang naiuso aphio ainou sam kipsanau samüh Goa tü yangji, lüko titso tsüshitsat.

¹²“APAOU, samüh akhako ngiokhem lothetsün piakü noin. Sam angeiüh sam thako mitha kiuji. Nungso chikü thaiutha samüh meikü ngekü noin.

¹³Samüh athako khengshin, samüh ni wanan, naiuso ni tü hoilutau tsümongchiokü noiküla. Samüh amaohai thangmang küta ni ainou phoklekü khuwan. Sam mongyang nouso aphio, naiuso sam ngio nouso ngiotsüo tsüdekü noiküla.

¹⁴Ngiotsüo nou laiukü nai koman, naiuso ayamtha nou shimkü shiau tsüshiokü noiküla. Ngiotsüo nou phiai soikü khuwan, naiuso asio nou nungko anoithang tsüep.

¹⁵Ngiotsüo nou tsünoiphe, khaiunia ajantso tsümeikü chhitsün ainou laolonai, apa alothe noulu angja-ishiji.” APAOU nou nung epiu, naiuso apa ngiotsüo tsünoitsün thaiutha tsümongling.

¹⁶Thangmangkü noitsünso tü hachuau nungko tsaktso tsünoikü epnai Apa lekkatkü noiküla. Nungtiphe apaüh ngüso kipsanau meshen oukong kankei küta ashioloutsün loksane.

¹⁷Apaüh ehli shitho phakhut tsak khekkü ngiotsüo nou khutlou-e naiuso shikhao tsak khekkü akipsan oukong nou tholou-e. Apaüh ayam alum lotha au among- chio asong nou tholou-e, naiuso khaiuniahoi omhetsün aphio nou ta angja kiuau tholou-e.

¹⁸Apaüh meshen ehoi ngüso chhisiya tsangkü mi nou kheme, nungko kumai kihtsünso lüko hakü noi-e.

¹⁹Ajepek ainou ajenap saokü apa naiuso apa oukong asong lon hate. Apa haiumong khiam tsangtsün naiuso ahsheih oukong asong tsak khekkü shi-e.

²⁰APAOU nou apa khaiuniaso tü ngioji, “Asam angei nouso ainou phoklekü shitsünso chikü kipsanau naiuso halouau Ngo Yirusalem ai shi-e.

²¹Ngü asamko athalou-etsün tsak shanji: Jü atsandetsün nung asam thaiutha athontsüyang theau Ngü jü oukong asam hau kiuwaniu, naiuso lo ainou yaloukü asam thsaosithsoso ashiau atao chikü nouko ngo tü angio angkü theau noin.”