Read Khiamniungan Naga Isa 6 Bible Online

Isa 6 - Khiamniungan Naga bible

Isa 6

¹Nokpao Uzzia eantsün ponko nai, ngo APAOU nou ep. Apa meshen nokpao noikham nai akhengting nai tsokkü loksankü noin phakhut nou Amkham Tsam athum meankü noiküla.

²Apa lemkü Serafim nouso ngüso pungkü da akoi luok luok pokü tsakü noiküla. Nung thainian pungkü nou ngüso kha akoi nime nou loipok, naiuso pem nou akoi nime nou, naiuso apoitaiu akoi nime nou ajeikei-au thaiutha noiküla.

³Ngüso tsaküh tsak tü jonkü ngioji; “Asio, asio asio! APAOU Apemshiotsün asio noin! Apa ajinka nou goumchi apem miankü noin.”

⁴Ngüsoüh wetsün sang-i nou Amkham tsam athang nou da saiukü naiuso nung Amkham Tsam inkhao nou thangjeikü noiküla.

⁵Ngo ngiom, “Ngo inyate! Ngo akeng tiautenai jüsontham ainou shikhutsün ngio, ngioyak pungkü angei noitsün khaiuniahoi ongko ngo kihakü noin. Naiuso loüh, jü niovei pemüh, Nokpao, Apemshiotsün APAOU nou epiu!”

⁶Nungai amthang ainou intip nou inkaio tiploukü kankü Serafim ongko tsak jü dongai jeikü saom.

⁷Apaüh nung hengkü noitsün inkaio nou jü sonai thankü ngiom, “Nungüh ason ai thaniu, naiuso loto ni aphio khuwaniu, naiuso ni hau angei nouso wankiu-iu.”

⁸Nungai ngo APAOU nou ngiotsün lula, “Ngo sau honge? sam ngiongem kantsün sau noi-e?” Ngo thalakü ngiom, “Ngo khu-e! Ngo ahong!”

⁹Nungtiphe apaüh ngü tü khukü khaiuniahoi nouso hau nung ngio- ngem lüchite ta ngiom, “Asamüh titithatso anglünou, asamüh tsüngela-e, asamüh titithatso thaplünou, ti thawaoji nung tsütsangshei-e.”

¹⁰Nungai apaüh ngü tü ngiom, “Nung khaiuniahoi nouso ngakü, noukek, naiuso niopek lü-iula-i, nung- aito ngüsoüh tsüeppe, tsüdekünai tsülula-e tsüdekünai tsüngela-e. Ngüsoüh chhitünto, ngüso jü dongai phoklekü ngo ngüso lomei-ela.”

¹¹Nungai ngo sangshi, “Nungti nou tilektso noi-e APAOU?” Apaüh thalakü ngiom, “Noknio nou naiuso tsam nouso lothekü akeng mo-iulakün lektso naiuso gohthang nou tiau tsüthekü aodangkü mo-iu- lakün lektso noi-e.

¹²Ngo khaiu- niahoi nou laiukünai hongane naiuso nung gohthang athum aodangkü leane.

¹³Nung gohthang nai che ongko khaiunia tsak poisanlüko, apa lüko lomowane; apa to akhaiu sah ankü noitsün lampaidong tsak khekkü noi-e.” (Nung paidong nou Goa ün khaiunia thaiutha ayan tsalou- shitsün hanji.)