Read Khiamniungan Naga Isa 60 Bible Online

Isa 60 - Khiamniungan Naga bible

Isa 60

¹Atsa, Yirusalem, küta ajee khekkü uokü lüjee; APAOU ajinka nou akhako uoji!

²Amao mele nouso anyakhem nou kiapjei-e, lüko achhi-aito APAOU awon nou je-e; Apa hatsün awon nou niko noi-e.

³Mele nouso ni nou awon dongai shi-e, naiuso nokpao nouso ni nou ajekhaiu ayan peksantsünko tsakei-e.

⁴Ti thawaoji nungtü ni lemkü lüthap; akhaiuniaso tsamai laokü shishiau kamshiji! Athso melothso nouso laiukü ainou shi-e; Athso menyiuthso nousoüh ehen methso nouso khekkü ngüso phamongko lok-ke.

⁵Ni nung epküta amongling nou meane; Amongling nouko ni ngaongao-e. Mele nouso tengkam adongai kankü shi-e; Khiamnok yankü ainou ngüso tengkam shi-e.

⁶Media naiuso Efa ainou ut hoi asong shi-e. Ngüso Sheba ainou chaiou naiuso angannyamtsün kankü shi-e. APAOU nou ti chhin nung ngem amei khaiuniahoi nou chite-e!

⁷Kedar naiuso Nabaiot hai onnemok chikü ni hau aloat chaithio kiuau kankü shiküta Amthang nouko APAOU monglingi-au thio-e. APAOU nou apa ün Amkham Tsam loüh tekkü ajinka kü shanshi-e.

⁸Thengmia khekkü loikeitsün naiuso chongmükham hoi tsamai laokü shitsünli nungti kheng nouso noin.

⁹Nung kheng nouso Goa ün khaiuniahoi tsamai nialoukü shitsün gohthang alaiuteng ainou shitsünso noin. Israel ün asio Goa APAOU nian asuhat kiuau ngüsoüh chaiou si tangkason ngüsoko kankü shin. Apaüh mele chikü hau apa khaiuniaso lomsan-i-e.

¹⁰APAOU nou Yirusalem tü ngioji, “Gohmao khaiunia nousoüh asam peh shanshi-e; Naiuso ngüso Nokpaoüh asam yathsüo-e. Jü amongmat nouko Ngü asam lohatkü noiküla, lüko lo ngü asam hau jümong meantsün naiuso atsüojinyang hane.

¹¹Anyi si asoh asam bekhan nouso sopankülu noi-e, naiuso mele nouso nokpaohoi nousoüh asam dongai ngüso tengkam kankü shi-e.

¹²Lüko mele nouso ongko sauüh asam tsüyathsüo-e; ngüsoto moisemkü lomowane.

¹³“Tson, Juniper, naiuso Cyprus pai nouso, Lebanon hai liutsa ainou ameiting pai nouso kankü shiküta Yirusalem shanshi-e. Nungüh jü Amkham Tsam naiuso jü noknio alengmeikü shane.

¹⁴Sauhaiüh ni thangmangkiu au noiküla, ngüso thsoso dongai asuhat kiuau kauthiokü shi-e. Naiuso ataojam sauhaiüh ni chinyankü noiküla ngüsoüh shikü akhako kau-e. Naiuso ngüsoüh nitü, ‘APAOU ün Noknio,’ ‘Zion, nung Israelhai Asio Goa, ün Noknio ta jone.’

¹⁵“Aodangkü naiuso leankü noitsün noknio tsak, ni loto chaiankü naiuso chinyankü tsutaiutshi-e. Ngo ni athontsüyang monglingattsün athang asong naiuso alengmei tsak shane.

¹⁶Nyiuhai tsaküh apa thso paotsangtsünli mele nouso si nokpao nousoüh ni paotsange. Ngo, APAOU nou ni kipsan, naiuso Israel hai akongteng Goa nou ni nge-e.

¹⁷“Ngo nihau daoson liko chaiou, son naiuso pai liko tangkason naiuso daoson, naiuso lung liko sonla kankü shi-e. Loto asam nokpaoüh asam tsüthangmang shi-e, Ngü ngüso hau ngiotsüo naiuso aalou nai nokshingi-e.

¹⁸Pha po-ekü ngemtsün sangh loto tsülushi-e; A goumchi ko alothe, alopeng tsüshi-e. Pe tsak khekkü ngü ni solou-e naiuso kiplou-e; Ngü ni kipsankiu nou shioko ni ngo lomsane.

¹⁹“Loto anyih taoko aje nou ni nou awon tsüde tsüdekünai asoh taoko alei nou ni nou awon tsüde: Lüko ngo, APAOU ni nou athontsüyangkün awon noi-e; Jü ajinka awon nou akhako jelutkü noi-e.

²⁰Ni nou amongkia ajekhaiu nouso athon yangkü shi-e. Aje naiuso alei khengai tekkü mongkü nou, Ngo, APAOU, ni nou athontsüyang awon noi-e.

²¹Akhaiuniasoüh ayamtha noulu chhi-e, Naiuso nung goumchi nou athontsüyang thaiutha tengkame. Jü nian asong nou chikü khako tsangsheikü sungau thaiutha ngü ngüso thomthio naiuso seitho.

²²Atsamkhaiu ehenteng naiuso akheiteng lüko oukongteng mele tsak nouko wekü iula-e. Tilai nung atao nou thawaokü shi-e, Ngü nung liukü thawao-iau shane, Ngo APAOU nou noin!”