Read Khiamniungan Naga Isa 62 Bible Online

Isa 62 - Khiamniungan Naga bible

Isa 62

¹Yirusalem thaiutha ngü ti tsüngiokü tsamkü tsünoi-e; Apa mokipsankün lektso ngo nyankü tsünoi-e. Naiuso apaüh ashio eptsün nung asoh anyakhem nai aawon khekkü mosungkün lektso ngo aaloukü tsünoi-e.

²Yirusalem, mele nousoüh ni nou ashioloutsün eppe! Ngüso nokpao chikü nou ngüso ajinka eppe. Ni tü nian ayan tsak kiukü jone, naiuso nung nian nou APAOU pemüh kiukü noin.

³APAOU thaiutha alengmei kandeo tsak khekkü ni noi-e.

⁴Loto ni tü “Le-ankü,” noiküla ta tsüjonshi-e. Tsüdekünai loto agoumchi tü, “Aodangkü Le-antsün Tsammongnyiu” ta tsüjonshi-e. Lüko anian ayan nou, “Goa nou apa ko monglengkü noin,” ta noi-e. Naiuso agoumchi tü “Monglengkü noin,” ta noi-e. Naiuso agoumchi tü “Amongling nai Tsamsigoh yang,” ta jone. Tiautenai APAOU nou niko monglengkü noin, Naiuso agoumchi thaiutha apa tsammongpo tsak khekkü noi-e.

⁵Pühe tsaküh asangting meso tsak ko tsamsigoh shantsün khekkü, nungti ni seithotsün nou ni ko tsamsigoh yange. Tsamsigoh shanpao nou apa ajonloutsün menyiu ko monglengetsünli, nungti a-Goa ni tü monglinge.

⁶Yirusalem, adio-ai chiai Ngü ehü nouso taim. Anyi si asoh chikü ngüso nyankü tsünoi-an-e. Ngüsoüh APAOU hau apa athalou nouso yangsani-au noin, naiuso nung apa hau tilaitso tsübeani-au noin.

⁷Apaüh goumchi athum nou lomsanau Yirusalem nung noknio tsak ta müjam moshanshikün lektso ngüsoüh apa hau aalou tsükiuau noin.

⁸APAOU nou athalou amongteng tsak shan, naiuso apa oukong tsangkü nung chhi nou apaüh chhi-e. “Loto akhülam nung ehoi nouso thaiutha eheshiuau tsütheshi-e, Naiuso theng sübao thaiutha ni tanatkü chhin nung gohmao khaiuniahoi hau tsüshenane.

⁹Lüko asam sauhaiüh lethio küta be-eiuyam yamsan, ngüsoühlu nung heshiu-e küta APAOU lomsane. Asam sauhaiüh sainaoshep paotsang naiuso kamsan, ngüsoüh nung Jü Amkham Tsam bemong nai shiu-e.”

¹⁰Yirusalem khaiuniaso, noknio mong ainou ashi-an küta asam khaiunia laokü shitsünso thaiutha yam tsak lüshan! Lung nouso yan-ankü yampun tsak lüyam! Mele nousoüh iloau thaiutha aleng ii tsak lütaiu.

¹¹Goumchi athon saokü ta APAOU nou welut-iu: “Apaüh kipsankü taiutsün khaiuniahoi niakü, APAOU nou asam kipsanau shiji, ta Yirusalem khaiuniahoi hau lüchite.”

¹²Asam tü, “Goa ün Asio khaiuniahoi,” “APAOU nou kipsantsün khaiuniahoi,” ta jone. Yirusalem tü, “Goa nou Tsüojintsün Noknio”, “Goa nou Tsüle-antsün Noknio” ta jone.