Read Khiamniungan Naga Isa 63 Bible Online

Isa 63 - Khiamniungan Naga bible

Isa 63

¹“Sheitho aseng thokü, apa sheitho ajinkakü thokü oukong nai naiuso akong nouko tsakeikü Edom nai Bozrah hai noknio ainou shitsün nung sau?” “Oukong nai kipsanau, apa ashioloutsün welutkü shitsün, nung APAOU nou noin.”

²“Tiauta aneshe theng shanau sainaoshep noipektsün khaiunia tsak ün aseng khekkü noin?”

³APAOU nou thalakü ngioji, “Ngü mele nouso sainaoshep khekkü noipekiu, naiuso ngo hachuau tsaktso tsüshi. Ngü ngüso jü amongmat nai noipek, naiuso ngüso she nung jü neshe chikü tü pokü noin.

⁴Jü khaiuniaso kipsanau atao nou shisao-iu naiuso loüh ngüso ehoi hau alohatkiu au atao noiküla ta ngü yang.

⁵Tilai ngü thap, nungko ngo hachuau tsaktso tsüepsan nungaih ngo lekkatkü noiküla. Lüko jü amongmatüh ngo oukongi naiuso ngü ashioloutsün ep.

⁶Jü amongmat nouko ngü mele nouso athum ngamthio naiuso ngüso nelangkü ngampek. Naiuso ngü ngüso ün aah she nou goh ai tsangpengi.”

⁷Ngü APAOU ün tsüphiokün atsüojin thaiutha chite-e; Apaüh sam hau chhikiutsün chikü thaiutha ngü apa lomsanji. Apa atsüojinyang naiuso atsüojin shioko Israel hai phopkü ouk kiu-iu.

⁸APAOU nou ngiom, “Ngüso jü khaiuniaso noin; ngüsoüh ngü tsüsapthio-e.” Nungtiphe apaüh ngüso

⁹omhetsün chikü ainou ngüso kipsan. Nung honghoi tsak tsüde, lüko APAOU apa pemüh ngüso kipsan. Apa atsüojin naiuso atsüojinyangkiu nouko apaüh ngüso kipsan. Yankü shitsün taoko apaüh ngüso tü asai paotsangkü noiküla;

¹⁰lüko ngüsoüh apa thako khengshi naiuso apa ün asio Onthso mongmat-i. Nungtiphe APAOU nou ngüso eh iulaküta ngüso thako ehlikü noiküla.

¹¹Ngüsoüh APAOU yathsüotsün Mosa taoko nou ajekhaiu nouso yangsanshi küta sangkü ngiom, “Apa khaiunia aheihoi khiamnok ainou kipsantsün APAOU nou lo tiai noin? Mosa hau Onthso kiutsün APAOU nou tiai noin?

¹²Meshen thaiutha athontsüyangkün niansong shio- louau, khiamnok khiam janthattsün, naiuso apa khaiunia khiam a-auoteng yankü nialoukü shitsün, meshen oukong nou Mosa tsangkü chhi asong chhitsün nung APAOU nou tiai noin?” APAOU nou yam niakü ngüso liutsa nai noitsün mokthso nousoli, hokjeüh tsakei, naiuso ngüso tilaitso tsükhiakü noiküla.

¹⁴Jangtsohoi nouso thsanyan noitsün tsamei tsakai nialoukü khutsünli, APAOU nou apa khaiuniaso hau aalou nou kiu. Nungti apa nian lomsankü loksantsün thaiutha apaüh meshen khaiuniahoi niakei.

¹⁵APAOU, ni noitsün asio naiuso ajinka aün nok ainou sam tü thapikü ajinlu. Ni sam thaiutha yangkiutsün tiai noin? A-oukong tiai noin? Ni nou atsüojin naiuso ayangkiutsün tiai noin? Sam tsüthapsankü lawanan.

¹⁶Ni sam Po noin. Sam paosiposo Abraham naiuso Yakob ngüsoüh sam tsülusan, lüko APAOU, ni sam Po tsak sauüh sam asaita kipsankü shitsün tsak noin.

¹⁷Ni sam yam ainou tiauta soikü khuwan-i? Sam ni ainou phoklekü khuwanau ni sam mongpem tiauta juokü shanji? Ni yathsüotsünso koko, naiuso khaiunia sauhai ni nou asaita noikü shin nungso koko lüko laokü ashi.

¹⁸Sam ni nou asio khaiuniahoi atao letletkü thaiutha sam ehsoüh komankü noiküla; ngüsoüh ni nou asiothang nou ngamthiowaniu.

¹⁹Ni sam nokpao au tilaitso thekü tsüshili naiuso sam akhaiuniaso ta tilaitso noikü tsüshili ni sam tü kankei.