Read Khiamniungan Naga Isa 65 Bible Online

Isa 65 - Khiamniungan Naga bible

Isa 65

¹APAOU nou ngiom, “Ngo jü khaiuniaso misao tü thala au khemloukü noiküla, lüko ngüsoüh misao tsüsao. Ngü ngüso hau Ngo epsan-iau khemloukü noiküla, lüko ngüsoüh misao tsü kowelu teng. ‘Ngo nungko noin, Ngo asam hachu-e.’ Ta thalaau asaita khemloukü noilüko, mele nou ngü tü misao tsüsao.

²Ti ayam tsüthakü noin nung chhiau mong kongkü iulatsün naiuso ngüso meshen yamai khuwantsün, jü khaiuniaso monglingkü louau Ngo asaita khemloukü noiküla.

³Ngo tsülaokü mongmat-iau ngüso amiam tsünoi. Ngüsoüh asio aimong nai paisilung, aloat chaithio kiu, naiuso paisilung amthang nouso ko angannyamtsün jahji.

⁴Asoh taoko ngüso eanhai onthso ko chiteau lungken naiuso e-tam nouso ai khuji. Ngüsoüh yahnyih naiuso paisilung amkham nai aloat chaithio kiutsün nyih khiamlam shiuji,

⁵küta ngüsoüh amaohai tü, ‘Sam ainou soiloukü anoi; tiautenai asamüh thantanau sam thatü asio noin!’ ta ngioji. Ngü nungtin khaiunia kiptaiu au tsüshio-tititenai ngüso thako jü amongmat nung innyai khekkü tilaitso tsünyatkü noi-e.

⁶“Ngü ngüso lohat au thatlouwaniu, naiuso nung ngüso tü chhiau nou satlouwaniu. Ngüsoüh ti chhin nung ngü yaang tsüwane, lüko laokü kiushi-e,

⁷nung ngüso si ngüso paosiposo angei thaiutha noi-e. Ngüsoüh paisilung amtsün amkham tsam king nai angannyamtsün jahkü noiküla naiuso jü thaiutha ko tsümeikü chite-iu. Nungtiphe ngüso ayanan chhisiya mai Ngü ngüso lohat-e.”

⁸APAOU nou ngioji, “Sauühtso sainaoshep amei nou tsüloutheji, nungliko to, ngüsoüh theng shanji. Ngü lüko jü khaiuniaso chikü tsülomo-e, lüko sauhaiüh Ngo yathsüoji Ngü ngüso kipsane.

⁹Ngü Israel hai Yihuda kau oukkiu-e, naiuso ngüso thsaosithsosoüh jü king goh nou tengkame. Jü achosan khaiuniahoi, sauhaiüh ngo yathsüoji, ngüso nungko kih-e.

¹⁰Ngüsoüh Ngü amkhame naiuso ngüso onnemok si jangtso hoi nou ajenap nai Sharon Tsamei naiuso ajepek nai Angja Tsamei nai thsanyan tsamhe au nialoukü khu-e.

¹¹“Lüko asam sauüh Ngo wanan, Jü asio king Zion tsüwesan, küta akuo mei si tsümei goa sau Gad naiuso Meni noin nungne tü amkham, asam thaiutha to amomo noi-e.

¹²Asam akuo nung sah nou eau noi-e, tiautenai Ngü asam jontsün tao asamüh tsüthala, naiuso Ngü chitetsün taoko asamüh tsü-anglu. Asamüh tsümeikü chhiau naiuso ngo lotheau cholouji.

¹³Naiuso Ngü asam tü ngioji, Ngü amkhamkü jüngio angtsünsoüh to eheau naiuso ashiuau saiukü eppe, lüko asam to naiusilekü noi-e. Ngüso to mong- linge, lüko asam to miame.

¹⁴Ngüso to amongling nou jih hange, lüko asam to mongpem lothekü shape.

¹⁵Jü achosan khaiuniahoi nousoüh anian nung athesan au kankei-e. Ngo, Akhengteng APAOU nou asam ean-i-e. Lüko jüngio angtsünso hau to Ngü nian ayan tsak kiu-e.

¹⁶Goumchi ko ajantsoüh ouk thaiu- tha misao saonai nung oukkiu-au, Atsüojintsün Goa tsangkü sangkiu-e. Sauhaiüh ngiomong shing shane, nung Atsüojintsün Goa nian tsangkü ngiomong shinge. Ayanan tao angja nouso khuwane naiuso be-ane.”

¹⁷APAOU nou ngioji, “Ngü goum ayan tsak naiuso aün ayan shanji. Yankü shitsün chhisiya nouso thumkü tsüyangsanshi-e.

¹⁸Ngü ti shanji nungko athontsüyang mong- lingatkü naiuso monglingkü lünoi. Ngü shantsün ayan Yirusalem nouto amonglingat nou miane, naiuso nung khaiunia nouso monglingkü noi-e.

¹⁹Yirusalem naiuso apa khaiunia thaiuthako Ngo jüpem amongling nou meankü noi-e. Nungko ashap- tsün naiuso ahachuau jonetsün titso tsünoi-e.

²⁰Loto methso nionyaothso taoko tsü-eane, naiuso khaiunia chikü momo ve somkü kih-e. Nungko aahkihlaiu pon tsom tsak nouso methso au thekü wesane. Nung mosaokü ean naito ngü ngüso hau angja kium ta ii tsak noi-e.

²¹Khaiuniahoi nou tsam nouso lahkü nungko kih-e ajantso tsangkü ngüso tsükankeishi-e. Ngüsoüh sainaoshep eiu nouso ah-e, naiuso nung tü ngüso monglingate, nung amaohaiüh tsüshiuha-e. Paisam aakihlaiuli jü khaiuniaso aakihlaiu noi-e. Ngüsoüh chhisantsün nouko ngüso mongtsam thasangkü noi-e

²³Ngüsoüh chhitsün chhisiya nouso ashio eppe, naiuso ngüso thsosoüh akuothe nou tsüwaohe-e. Ngü ngüso naiuso ngüso thsaosithsoso ashiau noitsün atao chikü nouko oukkiu-e.

²⁴Jü dongai ngüso misao hongtsün mokhemkün khako lüko ngü ngüso misao thala-e.

²⁵Chiuthso si onnemokthso nousoüh thsan aikü tsamhe-e; jangtso nou hetsünli chongkhao nousoüh lüko tsokap nou he-e, naiuso pao nouso da loto aliule titso tsünoishi-e. Jü asio king Zion chiai, atawai au tsüdekünai tsümeikün titso tsünoi-e.”